އެމްޑަބްލިއުއެސްސީ އެމްއެންޔޫއެސްޔޫ ފުޓްސަލް ފިއެސްޓާގައި ވާދަކުރާ ފެކަލްޓީ އޮފް އެޑިއުކޭޝަންގެ ޓީމުގެ ކެޕްޓަނަކީ އާދައިގެ ކެޕްޓަނެއް ނޫނެވެ. މުޅި ޓީމުގެ ސަޕޯޓް ސިސްޓަމެވެ. އެންމެންނަށް ހިތްވަރުދޭނެއެވެ. އެއީ އެފްއީ ޓީމުގެ ކައްޕި، ޚާތިމާ ޔޫސުފެވެ.
ފުޓްސަލްއަކީ ޚާތިމާއާ މާ ރައްޓެހި ކުޅިވަރެއް ނޫނެވެ. ނަމަވެސް، ޝައުގުވެރިވާ ކުޅިވަރެކެވެ. މިއަދު ޓީމުގެ ކެޕްޓަނަށް އެހެރީ ވެސް އެ ޝައުގުވެރިކަމާހެދިއެވެ. ފަރިތަކުރުންތަކަށް ކުޅުންތެރިން ހަމަކޮށް ކުޅުންތެރިންނަށް ހިތްވަރު ދެނީ ޚާތިމާއެވެ. ޓީމުގެ އަމާޒު ކުޅުންތެރިންނަށް ހަނދާންކޮށްދެނީ ވެސް އޭނާއެވެ.
ހިތްވަރާއި އަޒުމާއެކު ކުރިއަށް ގޮސް ފެކަލްޓީ އޮފް އެޑިއުކޭޝަން މިވަނީ ސެމީފައިނަލަށް ގޮސްފައެވެ. ޓީމުން ކަނޑައެޅި އަމާޒާ ގާތަށް ޖެހިލާފައެވެ. ޓީމުގެ އަމާޒަކީ ފުޓްސަލް ފިއެސްޓާގެ ފައިނަލްގައި ކުޅުމެވެ. ޚާތިމާ ބުނަނީ ”އިރާދަކުރެއްވިއްޔާ ފައިނަލްގައި ކުޅޭނަމެވެ،“
ކައްޕިގެ ހިތްވަރުން ކުޅުންތެރިންގެ ހިތްވަރުވެސް އާވެއެވެ. ކުޅުންތެރިން ބުނާ ގޮތުން މާޔޫސްވާ ހަމަ ކޮންމެ ފަހަރަކުވެސް ހިތްވަރުދީ ނަސޭހަތްދޭން ކައްޕި ހުރެއެވެ. ޓީމު މިހާތަނަށް ހޯދި ކާމިޔާބީގެ ސިއްރަކީ ވެސް އެއީ ކަމަށް ކުޅުންތެރިން ގަބޫލު ކުރެއެވެ.
އެމްޑަބްލިއުއެސްސީ އެމްއެންޔޫ އެސްޔޫ ފުޓްސަލް ފިއެސްޓާއަކީ ކޮލެޖު ޔުނިވަރސިޓީތަކަށް ހުޅުވައިލެވިގެން ބޭއްވޭ އެންމެ ބޮޑު ފުޓްސަލް މުބާރާތެވެ. މުބާރާތުގައި ބާކީ އޮތީ ސެމީގެ މެޗުތަކާއި ފައިނަލް މެޗެވެ. ސެމީގެ މެޗުތައް އޮންނާނީ 26 ސެޕްޓެމްބަރުގައެވެ. ސެމީގައި އެފްއީ ބައްދަލު ކުރާނީ ސައިރިކްސް ކޮލެޖާއެވެ. މެޗުގެ މުހިއްމު ކަމާއި ޕްރީމެޗް ރިވިއު ފަހުން ހިއްސާ ކޮށްލާނަމެވެ.
ލިޔުނީ: އިބްރާހީމް ޢުމަރު،
މީޑިއާ ކޯޑިނޭޓަރ، ފެސާ، އެމް.އެން.ޔޫ.އެސް.ޔޫ
