އެމް.އެން.ޔޫ.އެސް.ޔޫ އިންޓަރ ފެކަލްޓީ ބަހުސް މުބާރާތް 2019 ގައި ފެކަލްޓީ އޮފް އާރޓްސް އިން ހޯދި ކާމިޔާބީގެ އަގުވަޒަން ކުރުމުގެ ގޮތުން އެފް.އޭ ގެ ބަހުސް ދެ ޓީމަށް ފެކަލްޓީގެ މުވައްޒަފުން ސިއާ އާއި ގުޅިގެން ކެއުމެއް ދީފިއެވެ.
މިފަހަރުގެ ބަހުސް މުބާރާތުގައި އެފް.އޭ ގެ ޓީމު އޭ އިން ވަނީ މުބާރާތުގެ 3 ވަނަ ހޯދާފައެވެ. އަދި ފައިނަލުގައި އެފް.އެލް.އައި.އެސް ގެ ދެ ޓީމު ވާދަ ކުރުމާ ގުޅިގެން، ދެވަނައަށް އެންމެ މޮޅު ފެކަލްޓީ އަކީ ފެކަލްޓީ އޮފް އާރޓްސް އެވެ. އަދި ހަމަ އެހެންމެ، އެފް.އޭ ގެ ޓީމު އޭ ކޮށްފައިވާ ތިން ބަހުސްގެ ތެރެއިން ދެ ބަހުސް އަކުން އެންމެ މޮޅު ބަހުސް ކުރުންތެރިޔަކަށް ހޮވިފައިވަނީ އެފް.އޭ ގެ ދެ ދަރިވަރުންނެވެ. އެއީ ފުރަތަަމަ ބަހުސުން ޙަފްސީ އަބްދުﷲ އަދި ދެވަނަ ބަހުސުން މުޙައްމަދު ރާއިދު ސަޢީދު އެވެ. މީގެ އިތުރުން މި ބަހުސް މުބާރާތުގެ އެންމެ މޮޅު 5 ބަހުސް ކުރުންތެރިންގެ ތެރޭގައިވެސް ރާއިދު ހިމެނިފައިވެއެވެ. އެހެންކަމުން ފަހުގެ ތާރީޚެއްގައި އެފް.އޭ ގެ ޓީމަކުން މިވަރުގެ ކާމިޔާބީއެއް ހޯދި މިއީ ފުރަތަަމަ ފަހަރެވެ.
ރޭގެ ވަގުތެއްގައި، ފެކަލްޓީ އޮފް އާރޓްސްގެ މުވައްޒަފުންގެ ފަރާތުން ދިން މި ކެއުން އިންތިޒާމް ކޮށްފައިވަނީ ސިއާގެ ފަރާތުންނެވެ. އެފް.އެޗް.ޓީ.އެސް ބިލްޑިންގުގެ ފަސްވަނަ ފަންގިފިލާގައި އޮތް މި ހަފްލާގައި ފެކަލްޓީ ގެ ޑީން، ލެކްޗަރަރސް އަދި އޮފީހުގެ މުވައްޒަފުން ބައިވެރިވެފައިވެއެވެ. އަދި އެފް.އޭ ގެ ބަހުސް ޓީމަށް ތަހުނިޔާ ކިޔައި، މިފަދަ ކަންކަމުގައި ފެކަލްޓީގެ ފަރާތުން އަބަދުވެސް އެއްބާރުލުން ލިބޭނެ ކަމުގައި ޑީން ވިދާޅުވިއެވެ. އަދި މީގެ އިތުރުން މިފަދަ ހުރިހާ އިތުރު ހަރަކާތްތަކެއްގައިވެސް އެފް.އޭ ގެ ޓީމެއް އަބަދުވެސް ބައިވެރިވުމަށް ޑީން އާއި ލެކްޗަރަރ އިން ބޭނުންވާ ކަމުގައިވެސް ވިދާޅުވިއެވެ. އެފް.އޭ ގެ ދަރިވަރުން އެފް.އޭ އަށް ރަން ވަނަތައް ޙާޞިލު ކޮށްދޭނެ ކަމަށް އުއްމީދު ކުރާކަމުގައި ވެސް ވިދާޅުވިއެވެ.
މި ޚަފްލާގައި އަންވަރު ސަރ އަށް ބަައިވެރި ނުވެވުނު ކަމުގައި ވިޔަސް ފޯނުން ގުޅައި ޓީމަށް މަރުޙަބާ އާއި ހިތްވަރު ދީފައިވާކަން ފާހަގަކުރަމެވެ. އެފް.އޭ އިން ބައިވެރިވާ ކޮންމެ ބަހުސް މުބާރާތެއްގައި ވެސް އެފް.އޭ ގެ ޓީމު ތައްޔާރު ކޮށްދިނުމަށް އަބަދުވެސް އެންމެ ކައިރީގައި ހުންނަ ބޭފުޅަކީ އަންވަރު ސަރ އެވެ. އަދި ދަރިވަރުންނަާ މުޚާތަބުކޮށް ޝަމްޢާން ސަރ ވެސް ވަނީ ވާހަކަ ދައްކަވައިފައެވެ. މިފަދަ ކަންކަމުގައި އެފް.އޭ އިން ބައިވެރިވުމަކީ ވަރަށް އުފާވެރި އަދި ވަރަށް އުއްމީދީ މަންޒަރެއް ކަމުގައި ސަރ ވިދާޅުވިއެވެ.
ބަހުސް މުބާރާތުގެ ނިންމުމުގެ ރަސްމިއްޔާތުގައި އެފް.އޭ ގެ އެއްވެސް ދަރިވަރަކު ނެތުމުގެ ސަބަބުން އެ ކުދިންގެ ސެޓްފިކެޓްތައް ރޭގެ ހަފްލާގައި، އެކުދިންނާއި ހަވާލު ކޮށްދެއްވީ ފެކަލްޓީ އޮފް އާރޓްސް ގެ ޑީން އެވެ. ސެޓްފިކެޓްތައް ހަވާލުކުރުމަށް ފަހު ފެކަލްޓީގެ މުވައްޒަފުންނާއި، ސިއާ ގެ މެންބަރުން އަދި ބަހުސް ޓީމުގެ ބައިވެރިން، ވަރަށް އެކުވެރިކަމާއި އުފާވެރިކަމާއެކު ވަނިިީ ކެއުމަށް އިންސާފު ކުރައްވާފައެވެ.
ފެކަލްޓީގެ މުވައްޒަފުންނާއި އެކު ސިއާ ގެ މެންބަރުންނާ އެއް މޭޒެއްގައި ކެއުމަށް އިންސާފު ކުރަމުން ދިޔައިރު ފެކަލްޓީ އިން މިހާރު ލިބެމުން ދާ އެއްބާރުލުން ފާހަގަކޮށް ޝުކުރު ދެންނެވިއެވެ. އަދި ހަމަ އެއާއެކު އަންނަ ބުރާސްފަތިދުވަހު އޮތް އެފް.އޭ ގެ ފުޓްސަލް މެޗްތަކުގެ ވާހަކަތައް ވެސް ވަނީ ދެކެވިފައެވެ. އެމް.ޑަބްލިޔު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާގައި އެފް.އޭ ގެ ޓީމުތަކަށް ފުރިހަމަ ކާމިޔާބީއެއް ލިބުމަށް އުއްމިދު ކުރާކަމުގައި ހުރިހާ ލެކްޗަރަރސް ވިދާޅުވިއެވެ. އަދި ފެކަލްޓީގެ ވިންގާއި މުވައްޒަފުންގެ ގުޅުން އަބަދުވެސް ރަނގަޅަށް ދަމަހައްޓައި ދަރިވަރުންނާއި ގުޅުން ހުރި ގިނަ ހަރަކާތްތަކެއް ހިންގުމަށް ވެސް އެދިފައިވެއެވެ.
ފެކަލްޓީގެ ފުރިހަމަ އެއްބާރުލުމާއެކު މިހާރުވެސް ސިއާ އިން ވަނީ އެފް.އޭ ގެ ހުރިހާ ދަރިވަރުންނާއި ލެކްޗަރަރ އިން ހިމަނައިގެން ވައިބަރ ކޮމިޔުނިޓީ ގްރޫޕެއް އުފައްދައިފައެވެ. މި ގްރޫޕް ގެ ސަބަބުން ސިއާ އިން ފޯރުކޮށްދިނުމަށް ބޭނުންވާ މެސެޖް ތަކާއި ފެކަލްޓީ އިން ދޭން ބޭނުންވާ މެސެޖްތައް ފަސޭހަ ކަމާއެކީ އެއްތާކުން ހުރިހާ ދަރިވަރުންނަށް ފޯރުކޮށްދެވޭނެއެވެ. އަދި މިހާރުވެސް ފެކަލްޓީ ގެ އެކި ކޯސްތަކުގައި އުޅޭ ދަރިވަރުންނަށް އެކަކު އަނެކަކު އެނގި ގުޅުން ބަދަހިވެ، ހަރަކާތްތަކުގައި ބައިވެރިވާ މިންވަރު އިތުރުވެފައިވާކަންވެސް ފާހަގަކުރެވެއެވެ.
ސިއާ އިން އެދުނު ކޮންމެ ކަމެއްގައި ވެސް ފެކަލްޓީގެ ފަރާތުން ލިބޭ އެއްބާރުލުން އެހެން އަހަރުތަކަށްވުރެ މިއަހަރު ބޮޑުކަން ފާހަގަ ކުރެވެއެވެ. އަދި ކުރިއަށް އޮތްތަނުގައި މިއަށްވުރެ ރަނގަޅުވާނެ ކަމަށް ބެލެވެއެވެ.
ލިޔުނީ: އަޙްމަދު ޝައްފާޒު
ރައީސް
ސްޓޫޑެންޓްސް އިނިޝިއޭޓިވް އޮފް އާރޓްސް
