28 ފެބުރުވަރީ 2023 ވާ އަންގާރަ ދުވަހުގެ ރޭ އެމް.އެން.ޔޫ އެފް.އީ އޮޑިޓޯރިއަމް ގައި ސީ.އެފް.އެސް އާ އަލަށް ގުޅުނު ދަރިވަރުންނަށް މިއަހަރުގެ ފުރަތަމަ ”މެޖިކަލް ރޫކީސް ނައިޓް 2023″ ބޭއްވުމަށްޓަކައި ތަރަހައިން ވަނީ ތައްޔާރީތަކެއް ފަށާފައެވެ.
މި ހަރަކާތުގެ މައިގަނޑު މަޤުސަދަކީ މި އަހަރުގެ ފުރަތަމަ ސެމިސްޓަރުގައި ސީ.އެފް.އެސް އާ އަލަށް ގުޅުނު ދަރިވަރުންނަށް މަރުޙަބާ ކިޔުމެވެ. ހަމައެއާއެކު ކުޅިވަރުތަކަކާ އެކީ އެކުވެރި މަޖާ މާހައުލެއްގެ ތެރެއިން ސީ.އެފް.އެސް އަށް އަލަށް ގުޅުނު ދަރިވަރުންނާއި ތަރަހައިގެ އިސްވާރުންނާ ދެމެދު ގާތް ގުޅުމެއް އުފައްދާ އެކަކުއަނެކަކާ ދިމާވެ އެކުވެރިކަން ބަދަހިކުރުމެވެ.
މި ހަރަކާތުގައި އަލަށް ޔުނިވާސިޓީއަށް ގުޅުނު ދަރިވަރުންނަށް، ފެކަލްޓީއާ ގުޅޭގޮތުން މައުލޫމާތު ދިނުމާއި އެމް.އެން.ޔޫ.އެސް.ޔޫ އަދި ތަރަހަ އާއި ގުޅޭ ގޮތުން މައުލޫމާތު ދިނުން ފަދަ ކަންތައް ކުރެވިގެން ދާނެއެވެ. ހަމައެހެންމެ، ތަރަހައިގެ އިސްވާރަކަށްވުމުގެ ފުރުސަތު ވެސް ފަހިވެގެންދާނެއެވެ.
ނިމިދިޔަ 2022 ވަނަ އަހަރުގެ ފުރަތަމަ ސެމިސްޓަރ ގައި ތަރަހައިގެ ފަރާތުން “ވެލްކަމް ނައިޓް ވިތު ތަރަހަ” ގެ ނަމުގައި ހަރަކާތެއް ވަނީ ކުރިއަށް ގެންދެވިފައެވެ. އަދި 2 ވަނަ ސެމިސްޓަރގައި ސިއާ އާއި ތަރަހަ ގުޅިގެން ”ސިއާ–ތަރަހަ ވެލްކަމް ނައިޓް“ ގެ ނަމުގައި ހަރަކާތެއް ވަނީ ކުރިއަށް ގެންގޮސްފައެވެ.
ތަރަހައިގެ ފަރާތުން ސިލްސިލާ ގޮތެއްގައި ބޭއްވިގެންދާ މި ހަރަކާތް ކުރިއަށް ގެންދިއުމަށް ހަމަޖެހިފައިވަނީ ކުޑަ ބަދަލަކާ އެކުއެވެ. ތަރަހައިގެ އުންމީދަކީ މިފަދަ ހަރަކާތްތަކަށް ދަރިވަރުންގެ އެއްބާރުލުން ވީ އެންމެ ރަނގަޅަށް ލިބިގެން ދިއުމެވެ. މިއަހަރުގެ ފުރަތަމަ “މެޖިކަލް ރޫކީސް ނައިޓް” ކުރިއަށް ގެންދިއުމަށް ތައްޔާރީތައްވަމުން ދާއިރު ތަރަހައިގެ އަމާޒަކީ މި ހިނގަމުންދާ 2023 ވަނަ އަހަރަކީ ތަރަހަ އިތުރު ހަރުފަތަކަށް ގެންދާނެ އަހަރަކަށް ވެގެން ދިއުމެވެ.
