ބިޒްނަސް ސްކޫލް ސްޓޫޑެންޓް އެސޯސިއޭޝަން (ބީ.އެސް.އެސް.އޭގެ) ޙަރަކާތެއް ކަމަށްވާ ބިޒްނަސް ސްކޫލް ނައިޓް (ބީ.އެސް ނައިޓް) ކާމިޔާބުކަމާއެކީ ނިންމާލައިފި އެވެ.
އޮކްޓޯބަރު 20 ވަނަ ދުވަހުގެ ރޭ އެމް.އެން.ޔޫ ބިޒްނަސް ސްކޫލްގެ އޮޑިޓޯރިއަމްގައި ބޭއްވި މި ޙަރަކާތުގެ މަޤުސަދަކީ ދަރިވަރުންގެ ހުނަރުތައް ދައްކައިލުމުގެ މަންސައެއް ފަހިކޮށްދިނުމެވެ.
މި ހަރަކާތުގައި އެމް.އެން.ޔޫ.އެސް.ޔޫގެ ގޮފިތަކުގެ ފަރާތުން ގިނަ އައިޓަމްތައް ހުށަހަޅާފައިވާއިރު، ދަރިވަރުންގެ ހުނަރު ވަނީ މީގެ ތެރެއިން ފެނިގެން ގޮސްފައެވެ. ޖުމުލަ 16 އައިޓަމް ރޭގެ ޝޯވގައި ހުށަހަޅާފައިވާއިރު، ބޮޑުބެރުގެ ޙަރަކާތްތައްވެސް ވަނީ ކުރިއަށް ގެންގޮސްފައެވެ.
ރޭގެ އިވެންޓުގައި ބިޒްނަސް ސްކޫލުން އަބަދުވެސް ކުރިއަށްގެންދާ ”މިސްޓަރ ބީ.އެސް“ އަދި ”މިސް ބީ.އެސް“ވެސް ވަނީ ހޮވާފައެވެ. މިސްޓަރ ބީ.އެސްގެ ގޮތުގައި ބީ.އެސް.އެސް.އޭގެ ކުރީގެ މީޑިއާ ކޯޑިނޭޓަރު ހުސައިން ރާއިފް ހޮވިފައިވާއިރު، މިސް ބީ.އެސްއަކަށް ހޮވިފައިވަނީ ބީ.އެސް.އެސް.އޭގެ މިހާރުގެ ސެކްރެޓަރީ ޖަންނަތު ޝަރީފެވެ.
ބީ.އެސް.އެސް.އޭގެ ރައީސް އިބްރާހިމް މިޝްއަލް މޫސާ ވިދާޅުވީ، ރޭގެ ޝޯވގައި ބައިވެރިވި ދަރިވަރުންގެ ފަރާތުން ފެނިގެން ދިޔައީ ހުނަރުވެރިކަމުން ފުރިގެންވާ އައިޓަމްތައް ކަމަށެވެ. އަދި އިވެންޓު ނިމިގެން ދިޔައީ ވަރަށްވެސް ކާމިޔާބުކަމާއެކީކަން އޭނާ ފާހަގަކުރިއެވެ.
”ރޭގެ ޝޯވ ކުރިއަށް ދިޔައިރު އޮޑިޓޯރިއަމްގެ ވަރަށް ބޮޑު ބައި އޮތީ ފުރާލާފަ. އިވެންޓް ވަރަށް ކާމިޔާބު. ބަލަން އައިސް ތިބި އެންމެންވެސް މެދުނުކެނޑި ދިޔައީ ތަރުހީބުދެމުން“ މިޝްއަލް ވިދާޅުވި އެވެ.
ބީ.އެސް.އެސް.އޭ އަކީ އެމް.އެން.ޔޫ ބިޒްނަސް ސްކޫލުގައި ގާއިމުކުރެވިފައިވާ ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަންގެ ގޮތްޕެވެ. ބީ.އެސް.އެސް.އޭއިން ވަނީ ސެންޓަރ ފޮރ ފައުންޑޭޝަން ސްޓަޑީޒްގެ ގޮފި ތަރަހަ އާ ގުޅިިގެން ފުޓްސަލް މުބާރާތެއް ބޭއްވުމަށްވެސް އިޢުލާންކޮށްފައެވެ. މި މުބާރާތް އޮތީ 27 އަދި 28 އޮކްޓޫބަރުގައެވެ.
