2024 ވަނަ އަހަރުގެ ފުރަތަމަ ޓާރމުގައި ފެކަލްޓީ އޮފް އެޑިއުކޭޝަން (އެފް.އީ) އަށް އަލަށް ގުޅުނު ދަރިވަރުންނަށް އޮރިއެންޓޭޝަން ބާއްވައިފިއެވެ.
ފެބްރުއަރީ 8 ވަނަ ދުވަހު އެފް.އީ އޮޑިޓޯރިއަމްގައި ބޭއްވި މި އޮރިއެންޓޭޝަންގައި ގާތްގަނޑަކަށް 50 ވަރަކަށް ދަރިވަރުން ބައިވެރިވެފައިވެއެވެ. ކީރިތި ޤުރުއާނުގެ ބަރަކާތުން މި ރަސްމިއްޔާތު ފައްޓަވައި ދެޢްވީ ( ބެޗެލާ އޮފް ޓީޗިން ޕްރައިމަރީ އިސްލާމް/ގުރުއާން ޖޫން 2022 ގެ ބެޗް)ގެ ދަރިވަރު ތަސްނީމް ރަޝީދެވެ.
އެއަށްފަހު ފެކަލްޓީގެ ޑީން ނާދިޔާ އަހްމަދު ދަރިވަރުންނަށް މުޚާތަބު ކުރެއްވިއެވެ. ޑީންގެ ވާހަކަ ފުޅުގައި ޔުނިވާސިޓީގެ އާންމު ގަވާއިދު ތަކުގެ މުހިންމު ކަމަށް އަލި އަޅުވާލައިފައިވެއެވެ.
އަދި އެއަށްފަހު ފެސާގެ ނިމިދިޔަ ދައުރުގެ ރައީސް ނާބިތު އަހްމަދު ވެސް ވަނީ އަލަށް ގުޅުނު ދަރިވަރުންނާ މުޚާތަބު ކުރައްވައި، މަރުހަބާ ދަންނަވާފައެވެ.
އެއަށްފަހު ދަރިވަރުންނާ ގުޅޭ އެހެނިހެން މަޢުލޫމާތު ޙިއްސާކޮށްފައިވަނީ ފެކަލްޓީގެ އެހެން ލެކްޗަރަރއެއް ކަމުގައިވާ މައިމޫނާ އާދަމްއެވެ.
އަދި އެފް.އީގެ ލެކްޗަރާ މުހައްމަދު ރިޔާޒް ދަރިވަރުންނާ މުޚާތަބު ކުރެއްވިއެވެ. ލެކްޗަރާގެ ވާހަކަފުޅުގައި ޔުނިވަރސިޓީގެ މުހިއްމު ގަވާއިދު ތަކަކަށް އަލި އަޅުވާލައްވައި އެ ގަވާއިދު ތަކަކަށް ހުރުމަތްތެރިކޮށް ހިތުމުގެ މުހިއްމުކަން ވަނީ ދަރިވަރުންނަށް ހަނދާން ކޮއްދެއްވާފައެވެ.
ލެކްޗަރަރގެ ވާހަކަތަކަށް ފަހު ފެކަލްޓީ އޮފް އެޑިއުކޭޝަން ސްޓޫޑެންޓް އެސޯސިއޭޝަން (ފެސާ) ގެ ސެކްރެޓެރީ އަހްމަދު އީމާން އަދި ފެސާގެ މީޑިއާކޯޑިނޭޓަރ ރާޔާ މުހައްމަދު ޝާހިދު ވެސް ވަނީ ފެސާއާ ބެހޭ މަޢުލޫމާތު ދަރިވަރުންނާ ޙިއްސާކޮށްފައެވެ. އޭގެތެރޭގައި ނިމިގެން ދިޔަ ސެމިސްޓަރގައި ފެސާއިން ރާވާ ހިންގި ހަރަކާތްތަކާއި، ބައިވެރިވި ހަރަކާތްތަކުގެ އިތުރުން ލިބުނު ކާމިޔާބީތައް ވެސް ފާހަގަކޮށްފައިވެއެވެ. މީގެ އިތުރުން މި ފެށޭ ސެމިސްޓަރއަށް ރާވާފައިވާ ބައެއް ހަރަކާތްތަކާ ގުޅޭ މައުލީމާތުތައް ވެސް ވަނީ ހިއްސާކޮށްފައެވެ.
އޮރިއެންޓޭޝަން ސެޝަން ނިމިގެންދިޔައީ ކެމްޕަހުގެ ކުޑަ ޓުއަރއަކަށް ފަހުގައެވެ.
