ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ބާއްވާ، ލެކްނޯ އެމް.އެން.ޔޫ.އެސް.ޔޫ ފުޓްސެލް ފިއެސްޓާގެ ގުރު ނަގައިފިއެވެ.
މުބާރާތުގެ ގުރު ނެގުން ކުރިއަށް ގެންދިޔައީ ހޯމަ ދުވަހުގެ ރޭ ދިވެހިރާއްޖޭގެ ޤައުމީ ޔުނިވަރސިޓީގެ ސީއޭ އޮޑިޓޯރިއަމްގައެވެ. މުބާރާތުގައި ޖުމުލަ 29 ޓީމަކުން ވާދަކުރެއެވެ. އެއީ ފިރިހެން ޑިވިޝަންގައި 18 ޓީމާއި، އަންހެން ޑިވިޝަންގައި 11 ޓީމެވެ.
ފިރިހެން ޑިވިޝަންގެ ޓީމުތައް ބަހާލެވެފައިވަނީ ހަތަރު ގްރޫޕަކަށެވެ. ގްރޫޕް އޭ އާއި ބީގައި އޮތީ ކޮންމެ ގްރޫޕެއްގައި ފަސް ޓީމެވެ. ގްރޫޕް އޭ ގައި އޮތީ އެފް.އެޗް.އެސް، ފެސްޓު، މެޕްސް ކޮލެޖު، އެފް.އެސް.އެލް އަދި ސައިރިކްސް ކޮލެޖެވެ. ގްރޫޕް ބީ ގައި އޮތީ އެފް.އެޗް.ޓީ.އެސް، އެސް.އެން، ސީ.އެފް.އެސް، އެވިޑު ކޮލެޖު އަދި އެސް.އެމް އެވެ.
މި ޑިވިޝަންގެ ގްރޫޕް ސީ އާއި ޑީ ގައި އޮތީ ކޮންމެ ގްރޫޕަކު ހަތަރު ޓީމެވެ. އެއީ ގްރޫޕް ސީ ގައި އެފް.އޭ، ކްލިކް ކޮލެޖު، ވިލާ ކޮލެޖުގެ އަދި ޕޮލިޓެކްނިކެވެ. ގްރޫޕް ޑީ ގައި އޮތީ އެމް.އައި، އައި.ޔޫ.އެމް، އެމް.ބީ.އެސް އަދި އެމް.އެން.ޔޫ.ބީ.އެސް އެވެ.
އަންހެން ޑިވިޝަން ބަހާލެވިފައިވަނީ ތިން ގްރޫޕަކަށެވެ. އެއީ ގްރޫޕް އޭ އަދި ބީ ގައި ހަތަރު ޓީމެވެ. ގްރޫޕް ސީ ގައި އޮތީ ތިން ޓީމެވެ.
ގްރޫޕް އޭ ގައި އޮތީ، ވިލާ ކޮލެޖު، އައި.ޔޫ.އެމް، ކްލިކް ކޮލެޖު އަދި އެފް.އެސް.އެލްއެވެ. ގްރޫޕް ބީ ގައި އޮތީ އެސް.އެން، ސައިރިކްސް ކޮލެޖު، އެފް.އެޗް.އެސް އަދި ސީ.އެފް.އެސްއެވެ. ގްރޫޕް ސީ ގައި އޮތް ތިން ޓީމަކީ އެމް.އައި، އެމް.އެން.ޔޫ.ބީ.އެސް އަދި އެފް.އެޗް.ޓީ.އެސް އެވެ.
ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ ޓައިޓްލް ސްޕޮންސަރަކީ އެމް.ޔޫ ސްޓޯރުން އެތެރެކުރާ ”ލެކްނޯ“ ބްރޭންޑެވެ. މުބާރާތުގެ ކޯ-ސްޕޮންސަރަކީ ޤައުމީ ޔުނިވަރސިޓީގެ ކުންފުނި ޔުނިވިޔަ ހޯލްޑިންގްސް އެވެ. ސަޕޯޓިންގ ޕާޓްނަރުންނަކީ މޯލްޑިވްސް ޓްރޭޑިންގ އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ)، މެންހަޓަން ބިޒްނަސް ހޮޓެލް، އޮންލައިން ނިއުސް ޢަދަދު، މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓް އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފް.އޭ.އެމް) އެވެ. ސްޕޯޓްސް ޕާޓްނަރަކީ ސޮނީ ސްޕޯޓްސް އެވެ. މުބާރާތުގެ ޑިޖިޓަލް ޕާޓްނަރަކީ ދިރާގު ކަމަށްވާއިރު، ކިޓް ޕާޓްނަރަކީ ޕްރިންޓް ކޯ އެވެ. އަދި ޕްރިންޓިންގ ޕާޓްނަރަކީ އެމް ސެވަން އެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ސާނަވީ ދާއިރާގައި ބާއްވާ އެންމެ ބޮޑު ކުޅިވަރު ޙަރަކާތެވެ. މި މުބާރާތް ރާވާ އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިންނެވެ. މި އަހަރު މި ބާއްވަނީ މީގެ 8 ވަނަ މުބާރާތެވެ. މިއަހަރުގެ މުބާރާތް މި ބޭއްވެނީ ކޮވިޑް-19ގެ ޢާލަމީ ވަބާއާއެކު 2 އަހަރުގެ މެދުކެނޑުމަކަށްފަހުއެވެ. އެންމެ ފަހުން 2019 ވަނަ އަހަރު ބޭއްވި މުބާރާތުގެ ފިރިހެން ޑިވިޝަނުގެ ޗެމްޕިއަނަކީ އެވިޑް ކޮލެޖެވެ. އަދި އަންހެން ޑިވިޝަނުގެ ޗެމްޕިއަނަކީ އެމް.އައި ކޮލެޖެވެ. މި މުބާރާތް އެންމެ ފުރަތަމަ ބޭއްވުނީ 2013 ވަނަ އަހަރެވެ. އެއަށްފަހު 2019 ވަނަ އަހަރާ ހަމައަށް މެދުކެނޑުމެއްނެތި ކޮންމެ އަހަރަކު މި މުބާރާތް ކުރިއަށް ގެންދެވިފައިވެއެވެ. މުބާރާތުގައި އަންހެން ޑިވިޝަން ތަޢާރަފު ކުރެވުނީ 2018 ވަނަ އަހަރެވެ. މި މުބާރާތުގެ އެންމެ ކާމިޔާބު ޓީމަކީ މުބާރާތުގެ ފިރިހެން ޑިވިޝަނުގެ ތަށި 3 ފަހަރު ޙާޞިލުކޮށްފައިވާ އެމް.އެން.ޔޫ ބިޒްނަސް ސްކޫލެވެ.
