ސްޓޫޑެންޓްސް އިނިޝިއޭޓިވް އޮފް އާރޓްސް (ސިއާ) އިން މިދިޔަ އަހަރުވެސް ބޭއްވި އިންސްޓަގްރާމް ފޮޓޯ ޗެލެންޖް މިއަހަރުވެސް ހުޅުވާލައިފިއެވެ.
ސިއާ ފޮޓޯ ޗެލެންޖް 2019 މިރޭ ހުޅުވާލައިފައިވާއިރު، ކުރީ އަހަރެކޭ ވެސް އެއްގޮތަށް މިއަހަރުވެސް މި ޗެލެންޖަށް ފޮޓޯ ހުށަހެޅޭނީ ދިވެހިރާއްޖޭގެ ޤައުމީ ޔުނިވަރސިޓީގައި ކިޔެވުން ޙާސިލު ކުރަމުންދާ ހުރިހާ ދަރިވަރުންނަށާއި ، އެމް.އެން.ޔޫގަައި ވަޒީފާ އަދާކުރަމުންދާ ހުރިހާ މުވައްޒަފުންނަށެވެ. މި ފެށޭ އޮކްޓޯބަރ މަހުގެ 31 ވާ ބުރާސްފަތި ދުވަހުގެ ރޭ 23:59 ށް ހަމަވާ މި ފޮޓޯ ޗެލެންޖްގެ ތީމަކީ ’ލައިޓްސް‘ އެވެ. މިފަހަރުވެސް މި ޗެލެންޖަށް އިންސްޓަގްރާމް ކުރާ ކޮންމެ ފޮޓޯއެއް ވެސް ލާން ޖެހެނީ ހޭޝް ޓެގް، siaphotochallenge2019 ޖެހުމަށްފަހު ޕަބްލިކް އެކައުންޓް އަކަށެވެ.
”މިހާ ފަސޭހަކޮށް ’ޕާޓީ ޕިއްޒާ‘ އެއް ހޯދާލަން މިއީ ވަރަށް ރަނގަޅު ފުރުސަތެއް. މި ޗެލެންޖުން އެއްވަނަ ހޯދާ ބައިވެރިއަކަށް ޕާޓީ ޕިއްޒާ ދޭނީ މާލެއިން ޕާޓީ ޕިއްޒާ ލިބެންހުރި ތަންތަނުގެ ތެރެއިން، އެ ބައިވެރިއަކު ބޭނުންވާ ތަނަކުން. “ މި ޗެލެންޖުގައި ދޭ އިނާމާއި ބެހޭގޮތުން، ސިއާގެ ނައިބު ރައީސާ (ޢަމަލީ) ރުޤިއްޔާ ރިމާނާ ބުންޏެވެ.
އިންސްޓަގްރާމް ބޭނުންކުރާ އެތައް ބަޔަކު ރާއްޖޭގައި އުޅޭއިރު އޭގެ ތެރޭގައި މި އެމް.އެން.ޔޫގެ އެތައް ދަރިވަރުންނަކާއި މުވައްޒަފުން ވެސް ހިމެނެނޭއެވެ. އެހެންކަމުން މިފަހަރުގެ ޗެލެންޖް ގެ ތީމަކީ ދިވެހިންގެ ތެރޭގައި ވަރަށް މަޤްބޫލް ތީމެއް ކަމުގައިވާ ’ލައިޓްސް‘ އެވެ. ގައިގަ ބޮކި ފައްޗެއް އޮޅާލައިގެން ވިޔަސް އިރުގެ އަލިން ’ސަން ކިސްޑް‘ ކޮއްލައިގެން ވިޔަސް، މޮޅު ފޮޓޯއެއް ނަގާފައި މި ޗެލެންޖުގައި ބައިވެރި ކޮއްލަންވީއެވެ. މި ނޫނަސް ކޮންމެސް ކަހަލާ އައްޔެއް ނުވަތަ ލައިޓެއް ބޭނުން ކޮށްގެން ހުނަރުވެރި މޮޅު ފޮޓޯ އެއް މި ޗެލެންޖަށް އިންސްޓަގްރާމް ކޮއްލަންވީއެވެ.
’ޔުނިވަރސިޓި ލައިފް‘ ގެ ތީމް އަށް މިދިޔަ އަހަރު ޝުޢައިބު އިންސްޓަގްރާމް ކުރި ފޮޓޯ ސިއާ ފޮޓޯ ޗެލެންޖް 2018ގެ އެއްވަނަ، ޝުޢައިބު އަށް ޕާޓީ ޕިއްޒާ ހަވާލުކުރަނީ
މި ޗެލެންޖްގެ މަޤްސަދަކީ، ފޮޓޯ ނެގުމުގެ ދާއިރާއިން ދަރިވަރުންނާއި ލެކްޗަރަރ އިން އަދި މުވައްޒަފުންގެ ހުރި ހުނަރުތައް ފާހަގަކޮށް އަގުވަޒަން ކުރުމެވެ. އަދި ފޮޓޯ ގްރަފީގެ ދާއިރާއަށް ގިނަ ބަޔަކު ޝައުގުވެރިކުރުވުމެވެ. އެއް މަސް ދުވަހުގެ ނިޔަލަށް ހުޅުވާލާފައިވާ މި މުބާރާތުގެ އެންމެ މޮޅު ފޮޓޯ ހޮވުމަށް މާކްސް ދޭ ގޮތައް މިވަނީ ކުޑަ ބަދަލެއް އައިއްސައެވެ. އެ ގޮތުން މި މުބާރާތުގެ އެންމެ މޮޅު ފޮޓޯ އަކަށް ހޮވޭނީ ޖަޖުންގެ %60 އާއި އެ ފޮޓޯ އަކަށް ލިބޭ ލައިކްސްގެ %40 އަށް ބެލުމަށް ފަހު އެންމެ މަތިން މާކްސް ލިބޭ ފޮޓޯ އަކަށެވެ.
މިދިޔައަހަރުގެ ފޮޓޯ ޗެލެންޖްގެ އެއްވަނަ ހޯދާފައިވަނީ، އޭރު އެމް.އެން.ޔޫ ބިޒްނަސް ސްކޫލްގައި ކިޔެވުން ހާސިލު ކުރަމުން ދިޔަ ޝުޢައިބު މުހައްމަދު އެވެ.
ލިޔުނީ: އަޙްމަދު ޝައްފާޒު
ރައީސް
ސްޓޫޑެންޓްސް އިނިޝިއޭޓިވް އޮފް އާރޓްސް
