މި އަހަރުގެ ފުރަތަމަ ސެމިސްޓާގައި ބިޒްނަޒް ސްކޫލް ސްޓޫޑެންޓް އެސޯސިއޭޝަން (ބީއެސްއެސްއޭ)އިން އިންތިޒާމު ކޮށްގެން އެމް.އެން.ޔޫ ބިޒްނަސް ސުކޫލަށް އަލަށް ގުޅުނު ދަރިވަރުންނާއި، ބީ.އެސް.އެސް.އޭއަށް އަލަށް ގުޅުނު އިސްވާރުންނަށް ޚާއްސަ ކޮށްގެން ބޭއްވި ލީޑާރސް ޖޭމް ކާމިޔާބުކަމާއިއެކު ނިންމާލައިފިއެވެ.
ފެބްރުއަރީ 13 ވަނަ ދުވަހު އެމްއެންޔޫ ބިޒްނަސް ސުކޫލުގެ އޮޑިޓޯރިއަމްގައި ކުރިއަށް ގެންދެވުނު މި ޙަރަކާތުގައި 30 އަށް ވުރެ ގިނަ އައު ދަރިވަރުންނާއި އިސްވާރުން ވަނީ ބައިވެރިވެފައެވެ. މި ހަރަކާތުގެ މައިގަނޑު މަޤްޞަދަކީ އަލަށް ގުޅުނު ދަރިވަރުންނާއި މިހާރުގެ އިސްވާރުންގެ މެދުގައި އެކުވެރިކަން އާލާކޮށް، އެކަކު އަނެކަކަށް ތަޢާރަފުވެ، މަޖާ މާޙައުލެއްގައި ވަގުތު ހޭދަކޮށްލާ، ދަރިވަރުންގެ ހުނަރުތައް ދެނެގަތުމެވެ.
މި ޙަރަކާތުގައި ބައިވެރިވި އައު ދަރިވަރުންނަށް ވަނީ ބީއެސްއެސްއޭގެ 2025 ވަނަ އަހަރުގެ ހިންގާ ކޮމެޓީ މެމްބަރުންގެ ތަޢާރަފެއް ދީފައެވެ. މީގެ އިތުރުން، އަލަށް ގުޅުނު ދަރިވަރުންނާއި މިހާރުގެ އިސްވާރުން ގުޅިގެން ގިނަ ކުޅިވަރުތަކެއް ވެސް ވަނީ ކުރިއަށް ގެންގޮސްފައެވެ.
މި ޙަރަކާތުގައި ވާހަކަ ދައްކަވަމުން ބީއެސްއެސްއޭގެ 2025 ވަނަ އަހަރުގެ ރައީސް، އާދަމް ރާއިފް ވަނީ ހުރިހާ ދަރިވަރުންނަށް މަރުޙަބާ ކިޔާފައެވެ. އަދި ކުރިއަށް އޮތް ހަރަކާތްތަކުގައި ގިނަ އިސްވާރުން ފެނިގެންދާނެކަމުގެ އުންމީދު އޮތް ކަން ހާމަކޮއްފައެވެ.
މި ޙަރަކާތް ނިމިގެން ދިޔައީ ބީއެސްއެސްއޭއިން އިސްނަގައިގެން އިންތިޒާމުކޮށްފައިވާ މާހެފުމަކުންނެވެ. މާހެފުމުގައި ބީއެސްއެސްއޭގެ ކުރީގެ އިސްވާރުން ވެސް ވަނީ ބައިވެރިވެފައެވެ.
