ފެކަލްޓީ އޮފް އެޑިއުކޭޝަން ބަލިކޮށް މުބާރާތުގެ އަންހެން ޑިވިޒަންގެ ޗެމްޕިއަން ކަން އެމްއައި އަށް!

އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސެލް ފިއެސްޓާގެ އަންހެން ޑިވިޟަނުގެ ޗެމްޕިއަންކަން ފެކަލްޓީ އޮފް އެޑިއުކޭޝަން ބަލިކުރުމަށްފަހު އެމް.އައި އިން ހޯދައިފިއެވެ.

ފައިނަލް މެޗު ފަސޭހަކަމާއެކު އެމް.އައި އިން ކާމިޔާބުކުރީ 5-0 ގެ ނަތީޖާ އަކުންނެވެ.

މެޗުގެ ފުރަތަމަ ހާފު ކުރީކޮޅު އެމް.އައި އިން ވަނީ ލަނޑު ޖަހާ ލީޑު ނަގައިފައެވެ. މި ލަނޑު މެޗުގެ 5 ވަނަ މިނެޓުގައި އެޓީމަށް ކާމިޔާބުކޮށްދިނީ ޖާޒީ ނަމްބަރު ހައެއް އައިމިނަތު ޝާމިލާއެވެ. ޝާމިލާގެ ލަނޑަށްފަހު އިތުބާރާއެކު ކުޅެމުން އައި އެމްއައި އިން ވަނީ މެޗު ގެ 8 ވަނަ މިނެޓުގައި އިތުރު ލަނޑެއް ޖަހާ މެޗުގެ ލީޑު ފުޅާ ކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ޖާޒީ ނަމްބަރު 14 ހަލީމަތް ހަސްނާއެވެ. ލަނޑަށް ފަހު ވެސް އެމް.އައި އިން ވަނީ ވަރުގަދަ އެޓޭކިންގް ގޭމެއް ކުޅެފައެވެ. ނަތީޖާ އަކަށް ވެގެން ދިޔައީ މެޗުގެ 10 ވަނަ މިނެޓުގައި ހަސްނާ އިތުރު ލަނޑެއްޖަހާ މެޗުގެ ނަތީޖާ 3-0 ކަށް ބަދަލު ކޮށްލުމެވެ.

މެޗުގެ ފުރަތަމަ ހާފު ނިމިގެންދިޔައީ 3-0 ގެ ނަތީޖާ އަކުން އެމް.އައި ކުރީގައި އޮވެގެންނެވެ.

ދެވަނަ ހާފުގައި އެފް.އީ އިން އެޓީމުގެ ކުޅުން ރަނގަޅު ކުރި އިރު އެޓީމުން ވަނީ އެމް.އައިގެ ގޯލަށް ނުރައްކާ ކޮށްފައެވެ. އެފް.އީ ކުޅުންތެރިން ފޮނުވާލި ހަމަލާތަކުގެ ހުރަހަކަށް ވެގެން ދިޔައީ މެޗުގައި މޮޅު ސޭވް ތަކެއް ކުރި އެމް.އައި ގެ ކީޕަރެވެ.

އެފް.އީ ކުޅުންތެރިންނަށް ލިބުނު ފުރުސަތުތަށް ބޭކާރު ކޮށްލުމުގެ ފައިދާ ނަގާ އެމް.އައި އިން ވަނީ ކައިރި ކައިރީގައި ދެ ލަނޑު ޖަހާ ޗެމްޕިއަންކަން ކަށަވަރު ކޮށްފައެވެ. މި ލަނޑުތައް އެޓީމަށް ކާމިޔާބުކޮށްދިނީ މެޗުގެ 18 ވަނަ މިނެޓުގައި ޝާމިލާއާއި އަދި އޭގެ މިނެޓެއް ފަހުން ހަސްނާ އެވެ.

މި މެޗުގެ މޮޅު ކުޅުންތެރިއަކީ އެމް.އައި ކޮލެޖުގެ ހަލީމަތް ހަސްނާއެވެ.

އަންހެން ޑިވިޜަނުގެ އެންމެ ގިނަ ގޯލް ޖެހި ކުޅުންތެރިޔަކީ އެމް.އައި ކޮލެޖުގެ ޖާރޒީ ނަންބަރ 6 އާމިނަތު ޝާމިލާ އެވެ. އަންހެން ޑިވިޜަނުގެ އެންމެ މޮޅު ހަތަރު ކުޅުންތެރިންނަކީ އެމް.އައި ކޮލެޖުގެ ޖާޒީ ނަމްބަރު 1 ނަޝްފާ މުހައްމަދު، ސައިރެކްސް ކޮލެޖުގެ ޖާޒީ ނަމްބަރު 5 މަރިޔަމް ވަފާ، ވިލާ ކޮލެޖުގެ ޖާޒީ ނަމްބަރު 7 އައިޝަތު އީމާން އަހްމަދު ޒައީމް އަދި އެމް.އައި ކޮލެޖުގެ ޖާޒީ ނަމްބަރު 14 ހަލީމަތް ހަސްނާއެވެ. މި ޑިވިޟަނުގެ އެންމެ މޮޅު ކުޅުންތެރިޔަކީ އެމް.އައި ކޮލެޖުގެ ޖާޒީ ނަމްބަރު 6 އާމިނަތު ޝާމިލާއެވެ. މި ޑިވިޜަނުގެ އެންމެ އުންމީދީ ކުޅުންތެރިޔަކީ އެފް.އީގެ ޖާޒީ ނަމްބަރު 5 އާމިނަތު ފަސީހާއެވެ. އަދި މި ޑިވިޜަންގެ ފެއާ ޕްލޭ ޓީމަކީ ފެކަލްޓީ އޮފް އެޑިއުކޭޝަނެވެ.

އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ ޓައިޓްލް ސްޕޮންސަރަކީ މާލޭ ވޯޓަރ އެންޑް ސްވަރޭޖް ކޮމްޕެނީ (އެމް.ޑަބްލިއު.އެސް.ސީ)އެވެ. މި މުބާރާތުގެ ޕްރިންޓިންގ ޕާޓްނަރަކީ އެމް 7އެވެ. ސްޕޮންސަރުންނަކީ ދިރާގު އަދި ވިޒިޓް ލާމްއެވެ. މީޑިއާ ޕާޓްނަރަކީ ޕީ.އެސް.އެމް ސްޕޯޓްސްއެވެ.

އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ޘާނަވީ ދާއިރާގައި ބާއްވާ އެންމެބޮޑު ކުޅިވަރު ޙަރަކާތެވެ. މި މުބާރާތް ރާވައި އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިންނެވެ. މި އަހަރު މި ބާއްވަނީ މީގެ 7ވަނަ މުބާރާތެވެ. 2013އިން ފެށިގެން މެދުކެނޑުމެއްނެތި މި މުބާރާތް އަންނަނީ ބާއްވަމުންނެވެ. މި މުބާރާތް ހުޅުވާލާފައިވަނީ އެމް.އެން.ޔޫގެ ފެކަލްޓީތަކާއި ދިވެހިރާއްޖޭގެ އެހެނިހެން ކޮލެޖުތަކަށެވެ. މުބާރާތުގައި ފިރިހެން ޑިވިޜަނާއި އަންހެން ޑިވިޜަން ހިމެނެއެވެ. މުބާރާތުގައި އަންހެން ޑިވިޜަން އެންމެ ފުރަތަމަ ހިމެނީ 2018ވަނަ އަހަރުއެވެ.

ލިޔުނީ: އަބްދުﷲ އަޠޫފް އާތިފް،
ރައީސް، ތަރަހަ، އެމްއެންޔޫއެސްޔޫ