މަތީ ތައުލީމް ހާސިލްކުރާ ދަރިވަރުންނާއި، މާސީ ގުޅިގެން ފަލަސްޠީނު ރައްޔިތުންނަށް އެހީވުމަށް ބާއްވާ ހަރަކާތްތަކުގައި ހިމެނޭ ޕެނަލް ޑިސްކަޝަން ހުކުރު ދުވަހުގެރޭ ބޭއްވުމަށް ނިންމައިފިއެވެ.
ހުކުރު ދުވަހުގެރޭ 09:00 ގައި ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ފޭސްބުކް ޕޭޖުން މި ޕެނަލް ޑިސްކަޝަން ދައްކާނެއެވެ.
މި ޕެނަލް ޑިސްކަޝެންގައި ބައިވެރިވަޑައިގަންނަވާނީ، ސަލަފް ޖަމިއްޔާގެ ފަރާތުން، އައްޝައިޚް އަޙްމަދު ސަމީރު ބިން އިބްރާހީމް އަދި އައްޝައިޚް މުޖުޠަބާ ޙަމީދެވެ.
އެމް.އެން.ޔޫ.އެސް.ޔޫގެ ރައީސް އަބްދުﷲ ޝަހުނީޒް ވިދާޅުވީ، ފަލަސްޠީނު ރައްޔިތުންނަށް އެހީވުމަށް މަތީ ތައުލީމު ހާސިލްކުރާ ދަރިވަރުންނާއި މާސީ ގުޅިގެން ކުރިޔަށް ގެންދާ ހަރަކާތްތަކުގެ ތެރެއިން ޕެނަލް ޑިސްކަޝަން ކުރިޔަށް ގެންދާން ނިންމީ މަތީ ތައުލީމު ހާސިލްކުރާ ދަރިވަރުންނާއި، އާންމުންނަށް ފަލަސްޠީނުގެ ވާހަކަތައް ގެނަސްދިނުމަކީ މުހިންމުކަމަކަށް ވުމާއިއެކުގައި ކަމަށެވެ. އަދި މިއީ ފަލަސްޠީނު ރައްޔިތުންނަށް އެހީވުމަށް ހިންގާ ހަރަކާތްތަކުގެ ތެރެއިން ހިންގޭ އެންމެ މުހިންމު އެއް ހަރަކާތް ކަމަށް ޝަހުނީޒް ވިދާޅުވިއެވެ.
މަތީ ތައުލީމު ހާސިލްކުރާ ދަރިވަރުންނާއި މާސީ ގުޅިގެން ކުރިޔަށް ގެންދާ މިހަރަކާތުގައި މިހާތަނަށް އެމް.އެން.ޔޫ.އެސް.ޔޫގެ އިތުރުން އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް)، ވިލާ ކޮލެޖް، ކްލިކް ކޮލެޖް، ސައިރެކްސް ކޮލެޖް، މެޕްސް ކޮލެޖް، އެމްއައި ކޮލެޖް އަދި އެވިޑް ކޮލެޖުން ވަނީ ބައިވެރިވެފައެވެ. އަދި ކުރިޔަށް އޮތްތަނުގައި އިތުރު ކޮލެޖުތަކުން ބައިވެރިވާނެ ކަމަށް ހަރަކާތް އިންތިޒާމް ކުރާ ފަރާތުން ވަނީ ބުނެފައެވެ.
މިހަރަކާތުގައި ކުރިޔަށް އޮތްތަނުގައި ޓީޝާޓް ވިއްކުމާއި، މާސްކު ވިއްކުމުގެ އިތުރުން ހެލްތު ޕްރޮޓެކްޝަން އެޖެންސީ (އެޗް.ޕީ.އޭ)ގެ ހުއްދަ ލިބިއްޖެ ނަމަ މިސްކިތްތަކުގެ ބޭރުގައި ފަންޑު ފޮށި ބެހެއްޓުމުގެ ހަރަކާތެއް ކުރިޔަށް ގެންދާނެއެވެ.
މިހަރަކާތުން ލިބޭ ފައިސާ މާސީއާ ހަވާލުކުރުމަށް ވަނީ ނިންމާފައެވެ. އަދި އެ ފައިސާ މާސީ މެދުވެރިކޮށް އިންޓަނޭޝަނަލް އެއިޑް ކެމްޕެއިން (އައި.އޭ.ސީ) މެދުވެރިކޮށް ފަލަސްޠީނުގެ ރައްޔިތުންނަށް ފޯރުކޮށްދޭނެއެވެ.
ފަލަސްޠީނުގެ ޣާޒާއަށް އިސްރާއީލުގެ ޔަހޫދީން ދެމުން ގެންދާ ހަމަލާތަކުގައި އެތަށް ބަޔަކު ގެދޮރު ދޫކޮށް ރެފިއުޖީ ކޭމްޕުތަކަށް ބަދަލުވެފައިވާއިރު، މި ހަމަލާތަކުގައި ފަލަސްޠީނުގެ އެތަށް ރައްޔިތުންނެއް ވަނީ ޝަހީދުވެފައެވެ. އަދި އަނިޔާވި މީހުންގެ އަދަދު 2000ން މަތިވެފައިވާ ކަމަށް ރިޕޯޓްތައް ބުނެއެވެ.
