ފެސާގެ ފުރަތަމަ ފަންޑްރައިސިންގ އިވެންޓް ”ކެފެޓީރިޔާ – މޭޑް ވިތް ލަވް“ ކާމިޔާބުކަމާއެކު ނިންމާލައިފިއެވެ.
ފެސާގެ ހިންގާ ކޮމިޓީ މެންބަރުންނާއި ފެކަލްޓީ އޮފް އެޑިއުކޭޝަންގައި ކިޔަވަމުންދާ ބައެއް ދަރިވަރުން ވަނީ މި އިވެންޓަށް މޭޒު ތައްޔާރުކޮށްފައެވެ. އެފް.އީ ގެ ޙާއްސަ މެނިއު އަކާއެކު ”ކެފެޓީރިޔާ – މޭޑް ވިތް ލަވް“ ބޭއްވުނީ 3 މާރިޗްގެ ހެނދުނު 10:30 އިން ފެށިގެން މެންދުރުފަހު 3:00އާ ހަމައަށް ސީއޭ އޮޑިޓޯރިއަމް ކުރިމަތީގައެވެ.
ފެސާގެ މި ކެފެޓީރިޔާގެ ހިމެނުނު ކާއެއްޗެހީގެ ތެރޭގައި ކަޕްކޭކް، ޗޮކްލެޓް ފަޖް، ކުޅިފާރޮށި، ޒުވާރި އަދި ސޮސެޖް ހިމެނެއެވެ. އަދި ބުއިމުގެ ބާވަތްތަކުގެ ތެރޭގައި މޮޖީޓޯ އަދި މަސާލާ ޗައި ނުވަތަ ސައި ހިމެނުނެ އިރު އެންމެ މަޤުބޫލް ބުއިމަކަށްވީ މޮޖީޓޯއެވެ.
މީގެ އިތުރުން އިވެންޓް ތެރޭގައި ހީނާ ޑިޒައިން ކޮށްދިނުން ވެސް ކުރިޔަށް ގެންގޮސްފައިވެއެވެ.
ފެސާގެ “ ކެފެޓީރިޔާ – މޭޑް ވިތް ލަވް“ ކާމިޔާބު އިވެންޓަކަށް ހެދުމަށްޓަކައި، ކާބޯތަކެތި ތައްޔާރުކުރުމުން ފެށިގެން ކެފެޓީރިޔާގައި އެކި ގޮތްގޮތުން މަސައްކަތްކުރި ފެސާގެ ހިންގާ ކޮމިޓީގެ މިހާރުގެ މެމްބަރުންނާއި ކުރީގެ މެމްބަރުންގެ އިތުރުން އެފް.އީ ގައި ކިޔަވަމުންދާ ބައެއް ދަރިވަރުން ކޮށްފައިވަނީ ވަރަށް ފުރިހަމަ މަސައްކަތެއްކަން ފާހަގަކޮށްލެވެއެވެ. އަދި މި އިވެންޓްގައި އަމިއްލަ އަށް އިސްނަގައިގެން އެކި ގޮތްގޮތުން އެހީތެރިވެދީފައިވާ އެފް.އީގެ ބައެއް ދަރިވަރުންގެ މަސައްކަތް ފެސާއިން ވަނީ އުފަލާއެކު ފާހަގަކޮށްފައެވެ.
ޔުނިވަރސިޓީގެ ލެކްޗަރާއިންނާއި ދަރިވަރުންގެ ފަރާތުން މި ފަންޑްރައިސްންގ އިވެންޓަށް ވަރަށް ބޮޑު ތަރުހީބެއް ލިބުނުކަމަށްޓަކައި ފެސާއިން ވަނީ ޝުކުރުއަދާކޮށްފައެވެ. އަދި އެމް.އެން.ޔޫ.އެސް.ޔޫ އިން އިވެންޓް ބޭއްވުމަށްޓަކައި ދެއްވި އެއްބާރުލުމާއި އެހީތެރިކަންވެސް ފާހަގަކޮށްފައެވެ.
މި އިވެންޓްގެ މައިގަނޑު މަޤްސަދަކީ މި ފަންޑުގެ ބޭނުންކޮށްގެން ދަރިވަރުންނަށް މަންފާ ކުރަނިވި ކަންކަން ހިންގުމަށް ފުރުޞަތު ފަހިކޮށްދިނުމެވެ.
