ސޮސައިޓީ ފޯރ ހޮސްޕިޓާލިޓީ އެންޑު ޓުއަރިޒަމް ސްޓަޑީޒް (ޝެޓްސް) އިން އިސްނަގައިގެން 2024 ވަނަ އަހަރު ފެކަލްޓީ އޮފް ހޮސްޕިޓާލިޓީ އެންޑު ޓޫރިޒަމް ސްޓަޑީޒް (އެފް.އެޗް.ޓީ.އެސް) އަށް އަލަށް ގުޅުނު ދަރިވަރުންނަށް ހާއްސަކޮށްގެން ބޭއްވި މި އަހަރުގެ ފުރަތަމަ ޓަރމުގެ ވެލްކަމް ނައިޓް ކާމިޔާބު ކަމާއެކު ނިންމާލައިފިއެވެ.
ފެބްރުވަރީ 17 ވީ ހޮނިހިރު ދުވަހުގެ ރޭ އެމް.އެން.ޔޫ ޕީ.އީ ހޯލްގައި ކުރިޔަށް ގެންދެވުނު މި ހަރަކާތުގައި އެފް.އެޗް.ޓީ.އެސްގެ ކޯސްތަކަށް އަލަށް ގުޅުނު 20 ވުރެ ގިނަ ދަރިވަރުން ވަނީ ބައިވެރިވެފައެވެ.
މި ފަހަރުގެ ވެލްކަމް ނައިޓުގައި ބައިވެރިވުމަށް އެފް.އެޗް.ޓީ.އެސްގެ ކޯސްތަކާ އަލަށް ގުޅުނު ދަރިވަރުންގެ ތެރެއިން 60 ވުރެ ގިނަ ދަރިވަރުން ނަން ނޯޓުކޮށްފައި ވީނަމަވެސް، ހަރަކާތް ފެށެން ކައިރިވެފައިވަނިކޮން ކުއްލިއަކަށް މޫސުން ގޯސްވެ، ބޯކޮށް ވާރޭ ވެހުމުން ގިނަ ކުދިންނަށް ވަނީ ބައިވެރިވެވޭ ގޮތް ނުވެފައެވެ.
ޝެޓްސްގެ ހިންގާ ކޮމެޓީއިން އިސްނަގައިގެން، ޝެޓްސްގެ އިސްވާރުންގެ އެހީތެރިކަމާއެކު ކުރިޔަށް ގެންދެވުނު މި ހަރަކާތުގެ ބޭނުމަކީ އެފް.އެޗް.ޓީ.އެސް އަށް މި ޓަރމުގައި ގުޅުނު ދަރިވަރުންނަށް މަރުހަބާކިޔުމުވެ. އަދި ޝެޓްސްގެ ހަރަކާތްތަކާ އަލަށް ގުޅެން ބޭނުންވާ އިސްވާރުންނަށް އެފުރުސަތު ތަނަވަސް ކޮށްދިނުމެވެ.
އެކުވެރި މާހައުލެއްގައި ކުރިޔަށް ގެންދެވުނު މި ހަރަކާތުގައި، ޝެޓްސްގެ ހިންގާ ކޮމެޓީ އަދި ކުރީ ދައުރުތަކުގެ ހިންގާ ކޮމެޓީގެ މެމްބަރުން ތައާރަފު ވުމުގެ އިތުރަށް އެމް.އެން.ޔޫ.އެސް.ޔޫގެ ހިންގާ ކޮމެޓީގެ މެމްބަރުންވެސް ވަނީ ދަރިވަރުންނާ މުހާތަބުކޮށް ވާހަކަ ދައްކަވާފައެވެ. ގިނަ ގޭމްތަކަކާއިއެކު އަދިވެސް ތަފާތު އިތުރުހަރަކާތްތަކާއި އެކު ކުރިޔަށްގެންދެވުނު މި ހަރަކާތުގައި ޝެޓްސްގެ އިސްވާރުންގެ ފަރާތުން ވަނީ މުނިފޫހި ފިލުވުމުގެ ގިނަ އައިޓަމްތަކެއް ހުށަހަޅާދީފައެވެ. މި ހަރަކާތްތަކަށް ބައިވެރިންގެ ފަރާތުން ވަނީ ހޫނު ތަރުހީބެއް ލިބިގެން ގޮސްފައެވެ.
ވެލްކަމް ނައިޓާއެކު ޝެޓްސް އަށް އަލަށް ގުޅެން ޝައުގުވެރިވި އިސްވާރުންނަށް އެފުރުސަތު ލިބިގެން ގޮސްފައިވާއިރު، ޝެޓްސްގެ އިސްވާރުންގެ ޓީމާއެކު އަލަށް ގުޅުނު އިސްވާރުންނަށް ބާއްވާ ހާއްސަ ”ޝެޓްސް ނިއު ލީޑާސް މީޓިންގް“ މި މަހުގެ 21 ވާ ބުދަ ދުވަހު ބޭއްވުމަށް ވަނީ ތާވަލު ކުރެވިފައެވެ.
