ދިވެހިރާއްޖޭގެ ޖުމްހޫރިީ ފާހަގަކުރުމާއި، ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަނުން ދިވެހިރާއްޖޭގެ ޤައުމީ ޔުނިވަރސިޓީގެ ހިތަދޫ ކެމްޕަހާ، އައްޑޫ ސިޓީ ކައުންސިލް އަދި ދިވެހިބަހުގެ އެކެޑަމީ އާއި ގުޅިގެން އައްޑޫ ސިޓީގެ ސްކޫލްތަކަށް ކުރިއަށް ގެންދިޔަ ”އައްޑޫ ބޮޑު ފަނޑިޔާރު ތަކުރުފާނުގެ ހަނދާނީ ވާދައިގެ ތަށްޓަށް ބާއްވާ ވާހަކަދެއްކުމުގެ މުބާރާތް 2024“ ކާމިޔާބުކަމާއެކު ނިންމާލައިފިއެވެ.
ނޮވެންބަރު މަހުގެ 7-11 އަށް ކުރިއަށް ދިޔަ މި މުބާރާތް ރާވާ އިންތިޒާމްކުރުމުގައި އިސްކޮށް ޙަރަކާތްތެރިވީ ސޮސައިޓީ އޮފް ޝަރީޢާ އެންޑް ލޯ (އެސް.އެސް.އެލް) އަދި ދޮންދީނިއެވެ. މި މުބާރާތުގެ ނަތީޖާ ފާޅުކުރުން ކުރިއަށް ގެންގޮސްފައިވަނީ ނޮވެމްބަރ 11 ވަނަ ދުވަހު ދިވެހިރާއްޖޭގެ ޖުމްހޫރީ ދުވަސް ފާހަގަކުރުމަށް އައްޑޫ ސިޓީ ކައުންސިލާއި ޤައުމީ ޔުނިވަރސިޓީގެ ހިތަދޫ ކެމްޕަހާއި ސޮސައިޓީ އޮފް ޝަރީޢާ އެންޑް ލޯ އަދި ދޮންދީނިން ބޭއްވި ޚާއްސަ ރަސްމިއްޔާތުގައެވެ.
މި މުބާރާތުގައި 6 ސްކޫލަކުން 64 ދަރިވަރުން ބައިވެރިވެފައި ވާއިރު 15 އަހަރުން ދަށުގެ 1 ވަނަ ސްކޫލަކަށް ހިތަދޫ ސްކޫލް އަދި 15 އަހަރުން މަތީގެ 1 ވަނަ ސްކޫލަކަށް އައްޑޫ ހައި ސްކޫލް ވަނީ ހޮވިފައެވެ. އަދި ދެ އުމުރުފުރާގެވެސް 2 ވަނަ ޝަރަފުއްދީން ސްކޫލް ހޯދި އިރު 15 އަހަރުން ދަށުގެ 3 ވަނަ ފޭދޫ ސްކޫލް އަދި 15 އަހަރުން މަތީގެ 3 ވަނަ ހިތަދޫ ސްކޫލުން ވަނީ ހޯދާފައެވެ.
ހަމަ މިއާއެކު، 15 ދަށުގެ އުމުރުފުރާގެ 3 ވަނަ އާމިނަތު އަލްވީ އިމްތިޔާޒު، ޝަރަފުއްދީން ސްކޫލް ހޯދާފައިވާއިރު 2 ވަނަ ހޯދާފައިވަނީ މުޙައްމަދު ނަޒާން ނާޒިރު، ހިތަދޫ ސްކޫލްއެވެ. އަދި 1 ވަނަ ހޯދާފައިވަނީ ޔޫނުސް ޢިމްރާން ޞާލިޙް، ހިތަދޫ ސްކޫލްއެވެ.
15 އަހަރުން މަތީގެ 3 ވަނަ ފާޠިމަތު އައިކާ ޝަފާޒް، ހިތަދޫ ސްކޫލް ހޯދިއިރު 2 ވަނަ ހޯދާފައިވަނީ އިބްރާހީމް އަލްސަން އާސިމް، އައްޑޫ ހައި ސްކޫލްއެވެ. އަދި މި އުމުރުފުރާގެ 1 ވަނަ ހޯދާފައިވަނީ ރާހީ އަޙްމަދު ސަޢީދު، އައްޑޫ ހައި ސްކޫލް އެވެ.
މި މުބާރާތް ފުރިހަމަކަމާއެކު ނިންމާލުމުގައި ގިނަ ފަރާތްތަކެއްގެ އެއްބާރުލުމާއި އެހީތެރިކަން ވަނީ ލިބިގެން ގޮސްފައެވެ. އެގޮތުން މުބާރާތުގެ މެއިން ސްޕޮންސަރ އަކީ ސްޓެލްކޯއެވެ. އަދި މި މުބާރާތަށް ދިރާގު، ފާސްޓް ފުޑް، އަބުހަރީ ގްރޭންޑް، އަރޓް ވަރލްޑް، އީހަބް، ދުވެލި، އައިލެންޑް ބެވެރެޖަސް، ނޫރުލް އިސްލާމް އަދި ކޮންޓްރޯލް ޕީ އިން ވަނީ ސްޕޮންސަރޝިޕް ދެއްވާފައެވެ.
ޔޫނިއަންގެ އަމާޒަކީ މިމުބާރާތް ސިލްސިލާ ގޮތެއްގައި ކުރިއަށްގެންދިޔުމެވެ. އަދި އަންނަ އަހަރުގެ މުބާރާތް މިއަހަރަށްވުރެ ފުރިހަމަކަމާއެކު ކުރިއަށްގެންދިޔުމެވެ.
