ޓީމް އިވެންޓްގެ ޗެމްޕިއަންކަން އެފް.އޭ އަށް!

ހަވަނަ އެމް.އެން.ޔޫ.އެސް.ޔޫ ޝެޓްސް ކެރަމް މުބާރާތުގެ ޓީމް އިވެންޓްގެ ޗެމްޕިއަންކަން ފެކަލްޓީ އޮފް އަރޓްސް (އެފް.އޭ) އިން ހޯދައިފިއެވެ.

މާރިޗު މަހުގެ 11 އިން 13 އަށް އެފް.އެޗް.ޓީ.އެސްގެ ޓްރައިނިންގް ރެސްޓޯރެންޓްގައި ކުރިޔަށް ގެންދެވުނު މި މުބާރާތުގެ ޓީމް އިވެންޓްގައި 7 ޓީމް ވަނީ ވާދަކޮށްފައެވެ. އަދި މުބާރާތުގެ ސިންގަލް އިވެންޓްގެ ފިރިހެން ޑިވިޝަނުގައި 32 ކުޅުންތެރިން ވާދަކުރި އިރު އަންހެން ޑިވިޝަނުގައި 22 ކުޅުންތެރިން ވަނީ ވާދަކޮށްފައެވެ. ޓީމް އިވެންޓާއި ސިންގަލްސް އިވެންޓް އެއްކޮށް ޖުމުލަ 70 އަށް ވުރެ ގިނަ ކުޅުންތެރިން ވަނީ މުބާރާތުގައި ބައިވެރިވެ މެޗުތަކުގައި ކުޅެފައެވެ.

މުބާރާތުގެ ސިންގަލް އިވެންޓްގެ އަންހެން ޑިވިޝަނުގެ ޗެމްޕިއަންކަން ޖެހިޖެހިގެން ދެވަނަ ފަހަރަށް ސީ.އެފް.އެސްގެ ޝައުފާ ޝަފީއު ޖައުހަރީ ހޯދިއިރު ދެވަނަ ހޯދައިފައިވަނީ އެފް.އޭ ގެ މާޝް މުހައްމަދު ނަސީމެވެ. އަދި ތިންވަނަ ހޯދާފައިވަނީ އެމް.އެން.ޔޫ.ބީ.އެސްގެ ދަރިވަރު ނައުރާ ހަސަން އެވެ.

ސިންގަލް އިވެންޓްގެ ފިރިހެން ޑިވިޝަންގެ ޗެމްޕިއަންކަން ހަތަރު ވަނަ ފަހަރަށް އެފް.އޭ ގެ އާދަމް ޝާއިއު ހޯދިއިރު ދެވަނަ ހޯދާފައިވަނީ އެފް.އެސް.އެލް ގެ މުހައްމަދު އައިޝް މުސްތަފާއެވެ. އަދި ތިންވަނަ ހާސިލް ކޮށްފައިވަނީ އެފް.އެޗް.ޓީ.އެސް.ގެ މުހައްމަދު ޒައިން އާދަމްއެވެ.

މުބާރާތުގެ ޓީމް އިވެންޓްގެ ފައިނަލް މެޗްގައި އެފް.އޭ އިން ވަނީ 3 ގޭމް 2 ގޭމް އިން ސީ.އެފް.އެސް ބަލިކޮށްފައެވެ. ފައިނަލް މެޗުގެ ވިމެންސް ސިންގަލް އަދި ވިމެންސް ޑަބަލްސް ގޭމް އެސް.އިން އިން ކާމިޔާބުކުރި އިރު އެފް.އޭ އިން ވަނީ މެންސް ސިންގަލްސް، މެންސް ޑަބަލްސް އަދި މިކްސް ޑަބަލްސް ގޭމް ކާމިޔާބުކޮށްފައެވެ.

މި އަހަރުގެ މުބާރާތުގައި އުއްމީދީ ގިނަ ކުޅުންތެރިންތަކެއް ފެނިގެން ދިޔައިރު މި އަހަރުގެ މުބާރާތްވެސް ކުރިޔަށް ގެންދިޔުމަށް ބޭނުންވާ ބައެއް ސާމާނާއި، އެހެނިހެން އެހީތެރިކަން ކެރަމް އެސޯސިއޭޝަން އޮފް މޯލްޑިވުސްގެ ފަރާތުން ވަނީ ލިބިގެންގޮސްފައެވެ.