ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އާއި ބައެއް ކޮލެޖު ޔުނިވާރސިޓީތަކުގެ ސްޓޫޑެންޓް އެސޯސިއޭޝަންތައް އަދި ”މާރސީ“ ޖަމުއިއްޔާ ގުޅިގެން ފަލަސްޠީނުގެ ރައްޔިތުންނަށް އެހީތެރިވުމަށް ޙަރަކާތްތަކެއް ހިންގުމަށް ނިންމައިފިއެވެ.
މިޙަރަކާތްތަކަކީ ފަލަސްޠީނުގެ މުސްލިމުންނާއި ދެކޮޅަށް އިސްރާއީލުގެ ޔަހޫދީން ހިންގަމުން އަންނަ ލާއިންސާނީ އަމަލުތަކާއި ގުޅިގެން ފަލަސްޠީނުގައި ހާލުގައި ޖެހިފައިތިބި މުސްލިމުންނަށް މާލީ އެހީތެރިކަން ފޯރުކޮށްދީ މިކަމަށް ރައްޔިތުން ހޭލުންތެރިކުރުވުމަށް ހިންގޭ ޙަރަކާތްތަކެކެވެ.
އެގޮތުން މިޙަރަކާތްތަކުގެ ތެރެއިން ފަލަސްޠީނުގައި ކުރެވެމުންދާ ހަނގުރާމައާއި ފަލަސްޠީނުގެ ތާރީޚުގެ އިތުރުން މަސްޖިދުލް އަޤްޞާ އާއި ގުޅޭގޮތުން އާންމުންނަށް މަޢުލޫމާތުދީ ހޭލުންތެރި ކުރުވުމަށް ޕެނަލް ޑިސްކަޝަންތައް ބޭއްވުމާއި ޓީޝާޓް އަދި މާސްކް ވިއްކުމަށް ވަނީ ހަމަޖެހިފައެވެ. މީގެއިތުރުން ފުރަބަންދަށް އެޗްޕީއޭއިން ލުއިދޭމިންވަރަކުން މިސްކިތްތައް ކައިރީ ފަންޑުފޮށި ބެހެއްޓުމަށްވަނީ ހަމަޖެހިފައެވެ.
މިހާތަނަށް މިޙަރަކާތްތަކުގައި ވިލާ ކޮލެޖް، ކްލިކް ކޮލެޖް، ސައިރެކްސް ކޮލެޖް، މެޕްސް ކޮލެޖް، އެމްއައި ކޮލެޖް، އިސްލާމިކް ޔުނިވަރސިޓީ އޮފް މޯލްޑިވްސް (އައިޔޫއެމް)، އަދި އެވިޑް ކޮލެޖުން ވަނީ ބައިވެރިވެފައެވެ. މި ޙަރަކާތްތަކުން ލިބޭ ފައިސާ މާރސީ ގެ އެކައުންޓައް ޖަމާކުރުމަށްވަނީ ނިންމާފައެވެ. އަދި އެފައިސާ އިންޓަނޭޝަނަލް އެއިޑް ކެމްޕެއިން (އައިއޭސީ) މެދުވެރިކޮށް ފަލަސްޠީނުގެ ރައްޔިތުންނަށް ފޯރުކޮށްދިނުމަށް ހަމަޖެހިފައެވެ.
މިޙަރަކާތުގައި ވީހާވެސް ގިނަބަޔަކު ބައިވެރިވެ، ވެދެވެންއޮތް މިންވަރަކުން އެހީތެރިކަމެއް ދެއްވުމަކީ މިޙަރަކާތް ހިންގާ ޖަމިއްޔާތަކުގެ ވަރަށް ބޮޑު އެދުމެކެވެ.
