ސެމީގައި އިސްކަންދަރު އެއަރ ބޭސް އާއި ލ.އަތޮޅު ތައުލީމީ މަރުކަޒު އަދި މޯލްޑިވިއަން އާއި ފެނަކައިގެ ކުރިމަތިލުމެއް

ލ. ގަމުގައި ކުރިއަށްދާ އެމް.އެން.ޔޫ.އެސް.ޔޫ އަހުރަ ހޭންޑްބޯޅަ މުބާރާތުގެ އަންހެން ޑިވިޝަނުގެ ފުރަތަމަ ކުއާޓަރ ކާމިޔާބުކޮށް ސެމީ ފައިނަލުގެ ފުރަތަމަ ޖާގަ ކަށަވަރުކުރީ އިސްކަންދަރު އެއަރބޭސްއިންނެވެ. އިހައްދޫ ސްކޫލާ ބައްދަލުކޮށް މި މެޗު އެ ޓީމުން ކާމިޔާބުކުރީ 10-3ގެ ނަތީޖާއަކުންނެވެ. މެޗުގެ މޮޅު ކުޅުންތެރިޔަކަށް ހޮވުނީ އިސްކަންދަރު އެއަރބޭސްގެ ޖާރޒީ ނަންބަރ 05 މައީޝާ އަބްދުލް ހަންނާނެވެ.
ކުއާޓާ ފައިނަލުގެ ދެވަނަ މެޗުގައި ލާމު ބްލޫސްގެ މައްޗަށް ފެނަކައިން ކުރިހޯދީ 7-3ގެ ނަތީޖާއަކުންނެވެ. މެޗުގެ މޮޅު ކުޅުންތެރިޔަކަށް ހޮވުނީ ފެނަކައިގެ ޖާރޒީ ނަންބަރ 08 ފާތިމަތު ސިނާ އެވެ.
ހުކުރުދުވަހުގެރޭ ކުޅެވުނު ކުއާޓަރ ފައިނަލުގެ ތިންވަނަ މެޗު ލާމު ގަމު ކައުންސިލާ ބައްދަލުކޮށް ލާމު އަތޮޅު ތައުލީމީ މަރުކަޒުން ކާމިޔާބުކުރީ 6-3ގެ ނަތީޖާއަކުންނެވެ. މެޗުގެ މޮޅު ކުޅުންތެރިޔަކަށް ހޮވުނީ ލާމު އަތޮޅު ތައުލީމީ މަރުކަޒުގެ ޖާރޒީ ނަންބަރ 10 މަރިޔަމް ރައުޝަން އެވެ.

ހޮނިހިރު ދުވަހު ހެނދުނު ކުޅެވުނު ކުއާޓަރ ފައިނަލުގެ ފަހު މެޗު ދިރާގާ ވާދަކޮށް މޯލްޑިވިއަން އިން ކާމިޔާބުކުރީ 16-5ގެ ނަތީޖާއަކުންނެވެ. މެޗުގެ މޮޅު ކުޅުންތެރިޔަކަށް ހޮވުނީ މޯލްޑިވިއަންގެ ޖާރޒީ ނަންބަރ 12 ފާތިމަތު ޝަރުމީލާ އެވެ.
މި ނަތީޖާތަކާއެކު އަންހެން ޑިވިޝަނުގެ ސެމީ ފައިނަލުގެ ފުރަތަމަ މެޗުގައި ބައްދަލުކުރާނީ އިސްކަންދަރު އެއަރ ބޭސް އަދި ލ. އަތޮޅު ތައުލީމީ މަރުކަޒެވެ. ދެވަނަ ސެމީ ފައިނަލް މެޗުގައި ބައްދަލުކުރާނީ ފެނަކަ އަދި މޯލްޑިވިއަން އެވެ. މި މެޗުތައް ކުޅުމަށް ހަމަޖެހިފައިވަނީ ހޮނިހިރުދުވަހުގެ ރޭގަނޑު 08.00ގައި އަދި 09.00ގައެވެ.
މީގެ އިތުރުން ފިރިހެން ޑިވިޝަނުގެ ދެވަނަ ސެމީ ފައިނަލު މެޗު ހޮނިހިރުދުވަހުގެ ހަވީރު 05.00ގައި ކުޅެވޭނެއެވެ. މި މެޗުގައި ބައްދަލުކުރާނީ އިސްކަންދަރު އެއަރ ބޭސް އަދި ލާމު ބްލޫސް އެވެ.

މުބާރާތުގެ ފިރިހެން ޑިވިޝަނުގައި ޖުމްލަ 4 ޓީމެއް ވާދަކުރާއިރު އަންހެން ޑިވިޝަނުގައި ޖުމްލަ 10 ޓީމެއް ވާދަކުރެއެވެ. މި މުބާރާތަކީ ލ. އަތޮޅުގެ މުއައްސަސާތަކަށް ހުޅުވާލައިގެން ބާއްވާ މުބާރާތަކަށްވާއިރު، މުބާރާތް ކުރިއަށްދާނީ އޮކްޓޯބަރ 01ން 06 އަށެވެ. މި މުބާރާތް ރާވާ އިންތިޒާމު ކުރަނީ ލ. ގަމު ކެމްޕަހުގައި ޤާއިމުކުރެވިފައިވާ އެމް.އެން.ޔޫ.އެސް.ޔޫގެ ގޮފި އަހުރައިންނެވެ. މިފަހަރުގެ މުބާރާތުގައި އެމް.އެން.ޔޫ.އެސް.ޔޫއިން ދަނީ މުބާރާތް އިންތިޒާމުކުރުމުގައި އަމަލީގޮތުން ހަރަކާތްތެރިވަމުންނެވެ.

މިއީ 2017 ވަނަ އަހަރުން ފެށިގެން ސިލްސިލާގޮތެއްގައި ބާއްވާ މިފަދަ 3 ވަނަ މުބާރާތެވެ. މިއަހަރުގެ މުބާރާތުގެ އެކަމޮޑޭޝާން ޕާޓްނަރ އަކީ “ނިރުވާނާ އިން ލާމު” އެވެ. ސްޕޮންސަރުންގެ ތެރޭގައި “ލ. ގަމު ކައުންސިލް”، “ލ. ގަން ޕޮލިސް ސްޓޭޝަން”، “ދިރާގު”، “އައިލެންޑާސް އެސޯސިއޭޝަން” އަދި “އަމީގޯސް ސްޕޯޓްސް ކްލަބް” ހިމެނެއެވެ. އަދި ހަމަ އެހެންމެ އެމް.އެން.ޔޫގެ ލ. ގަން ކެމްޕަހުން ދެއްވާ ފުރިހަމަ އެއްބާރުލުމާއި އެހީތެރިކަން ފާހަގަކުރެވެއެވެ.

ލިޔުނީ: އާމިނަތު ސަމާ މުހައްމަދު،

މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ