އެމް.އެން.ޔޫ.އެސް.ޔޫ އެސް.އެސް.އެލް އިންޓަރ ފެކަލްޓީ ޤުރުއާން މުބާރާތުގެ ފެށުމުގެ ރަސްމިއްޔާތު ބާއްވައިފިއެވެ. 21 އޭޕްރިލް 2018 ވީ ހޮނިހިރު ދުވަހުގެ ހެނދުނު 10:00ގައި ފައުންޑޭޝަން ސްޓަޑީޒް އޮޑިޓޯރިއަމްގައި ބޭއްވުނު މި ރަސްމިއްޔާތުގައި ޑެޕިއުޓީ ވައިސް ޗާންސެލަރ އަލްފާޟިލާ އައިޝަތު ޝާހީން އަދި ޑީން އޮފް ސްޓޫޑެންޓްސް އަލްފާޟިލާ ނާދިޔާ އަޙްމަދު ބައިވެރިވެލެއްވިއެވެ. ޤުރުޢާން މުބާރަތް ފެށުމުގެ ރަސްމިއްޔާތުގެ ޝަރަފުވެރި މެހެމާނަކީ ފެކަލްޓީ އޮފް ލޯ އެންޑް އިސްލާމިކް ސްޓަޑީޒްގެ ޑީން ޝެއިޚް ޢަލީ ޒާހިރެވެ. މި ރަސްމިއްޔާތުގައި އެމް.އެން.ޔޫ.އެސް.ޔޫގެ ހިންގާ ކޮމިޓީގެ މެންބަރުންވެސް ބައިވެރިވިއެވެ.
ޤުރުޢާން މުބާރަތް ހުޅުވުމުގެ ރަސްމިއްޔާތުގައި މުބާރާތާ ބެހޭގޮތުން ކުރު ތަޢާރަފެއް ދެއްވީ ފެކަލްޓީ އޮފް ލޯ އެންޑް އިސްލާމިކް ސްޓަޑީޒްގެ ގޮފި ކަމަށްވާ ސޮސައިޓީ އޮފް ޝަރީޢާ އެންޑް ލޯ (އެސް.އެސް.އެލް)ގެ ސެކްރެޓަރީ ޢަލީ އިސްމާއިލްއެވެ. ޢަލީ އިސްމާއިލް ވިދާޅުވީ މި މުބަރާތަކީ ދަރިވަރުންގެ ހިތުގައި ޤުރުޢާނަށް އޮންނަ ލޯބި އިތުރުކުރުމަށާއި ދަރިވަރުންގެ ކިބައިގައި ހުންނަ ހުނަރު ދެނެގަތުމަށްޓަކައި ބޭއްވޭ މުބާރާތެއްކަމަށެވެ. އަދި މި އަހަރުގެ މި މުބާރާތުގައި 7 ފެކަލްޓީއަކުން 51 ދަރިވަރަކުވަނީ ބައިވެރިވެފައިވާކަން ފާހަގަކޮށްލާފައިވެއެވެ. މި މުބާރާތުގައި، ބަލައިގެން ކިޔެވުމުގެ ގޮފިންނާއި އަދި ނުބަލާ ކިޔެވުމުގެ ގޮފިން 1ވަނަ 2ވަނަ އަދި 3ވަނަ ދަރިވަރު ހޮވާނެކަމަށާއި އަދި ދެ ގޮފިންވެސް 1ވަނަ ހޯދާ ދަރިވަރަކަށް ޓްރޮފީގެ އިތުރުން -/2500 ކަނޑައެޅިފައިވާކަމަށާއި އަދި މި މުބާރާތުގެ އެންމެ މޮޅު ފެކަލްޓީހޮވުމަށް ކަނޑައެޅިފައިވާކަމަށް ޢަލީ އިސްމާއިލް ވިދާޅުވިއެވެ. އަދި މި މުބާރާތުގައި، ލަފާކުރި އަދަދަށްވުރެ ގިނަ ދަރިވަރުން ބައިވެރިވެފައިވާތީ އެކަމާ ވަރަށް އުފާކުރާކަމަށްވެސް ޢަލީ އިސްމާއިލް ވިދާޅުވިއެވެ.
މިރަސްމިއްޔާތުގެ ޝަރަފުވެރި މެހެމާން އަދި ފެކަލްޓީ އޮފް ލޯ އެންޑް އިސްލާމިކް ސްޓަޑީޒްގެ ޑީން ޝެއިޚް ޢަލީ ޒާހިރުވަނީ އެމް.އެން.ޔޫ.އެސް.ޔޫއާއި ގުޅިގެން މި މުބާރަތް ވުޖޫދަށް ގެނައުމަށް މަސައްކަތް ކުރާތީ ސޮސައިޓީ އޮފް ޝަރީޢާ އެންޑް ލޯ (އެސް.އެސް.އެލް)އަށް ޝުކުރުއަދާކޮށްފައެވެ. އަދި މުބާރާތުގެ ފަނޑިޔާރުންނަށް އެމް.އެން.ޔޫއިން ބޭރުން ފަނޑިޔާރުން އައިކަމީ ވަރަށް އުފާކުރާ ކަމެއްކަމަށް ޝެއިޚް ޢަލީ ޒާހިރު ވިދާޅުވިއެވެ. ޝެއިޚް ޢަލީ ޒާހިރުގެ ވާހަކަފުޅު ނިންމާލަމުން ވިދާޅުވީ، މި މުބާރާތަކީ ކާމިޔާބު މުބާރާތަކަށް ވެގެންދިޔުމަށް އުންމީދު ކުރާކަމަށެވެ. އަދި ފަނޑިޔާރުންގެ ނިންމުންތަކަށް ހުރިހާ ދަރިވަރުންވެސް އިހްތިރާމް ކުރުމަށް ޝެއިޚް ޢަލީ ޒާހިރުވަނީ ނަސޭހަތްތެރިވެފައެވެ.
މިރަސްމިއްޔާތުގައި ޑީން އޮފް ސްޓޫޑެންޓްސް އަލްފާޟިލް ނާދިޔާ އަޙްމަދު ވިދާޅުވީ މިފަދަ މުބާރަތްތައް ހުޅުވުމުގެ ރަސްމިއްޔާތަކަށް ހާޒިރުވުމަކީ ލިބޭ ވަރަށް ބޮޑު އުފަލެއްކަމަށާއި ދަރިވަރުން ހިންގާ މިކަހަލަ ހަރަކާތްތަކުގައި މެނޭޖްމެންޓުގެ އެއްބާރުލުން ދޭނެކަމަށެވެ. އަދި މިރަސްމިއްޔާތުގައި ވާހަކަފުޅު ދައްކަވަމުން އެމް.އެން.ޔޫ.އެސް.ޔޫގެ ރައީސް އަރުޝަދު އަޝްރަފް ވިދާޅުވީ މިމުބާރާތަކީ މިހާގިނަ ދަރިވަރުންތަކެއް ބައިވެރިވި ފުރަތަމަ މުބާރަތްކަމަށާއި 7 ފެކަލްޓީއަކުން 51 ދަރިވަރުން ބައިވެރިވުން އެއީ ފާހަގަ ކޮށްލަންޖެހޭ ކަމެއްކަމަށެވެ. އަރުޝަދު ވިދާޅުވީ މި މުބާރާތުގައި އެންމެ ބުރަ މަސައްކަތެއް ކޮށްދީފައިވަނީ ސޮސައިޓީ އޮފް ޝަރީޢާ އެންޑް ލޯ (އެސް.އެސް.އެލް)ކަމަށެވެ. އަދި އެމް.އެން.ޔޫ.އެސް.ޔޫގެ ނަމުގައި މުބާރަތް ކުރިޔަށް ގެންގޮސްދީފައިވާތީ އެސް.އެސް.އެލްއަށް އަރުޝަދުވަނީ ޝުކުރު ދަންނަވާފައެވެ.
މި މުބާރަތް ސްޕޮންސަރ ކޮށްފައިވަނީ މޯލްޑިވްސް އިސްލާމިކް ބޭންކުންނެވެ. އަދި މި މުބާރާތަކީ އެމް.އެން.ޔޫ.އެސް.ޔޫގެ ގޮތްޕަކާއި އެމް.އެން.ޔޫ.އެސް.ޔޫ ގުޅިގެން ކުރިޔަށް ގެންދިޔަ ފުރަތަމަ މުބާރާތެވެ.
