އެހެން އަހަރުތަކެކޭ އެއްފަދައިން މިއަހަރުވެސް ކާމިޔާބު ކަމާއިއެކު ބިޒްނަސް ސްކޫލް ސްޓޫޑެންޓް އެސޯސިއޭޝަން (ބީ.އެސް.އެސް.އޭ) އިން މޫވީ ނައިޓް ބާއްވައިފިއެވެ.
މިއީ މިއަހަރު ބީ.އެސް.އެސް.އޭ އިން ބޭއްވި ފުރަތަމަ މޫވީ ނައިޓެވެ. މި ހަރަކާތް ބޭއްވުނީ ދިވެހިރާއްޖޭގެ ގައުމީ ޔުނިވާސިޓީ (އެމް.އެން.ޔޫ) ގެ ހުރިހާ ފެކަލްޓީތަކުގެ ދަރިވަރުންނަށް އަމާޒު ކޮށްގެންނެވެ. 05 މާރިޗު 2022 ވީ ހޮނިހިރު ދުވަހުގެ ރޭ ބޭއްވުނު މި ހަރަކާތް ކުރިޔަށް ގެންގޮސްފައިވަނީ ބިޒްނަސް ސްކޫލް އޮޑިޓޯރިއަމްގައެވެ. މޫވީ ނައިޓުގެ ބައިވެރިންނަށް ފުޑް ސްޓޯލެއް ހުޅުވާފައިވާއިރު މި އަހަރު ތަފާތު ކުރުމުގެ ގޮތުން ބުއިމެއްގެ ގޮތުގައި ބްލޫބެރީ މޮހީޓޯ ވަނީ ވިއްކާފައެވެ. މޫވީ ނައިޓްގައި އަޅުވާފައިވަނީ ”ސްކްރީމް“ ނަމަކަށް ކިޔާ އިނގިރޭސި ފިލްމެކެވެ.
މި އިވެންޓް އަކީ ކުރިޔަށް އޮތް އެމް.އެން.ޔޫ.އެސް.ޔޫ އިންޓަރ ފެކަލްޓީ ވޯލީ ބޯޅަ މުބާރާތުގައި ބީ.އެސް.އެސް.އޭ އިން ބައިވެރިވާ އަންހެން އަދި ފިރިހެން ޓީމުގެ ޚަރަދުތައް ބެލެހެއްޓުމަށް ބޭއްވުނު ފަންޑް ރެއިޒިންގް އިވެންޓެކެވެ. މީގެ އިތުރުން ކިޔެވުމުގެ މާހައުލުން އެކަހެރިވެ ދަރިވަރުން ހިތްހަމަ ޖައްސާލަން އެކުވެރިންނާއެކު ވަގުތު ކޮޅެއް ހޯދައިދިނުމަކީ ވެސް މި އިވެންޓުގެ މަގުސަދެކެވެ.
މި ހަރަކާތް އިންތިޒާމްކޮށް ހިންގުމުގައި ހަރަކާތްތެރިވެފައިވަނީ ބީ.އެސް.އެސް.އޭ ގެ ލީޑަރުންނެވެ. ބީ.އެސް.އެސް.އޭ އިން ހިންގާ ކޮންމެ ހަރަކާތެއްގައިވެސް ލީޑާސް ގްރޫޕުން ލިބޭ އެއްބާރުލުން ފާހަގަ ކޮށްލުން ހައްގެވެ.
މި އަހަރު ކުރިޔަށް އޮތްތާގައިވެސް ބީ.އެސްއެސްއޭ އިން އިތުރު މޫވީ ނައިޓް ތަކެއް ބާއްވަން ވަނީ ނިންމާފައެވެ.
