އެމްޑަބްލިއުއެސްސީ އެމްއެންޔޫއެސްޔޫ ފުޓްސަލް ފިއެސްޓާގައި ކުޅުނު ހުރިހާ މެޗެއް ކާމިޔާބުކޮށް އެވިޑުން މި މުބާރާތުގެ ފިރިހެން ޑިވިޟަނުގެ ޗެމްޕިއަންކަން ހޯދައިފިއެވެ.
ފައިނަލުގައި އެވިޑުން ސައިރެކްސް ކޮލެޖު ބަލިކުރީ 3-1 ގެ ނަތީޖާ އަކުންނެވެ.
ގިނަ އަދަދެއްގެ ސަޕޯޓަރުން ކުރިމަތީގައި ކުޅުނު މި މެޗުގެ ވަރަށް ކުރީ ކޮޅު އެވިޑުން ވަނީ ލަނޑު ޖަހައި ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ ޖާޒީ ނަމްބަރު 12 ހުސެއިން ސަވީލްއެވެ.
މި ލަނޑަށް ފަހު ވެސް އެވިޑުން ވަނީ ގިނަ ވަގުތު ބޯޅަ ކޮންޓްރޯލްކޮށް ސައިރެކްސްގެ ހާފަށް ބާރު ބޮޑު ކޮށް ގިނަ ހަމަލާ ތަކެއް އުފައްދައިފައެވެ. ނަމަވެސް ސައިރެކްސްގެ ކީޕަރު ވަނީ އެވިޑު ކުޅުންތެރިން ފޮނުވައިލި ގިނަ ހަމަލާތަކެއް ހުށިޔާރުކަމާއިއެކު ދިފާއު ކޮށްފައެވެ.
މެޗުގެ ދެވަނަ ހާފުގައި ސައިރެކްސް އިން ވަނީ އެޓީމުގެ ކުޅުން ރަނގަޅުކޮށް އެވިޑުގެ ގޯލަށް ނުރައްކާ ކޮށްފައެވެ. އެގޮތުން މެޗުގެ 25 ވަނަ މިނެޓުގައި ސައިރެކްސް އިން ވަނީ ލަނޑު ޖަހާ މެޗުގެ ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ އެޓީމުގެ ޖާޒީ ނަމްބަރު 12 މުހައްމަދު އަމްޖަދެވެ.
ދެވަނަ ހާފުގައި ސައިރެކްސްއިން ރަނގަޅަށް ކުޅެމުން ދަނިކޮށް އެވިޑުން ވަނީ އެޓީމަށް ލިބުނު ފުރުސަތުގެ ބޭނުން ހިފާ ލަނޑެއް ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ އެޓީމުގެ ޖާޒީ ނަމްބަރު 7 އިސްމާއީލް މުނީޒްއެވެ.
މި ލަނޑަށްފަހު އެވިޑުން އެޓީމުގެ ކުޅުން ރަނގަޅުކޮށް ފުލުފުލުގައި ސައިރެކްސްގެ ގޯލަށް ނުރައްކާކުރިއެވެ. އެގޮތުން މެޗުގެ 39 ވަނަ މިނެޓުގައި މުނީޒް ވަނީ އެވިޑަށް އިތުރު ލަނޑެއް ޖަހައިދީ އެވިޑު މެޗުން މޮޅު ކޮށްދީފައެވެ.
ފިރިހެން ޑިވިޟަނުގެ އެންމެ ހަތަރު ކުޅުންތެރިންނަކީ:-
ފެކަލްޓީ އޮފް އިންޖިނިއަރިންގ ސައިންސް އެންޑް ޓެކްނޮލަޖީގެ، ޖާޒީ ނަމްބަރު 9 ތޮލާލް ނަސީރު
ސައިރެކްސް ކޮލެޖުގެ ޖާޒީ ނަމްބަރު 6 އަހްމަދު މަޚްދޫމް
އެވިޑް ކޮލެޖުގެ ޖާޒީ ނަމްބަރު 10 ހުސެއިން ސުހައިލް
އެވިޑް ކޮލެޖުގެ ޖާޒީ ނަމްބަރު 1 ޒައިދާން އަހްމަދު
މުޅި މުބާރާތުގެ އެންމެ މޮޅު ކުޅުންތެރިޔަކީ އެވިޑް ކޮލެޖުގެ ޖާޒީ ނަމްބަރު 12 ހުސައިން ސަވީލެވެ. މި މުބާރާތުގެ ފިރިހެން ޑިވިޝަންގެ އެންމެ މޮޅު ކޯޗަކީ އެވިޑް ކޮލެޖުގެ ކޯޗު އަހްމަދު ވިސާލެވެ. އަދި މި މުބާރާތުގެ އެންމެ އުންމީދީ ކުޅުންތެރިއަކީ ކްލިކް ކޮލެޖުގެ ޖާޒީ ނަމްބަރު 10 ޔަޒްދާން އިބްރާހީމެވެ. އަދި މި މުބާރާތުގެ އެންމެ ގިނަ ލަނޑު ޖެހި ކުޅުންތެރިޔަކީ މައި ކޮލެޖުގެ ޖާޒީ ނަމްބަރު 8 އަކްމަލް މުހައްމަދެވެ.
އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ ޓައިޓްލް ސްޕޮންސަރަކީ މާލޭ ވޯޓަރ އެންޑް ސްވަރޭޖް ކޮމްޕެނީ (އެމް.ޑަބްލިއު.އެސް.ސީ)އެވެ. މި މުބާރާތުގެ ޕްރިންޓިންގ ޕާޓްނަރަކީ އެމް 7އެވެ. ސްޕޮންސަރުންނަކީ ދިރާގު އަދި ވިޒިޓް ލާމްއެވެ. މީޑިއާ ޕާޓްނަރަކީ ޕީ.އެސް.އެމް ސްޕޯޓްސްއެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ޘާނަވީ ދާއިރާގައި ބާއްވާ އެންމެބޮޑު ކުޅިވަރު ޙަރަކާތެވެ. މި މުބާރާތް ރާވައި އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިންނެވެ. މި އަހަރު މި ބާއްވަނީ މީގެ 7ވަނަ މުބާރާތެވެ. 2013އިން ފެށިގެން މެދުކެނޑުމެއްނެތި މި މުބާރާތް އަންނަނީ ބާއްވަމުންނެވެ. މި މުބާރާތް ހުޅުވާލާފައިވަނީ އެމް.އެން.ޔޫގެ ފެކަލްޓީތަކާއި ދިވެހިރާއްޖޭގެ އެހެނިހެން ކޮލެޖުތަކަށެވެ. މުބާރާތުގައި ފިރިހެން ޑިވިޜަނާއި އަންހެން ޑިވިޜަން ހިމެނެއެވެ. މުބާރާތުގައި އަންހެން ޑިވިޜަން އެންމެ ފުރަތަމަ ހިމެނީ 2018ވަނަ އަހަރުއެވެ.
ލިޔުނީ: ޢަބްދުﷲ އަޠޫފް އާތިފް،
ރައީސް، ތަރަހަ، އެމްއެންޔޫއެސްޔޫ
