އެމް.އެން.ޔޫ.އެސް.ޔޫ އަހުރަ ހޭންޑްބޯޅަ މުބާރާތް 2019 ގައި އަންހެން ޑިވިޝަނުގެ ފުރަތަމަ 4 މެޗު ކުޅެ ނިމިއްޖެއެވެ. މި 4 މެޗުވެސް ކުޅެވުނީ 2019 އޮކްޓޯބަރ 01ވީ ދުވަހުގެރޭ ލ. ގަމު މަތިމަރަދޫ ފުޓްސަލް ގްރައުންޑްގައެވެ.
އަންހެން ޑިވިޝަނުގެ ގްރޫޕް އޭގެ މޯލްޑިވިއަން އަދި އިހައްދޫ ސްކޫލް ބައްދަލުކުރި މެޗު 13 – 1ން ކާމިޔާބުކުރީ މޯލްޑިވިއަން އިން ކަމަށްވާއިރު، މެޗުގެ އެންމެ މޮޅު ކުޅުންތެރިޔަކީ މޯލްޑިވިއަންގެ ޖާރޒީ ނަންބަރ 12 ފާޠިމަތު ޝަރުމީލާ އެވެ. ހަމަ މި ގްރޫޕްގެ ފެނަކަ އަދި ގަން ރީޖަނަލް ހޮސްޕިޓަލް ބައްދަލުކުރި މެޗު 3 – 1ގެ ނަތީޖާއަކުން ކާމިޔާބުކުރީ ފެނަކަ އެވެ. މި މެޗުގެ އެންމެ މޮޅު ކުޅުންތެރިޔަކަށް ހޮވުނީ ފެނަކައިގެ ޖާރޒީ ނަންބަރ 25، ތަހުމީނާ އަލީ އެވެ.
މި ޑިވިޝަންގެ ގްރޫޕް ބީގައި ލ. އަތޮޅު ތައުލީމީ މަރުކަޒުން 9 – 1ގެ ނަތީޖާއަކުން މުންޑޫ ކައުންސިލްގެ މައްޗަށް ކުރި ހޯދިއިރު، މެޗުގެ އެންމެ މޮޅު ކުޅުންތެރިޔާ އަކީ ލ. އަތޮޅު ތައުލީމީ މަރުކަޒުގެ ޖާރޒީ ނަންބަރ 10، މަރިޔަމް ރައުޝަން އެވެ.
ގްރޫޕް ސީގައި ލާމު ގަމު ކައުންސިލުން 4 – 3ގެ ނަތީޖާއަކުން ދިރާގުގެ މައްޗަށް ކުރިހޯދިއިރު، މެޗުގެ އެންމެ މޮޅު ކުޅުންތެރިޔަކަށް ހޮވުނީ ލާމު ގަމު ކައުންސިލްގެ ޖާރޒީ ނަންބަރ 11 ޢާޢިޝަތު ޝާލީ އެވެ.
މުބާރާތުގެ ފިރިހެން ޑިވިޝަނުގައި ޖުމްލަ 4 ޓީމެއް ވާދަކުރާއިރު އަންހެން ޑިވިޝަނުގައި ޖުމްލަ 10 ޓީމެއް ވާދަކުރެއެވެ. މި މުބާރާތަކީ ލ. އަތޮޅުގެ މުއައްސަސާތަކަށް ހުޅުވާލައިގެން ބާއްވާ މުބާރާތަކަށްވާއިރު، މުބާރާތް ކުރިއަށްދާނީ އޮކްޓޯބަރ 01ން 06 އަށެވެ.
މިއީ 2017 ވަނަ އަހަރުން ފެށިގެން ސިލްސިލާގޮތެއްގައި ބާއްވާ މިފަދަ 3 ވަނަ މުބާރާތެވެ. މިއަހަރުގެ މުބާރާތުގެ އެކަމޮޑޭޝާން ޕާޓްނަރ އަކީ ”ނިރުވާނާ އިން ލާމު“ އެވެ. ސްޕޮންސަރުންގެ ތެރޭގައި ”ލ. ގަމު ކައުންސިލް“، ”ލ. ގަން ޕޮލިސް ސްޓޭޝަން“، ”ދިރާގު“، ”އައިލެންޑާސް އެސޯސިއޭޝަން“ އަދި ”އަމީގޯސް ސްޕޯޓްސް ކްލަބް“ ހިމެނެއެވެ. މިއަހަރުގެ މުބާރާތް ރާވާ، އިންތިޒާމު ކުރަނީ އެމް.އެން.ޔޫ.އެސް.ޔޫއިންނެވެ.
ލިޔުނީ: އާމިނަތު ޝަމާ މުޙައްމަދު
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
