އެފް.އެޗް.ޓީ.އެސް ގައި ތައުލީމު ހާސިލް ކުރަމުން އަންނަ ދަރިވަރުންނަށް ހާއްސަކޮށް ސޮސައިޓީ ފޯރ ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (ޝެޓްސް) އިން އިންތިޒާމްކޮށްގެން ކުރިއަށްގެންދާ ޝެޓްސް 3ވީ3 ފުޓްސަލް މުބާރާތުގައި ބައިވެރި ވުމުގެ ފުރުސަތު ހުޅުވާލައިފިއެވެ.
މި މަހުގެ 13 ވަނަ ދުވަހުން ފެށިގެން 15 ވަނަ ދުވަހާ ހަމަޔަށް އެމް.އެން.ޔޫ ގެ ޕީއީ ހޯލްގައި ކުރިޔަށް ގެންދިޔުމަށް ހަމަޖެހިފައިވާ މި މުބާރާތަށް ދަރިވަރުންގެ ފަރާތުން ބޮޑު ތަރުހީބެއް ލިބިގެން ދާނެ ކަމަށް ބެލެވެއެވެ.
މި މުބާރާތަކީ ޝެޓްސްގެ އިސްވާރުންގެ މެދުގައި އެއްބައިވަންތަކަން އާލާކޮށް، ކުރިޔަށް އޮތް އެމް.އެން.ޔޫ.އެސް.ޔޫ ފުޓްސަލް ފިއެސްޓާގައި އެފް.އެޗް.ޓީ.އެސްގެ އަންހެން އަދި ފިރިހެން ޓީމަށް ކުޅެން ޝައުގުވެރިވާ ކުދިންގެ ހުނަރު ކުރިއެރުވުމުގެ މަގުސަދުގައި ޝެޓްސް އިން ބާއްވާ މުބާރާތެކެވެ.
ނިމިދިޔަ 2022 ވަނަ އަހަރުވެސް ޝެޓްސް އިން ވަނީ 3 ވީ 3 ފުޓްސަލް ޓޯރނަމެންޓެއް ކުރިއަށް ގެންގޮސްފައެވެ. މާފަންނު ޓާފުދަނޑުގައި ކުރިއަށް ގެންދެވުނު މުބާރާތުގެ ފިރިހެން ޑިވިޝަނުގައި ޖުމުލަ 9 ޓީމް ވަނީ ވާދަ ކޮށްފައެވެ.
ކުރީ އަހަރު ތަކެކޭވެސް އެއްފަދައިން މި އަހަރުގެ މުބާރާތުގައި އެފް.އެޗް.ޓީ.އެސްގެ ޓީމުތަކުގެ އިތުރަށް އެމް.އެން.ޔޫ.އެސް.ޔޫ ގެ ހިންގާ ކޮމެޓީއަށް ވަނީ ޓީމުތައް ބައިވެރި ކުރުމުގެ ފުރުސަތު ދީފައެވެ. އެހެންކަމުން މުބާރާތުގެ ފޯރި ގަދަވާނެ ކަމަށް ބެލެވެއެވެ.
މުބާރާތުގައި ބައިވެރިވުމުގެ ސުންގަޑި އަކީ 10 ސެޕްޓެންބަރު 2023 ވާ އާދިއްތަ ދުވަހުގެ ރޭގަނޑު 23:30 އެވެ. މުބާރާތުގައި ބައިވެރިވުމަށް ފުރިހަމަ ކުރަންޖެހޭ ފޯމު ވަނީ ޝެޓްސްގެ އެކި ސޯޝަލް މީޑިއާ ޕްލެޓް ފޯމްތަކުގައި ހިއްސާ ކުރެވިފައެވެ.
