އެމް.އެން.ޔޫ.އެސް.ޔޫ އިންޓަރ ފެކަލްޓީ ނެޓް ބޯޅަ މުބާރާތް 2019 ގެ ސެމީ ފައިނަލުގައި ފެކަލްޓީ އޮފް ހެލްތު ސައިންސަސް އާއި ފެކަލްޓީ އޮފް ލޯ އެންޑް އިސްލާމިކް ސްޓަޑީޒް ވާދަކުރަން ޖެހިއްޖެއެވެ.
ރޭ 20:00 ގައި ފެށި ކުއާޓަރ ފައިނަލް މެޗުތަކުގައި ޓީމުތަކުގެ ފަރާތުން ފެނިގެންދިޔައީ ވާދަވެރި ކުޅުމެކެވެ.
އެފް.އެޗް.އެސް ސެމީ ފައިނަލުގެ ފުރުސަތު ހޯދީ ކުއާޓަރ ފައިނަލުގައި އެފް.އެޗް.ޓީ.އެސް އާއި ބައްދަލުކުރި މެޗުގައި 31-07 ޕޮއިންޓްއިން މޮޅުވެގެންނެވެ. މިމެޗުގެ އެންމެ މޮޅު ކުޅުންތެރިއަކީ އެފް.އެޗް.އެސް.ގެ ޒިޔާދާ މުޙައްމަދެވެ.
ކުއާޓަރ ފައިނަލުގެ ދެވަނަ މެޗުގައި އެފް.އެލް.އައި.އެސް އިން ވަނީ ސީ.އެފް.އެސް އަތުން 29-10 ޕޮއިންޓްއިން މޮޅުވެފައެވެ. މި މޮޅާއެކު އެފް.އެލް.އައި.އެސް އަށް ވަނީ ސެމީ ފައިނަލުގެ ޖާގަ ކަށަވަރުވެފައެވެ. މިމެޗުގެ އެންމެ މޮޅު ކުޅުންތެރިއަކަށް ހޮވިގެންދިޔައީ އެ ޓީމުގެ ފާތިމަތު ސަނާއެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ނެޓްބޯޅަ މުބާރާތުގެ ސެމީ ފައިނަލުގެ މެޗުތައް ކުރިޔަށް ދާނީ 22 އޮކްޓޯބަރ ވާ އަންގާރަ ދުވަހުގެ ރެއެވެ. އެގޮތުން އެފް.އެލް.އައި.އެސް އަދި އެފް.އެޗް.އެސް ބައްދަލު ކުރާނީ ސެމީ ފައިނަލުގެ ދެވަނަ މެޗުގައެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ނެޓްބޯޅަ މުބާރާތް 2019 އަކީ އެމް.އެން.ޔޫ.އެސް.ޔޫގެ ފަރާތުން ބާއްވާ މިފަދަ ތިންވަނަ މުބާރާތެވެ. މިގޮތުން ފުރަތަމަ މުބާރާތް ބޭއްވުނީ 2015ގައި ކަމަށްވާއިރު، އެ އަހަރުގެ ތަށި އުފުލާލީ އެމް.އެން.ޔޫ ބިޒްނަސް ސްކޫލުންނެވެ. 2016 ވަނަ އަހަރު ބޭއްވުނު 2 ވަނަ މުބާރާތުގެ ޗެމްޕިއަންކަން ފެކަލްޓީ އޮފް ލޯ އެންޑް އިސްލާމިކް ސްޓަޑީޒް އިން ހޯދިއިރު، 2017 އަދި 2018ވަނަ އަހަރު މި މުބާރާތް ބާއްވާފައެއް ނުވެއެވެ. މި މުބާރާތަކީ އެމް.އެން.ޔޫގެ ފެކަލްޓީ/ސެންޓަރތަކަށް ހުޅުވާލައިގެން ބާއްވާ މުބާރާތަކަށްވާއިރު، މި މުބާރާތުގައި ޖުމްލަ 10 ޓީމު މިފަހަރު ވާދަކުރެއެވެ. މި 10 ޓީމާއެކު، އެމް.އެން.ޔޫ.އެސް.ޔޫގެ ގޮފި އުފެދިފައިވާ ހުރިހާ ފެކަލްޓީ/ސެންޓަރތަކެއް މި މުބާރާތުގައި ތަމްސީލުކުރާއިރު، މި މުބާރާތްވެގެންދާނީ ތާރީޚީ މުބާރާތަކަށެވެ.
ލިޔުނީ: އާމިނަތު ޝަމާ މުހައްމަދު،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
