ދިވެހިރާއްޖޭގެ ޤައުމީ ޔުނިވަރސިޓީގެ ބިޒްނަސް ސްކޫލާ އަލަށް ގުޅުނު ދަރިވަރުންނަށް ހާއްސަކޮށްގެން ގާލާ ނައިޓެއް ބާއްވައިފިއެވެ.
މި ހަރަކާތް ކުރިއަށް ގެންގޮސްފައިވަނީ މިރޭ ބިޒްނަސް ސްކޫލްގެ ސެމިނަރ ރޫމްގައެވެ.
ބިޒްނަސް ސްކޫލް ދަރިވަރުންގެ އެސޯސިއޭޝަން (ބީ.އެސް.އެސް.އޭ) އިން ކުރިއަށް ގެންދިޔަ މި ގާލާ ނައިޓަކީ ކޮންމެ ސެމިސްޓަރެއްވެސް ފެށުމުގެ ކުރިން ހިންގާ މަރުހަބާ ކިޔުމުގެ އިވެންޓެކެވެ.
މީގެ އިތުރުން، ފެކަލްޓީއާ އަލަށް ގުޅުނު ދަރިވަރުންގެ މެދުގައި އެކުވެރިކަން އާލާކޮށް، އެކަކު އަނެކަކަށް ތަޢާރަފުވެ، ކިޔެވުމުގެ އިތުރުން ދަރިވަރުންގެ ހުނަރުތައް ދެނެގަތުމުގެ ޙަރަކާތްތައް މި އިވެންޓުގެ ތެރެއިން ކުރިއަށް ގެންދެއެވެ.
މިރޭގެ ގާލާ ނައިޓުގައި ތަފާތު ގިނަ ކުޅިވަރުތައް ކުރިއަށް ގެންގޮސްފައިވާއިރު، މުނިފޫހިފިލުވުމުގެ ޙަރަކާތްތައްވެސް ވަނީ ކުރިއަށް ގެންގޮސްފައެވެ.
މިރޭ ކުޅުނު ބައެއް ގޭމުތަކުގެ ތެރެއިން ޓްރެޜަރ ހަންޓުން މޮޅުވި ދަރިވަރަށް އިނާމެއްގެ ގޮތުގައި މޭރީބްރައުންގެ ކޫޕަނެއް ދީފައިވާއިރު، މިއީ ދަރިވަރުންގެ މެދުގައި އެއްބައެއްވަންތަކަން ގާއިމުކުރުމަށް ކުރެވޭ މަސައްކަތެއްކަން ފާހަގަކޮށްލެވެއެވެ.
ބިޒްނަސް ސްކޫލް ދަރިވަރުންގެ އެސޯސިއޭޝަންގެ ރައީސް މިޝަލް މޫސާ ބުނީ، އަލަށް ފެކަލްޓީއާ ގުޅުނު ދަރިވަރުން ފެކަލްޓީގެ އައު ލީޑަރުންގެ ގޮތުގައި ފެނިގެން ދިއުމަކީ ކުރެވޭ އުންމީދެއް ކަމަށެވެ.
”މިރޭ މި އިވެންޓުގައި ބައިވެރިވި ދަރިވަރުންނަކީ ދަރިވަރުންގެ ޔޫނިއަންގެ ހަރުދަނާ ލީޑަރުންނަށް ވާނެ ބައެއްކަން ޔަގީން. އަޅުގަނޑުމެން މަސައްކަތްކުރަނީ އެ އަޒުމުގައި“ މިޝަލް ބުންޏެވެ.
މިރޭގެ އިވެންޓުގެ ތެރެއިން ބިޒްނަސް ސްކޫލްގެ ލީޑަރުންގެ ގްރޫޕަށާއި، ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ލީޑަރުންގެ ގްރޫޕާ ގުޅެން ބޭނުންވާ ދަރިވަރުންނަށް އެ ފުރުސަތު ވަނީ ފަހިކޮށްދެވިފައެވެ.
ބިޒްނަސް ސްކޫލް ދަރިވަރުންގެ އެސޯސިއޭޝަނަކީ ޤައުމީ ޔުނިވަރސިޓީގެ ބިޒްނަސް ސްކޫލުގައި ޤާއިމުކޮށްފައިވާ ގޮތްޕެކެވެ. މި ގޮފިން އިންތިޒާމުކޮށްގެން އައު ލީޑަރުންނަށް ޚާއްސަ ދަތުރެއް މާދަމާ ބޭއްވުމަށް ވަނީ ނިންމާފައެވެ.
