ފެކަލްޓީ އޮފް އެޑިއުކޭޝަނަށް 2023 ވަނަ އަހަރުގެ ފުރަތަމަ ޓާރމަށް އަލަށް ގުޅުނު ދަރިވަރުންނަށް އޮރިއެންޓޭޝަން ބާއްވައިފިއެވެ.
2023 ވަނަ އަހަރު ފެބުރުވަރީ 12 ވަނަ ދުވަހު ގާތްގަނޑަކަށް 60 ދަރިވަރުންނާއެކު އެފް.އީ އޮޑިޓޯރިއަމްގައި ބޭއްވި މި އޮރިއެންޓޭޝަން ފަށާފައިވަނީ ޤުރުއާނުގެ ބަރަކާތުންނެވެ. ޤުރުއާން ކިޔެވީ ފެކަލްޓީ އޮފް އެޑިއުކޭޝަންގެ ދަރިވަރު އަޙްމަދު ނަޒީރެވެ. އަލަށް ގުޅުނު ދަރިވަރުންނަށް މަރުޙަބާ ދެންނެވީ ފެކަލްޓީގެ ލެކްޗަރަރއެއް ކަމުގައިވާ އިހުސާނާ ޝަރީފެވެ. އެއަށްފަހު ދަރިވަރުންނާ މުޚާތަބުކޮށް ވާހަކަދެއްކެވީ ފެކަލްޓީގެ ޑީން ވަސީމާ ފިކުރީއެވެ. މަރުޙަބާ ދެންނެވުމަށްފަހު ފެކަލްޓީއާ ގުޅޭ މަޢުލޫމާތާއި އެހެނިހެން މަޢުލޫމާތުތައް އިހުސާނާ މިސް ވަނީ ކުދިންނާ ހިއްސާކޮށްދީފައެވެ. މީގެ އިތުރުން ފެކަލްޓީގެ އެހެން ލެކްޗަރަރއެއް ކަމަށްވާ އަހްމަދު ހާޝިމް ވެސް ވަނީ ދަރިވަރުންނާ ވާހަކަދައްކަވައި ދަރިވަރުން ހިފަހައްޓަންޖެހޭ މިންގަނޑުތަކާއި އަދި މިނޫންވެސް މުހިންމު ވާހަކަތައް ފާހަގަކޮށްދީފައެވެ.
ލެކްޗަރަރއިންގެ ވާހަކަތަކަށް ފަހު ފެކަލްޓީ އޮފް އެޑިއުކޭޝަން ސްޓޫޑެންޓް އެސޯސިއޭޝަން (ފެސާ)ގައި ހަރަކާތްތެރިވާ ދަރިވަރު މުޙައްމަދު ނާބިތު އަޙްމަދު ވަނީ ފެސާއާއި ބެހޭ މަޢުލޫމާތު ދަރިވަރުންނަށް ފޯރުކޮށްދީފައެވެ. 2022 ވަނަ އަހަރު ފެސާއިން އިސްނަގައިގެން ރާވައި ހިންގި ހަރަކާތްތަކާއި ބައިވެރިވި ހަރަކާތްތަކުގެ އިތުރުން ދަރިވަރެއްގެ ގޮތުގައި ކުރެވުނު ތަޖުރިބާތައްވެސް ނާބިތު ވަނީ ޙިއްސާކޮށްފައެވެ. ޔުނިވަރސިޓީ ހަޔާތަކީ ހަމައެކަނި ކިޔެވުމުގެ މައްޗަށް ބިނާކުރެވިފައިވާ ކަމެއްކަމުގައި ނުހަދައި އިތުރު ހަރަކާތްތަކުގައި ބައިވެރިވުމަކީވެސް މުހިންމުކަމެއް ކަމުގައި ނާބިތު ފާހަގަ ކުރިއެވެ.
އޮރިއެންޓޭޝަން ނިމިގެންދިޔައީ ކެމްޕަހުގެ ކުޑަ ޓުއަރއަކަށް ފަހުގައެވެ.
