އެމް.އެން.ޔޫ.އެސް.ޔޫ އަހުރަ ހޭންޑްބޯޅަ މުބާރާތުގެ ފިރިހެން ޑިވިޝަން ފައިނަލުގެ ފުރަތަމަ ޖާގަ ގަން ރީޖަނަލް ހޮސްޕިޓަލުން ކަށަވަރުކޮށްފިއެވެ. އެ ޓީމުން މި ޖާގަ ކަށަވަރު ކުރީ ހުކުރުދުވަހުގެ ހަވީރު އިސްކަންދަރު އެއަރ ބޭސް އާ ވާދަކޮށް 7-6ގެ ނަތީޖާއަކުން ފުރަތަމަ ސެމީ ކާމިޔާބުކޮށްގެންނެވެ. ފޯރިގަދަ އަދި ވާދަވެރި ކުޅުމެއް ފެނުނު މި މެޗުގެ މޮޅު ކުޅުންތެރިޔަކަށް ހޮވުނީ ގަން ރީޖަނަލް ހޮސްޕިޓަލްގެ ޖާރޒީ ނަންބަރ 01 މުހައްމަދު މުއީނެވެ.
މި ޑިވިޝަނުގެ ދެވަނަ ސެމީގައި ބައްދަލުކުރާނީ އިސްކަންދަރު އެއަރ ބޭސް އަދި ލާމު ބްލޫސް އެވެ. މި މެޗު ތާވަލުކުރެވިފައިވަނީ ހޮނިހިރު ދުވަހުގެ ހަވީރު 05:00އަށެވެ.
ހުކުރުދުވަހުގެ ހަވީރު ދެން ކުޅެވުނީ އަންހެން ޑިވިޝަނުގެ ކްއާޓަރ ފައިނަލްގެ ޕްލޭ އޮފް މެޗެކެވެ. މި މެޗުގައި ބައްދަލުކުރީ ދިރާގު އަދި މުންޑޫ ކައުންސިލެވެ. މި މެޗު 6-1ގެ ނަތީޖާއަކުން ކާމިޔާބުކޮށް ދިރާގުން ވަނީ ކްއާޓަރ ފައިނަލަށް ދަތުރުކޮށްފައެވެ. މެޗުގެ މޮޅު ކުޅުންތެރިޔަކަށް ހޮވުނީ ދިރާގުގެ ޖާރޒީ ނަންބަރ 10، ސުމައްޔާ ބިންތު އަބްދުލްހަމީދު ކަމަށްވާއިރު، ކްއާޓަރ ފައިނަލުގައި ދިރާގު ބައްދަލުކުރާނީ މޯލްޑިވިއަންގެ ޓީމާއެވެ. މި މެޗު ކުޅެވޭނީ ހޮނިހިރު ދުވަހުގެ ހެނދުނު 07:00ގައެވެ.
މުބާރާތުގެ ފިރިހެން ޑިވިޝަނުގައި ޖުމްލަ 4 ޓީމެއް ވާދަކުރާއިރު އަންހެން ޑިވިޝަނުގައި ޖުމްލަ 10 ޓީމެއް ވާދަކުރެއެވެ. މި މުބާރާތަކީ ލ. އަތޮޅުގެ މުއައްސަސާތަކަށް ހުޅުވާލައިގެން ބާއްވާ މުބާރާތަކަށްވާއިރު، މުބާރާތް ކުރިއަށްދާނީ އޮކްޓޯބަރ 01ން 06 އަށެވެ. މި މުބާރާތް ރާވާ އިންތިޒާމު ކުރަނީ ލ. ގަމު ކެމްޕަހުގައި ޤާއިމުކުރެވިފައިވާ އެމް.އެން.ޔޫ.އެސް.ޔޫގެ ގޮފި އަހުރައިންނެވެ. މިފަހަރުގެ މުބާރާތުގައި އެމް.އެން.ޔޫ.އެސް.ޔޫއިން ދަނީ މުބާރާތް އިންތިޒާމުކުރުމުގައި އަމަލީގޮތުން ހަރަކާތްތެރިވަމުންނެވެ.
މިއީ 2017 ވަނަ އަހަރުން ފެށިގެން ސިލްސިލާގޮތެއްގައި ބާއްވާ މިފަދަ 3 ވަނަ މުބާރާތެވެ. މިއަހަރުގެ މުބާރާތުގެ އެކަމޮޑޭޝާން ޕާޓްނަރ އަކީ “ނިރުވާނާ އިން ލާމު” އެވެ. ސްޕޮންސަރުންގެ ތެރޭގައި “ލ. ގަމު ކައުންސިލް”، “ލ. ގަން ޕޮލިސް ސްޓޭޝަން”، “ދިރާގު”، “އައިލެންޑާސް އެސޯސިއޭޝަން” އަދި “އަމީގޯސް ސްޕޯޓްސް ކްލަބް” ހިމެނެއެވެ. އަދި ހަމަ އެހެންމެ އެމް.އެން.ޔޫގެ ލ. ގަން ކެމްޕަހުން ދެއްވާ ފުރިހަމަ އެއްބާރުލުމާއި އެހީތެރިކަން ފާހަގަކުރެވެއެވެ.
ލިޔުނީ: އާމިނަތު ސަމާ މުހައްމަދު،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
