2017 ވަނައަހަރުން ފެށިގެން، ސިލްސިލާގޮތެއްގައި ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ގޮފި ސޮސައިޓީ އޮފް ޝަރީޢާ އެންޑް ލޯއިން ބާއްވާ ފުޓްސަލް މުބާރާތް ”އިޒްހާމް މެމޯރިއަލް ކަޕް 2024“ ގެ ގުރުއަތުލުން ކުރިއަށް ގެންގޮސްފިއެވެ.
އެގޮތުން، 4 އޮކްޓޯބަރ 2024 ގައި ބޭއްވުމަށް ހަމަޖެހިފައިވާ މި މުބާރާތުގެ ގުރުލުން ބާއްވާފައިވަނީ 1 އޮކްޓޯބަރ 2024 ވީ އަންގާރަ ދުވަހުގެ ރޭ، ދިވެހިރާއްޖޭގެ ޤައުމީ ޔުނިވަރސިޓީގެ މައި ކެމްޕަހުގައެވެ. ގުރުއަތު ނެގުނީ، މުބާރާތުގައި ބައިވެރިވާ އަންހެން 4 ޓީމާއި، ފިރިހެން 6 ޓީމާއި ދެމެދުއެވެ. ފިރިހެން ޑިވިޝަނުގެ 6 ޓީމު ކުޅުމަށް ހަމަޖެހިފައިވަނީ 2 ގްރޫޕްއަކަށް ބަހާލައިގެން، ގްރޫޕް ސްޓޭޖްގެ ގޮތުގައެވެ. އަދި އަންހެން ޑިވިޝަނުގެ މެޗުތައް ކުޅުމަށް ހަމަޖެހިފައިވަނީ ލީގު ގޮތަށެވެ.
ގުރުލުމުގެ ރަސްމިއްޔާތައް ފަހު، މިމުބާރާތުގައި ބައިވެރިވާ ޓީމުތަކުގެ މެނޭޖަރުންނަށް، ވަނީ މުބާރާތުގެ ޢާންމު ޤަވާޢިދާއި، މުބާރާތުގެ މެޗުތާވަލާއި، އަދި މުބާރާތް ކުރިޔަށް ދާއިރު، ސަމާލުކަން ދޭންވީ ކަންތައްތައް ވެސް ހިއްސާކޮށްފައެވެ.
މި 1 ޑޭ ފުޓްސަލް މުބާރާތް އޮންނާނީ، ހުޅުމާލެ ރެޑްބުލް ފުޓްސަލް ދަނޑުގައެވެ.
މި މުބާރާތަކީ ފެކަލްޓީ ދަރިވަރުންގެ މެދުގައި އެކުވެރިކަމާއި ކުޅިވަރުގެ ރޫޙު އާލާކުރުމުގެ މަޤްސަދުގައި ކުރިއަށް ގެންދާ މުބާރާތެކެވެ.
