ޔޫރޯ މުބާރާތާ ދިމާކޮށް މި މުބާރާތުގެ ފޯރި އާންމުންގެ ތެރޭގައި އިތުރުކުރުމަށާއި، މާލޭގެ ފުރަބަންދު ހާލަތުގައި ގޭގައި ތިބެގެން ޝައުޤުވެރިކަމާއެކު ބައިވެރިވެވޭނެ ޙަރަކާތެއް އާންމުންނާ ހަމައަށް ގެނެސްދިނުމުގެ މަޤްޞަދުގައި ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ”އެމް.އެން.ޔޫ.އެސް.ޔޫ ލޮކްޑައުން ޔޫރޯ ފޯރި“ ނަމުގައި މުބާރާތެއް ކުރިއަށް ގެންދިއުމަށް ނިންމައިފިއެވެ. މި މުބާރާތުގައި ބައިވެރިވުމުގެ ފުރުސަތު ޢާންމުންނަށް ހުޅުވާލެވިފައިވާއިރު، މި މުބާރާތް ކުރިއަށް ގެންދާނީ އެމް.އެން.ޔޫ.އެސް.ޔޫގެ ފޭސްބުކް ޕޭޖުގައެވެ.
މި މުބާރާތުގައި ޔޫރޯގެ މެޗުތައް ވަނީ 7 ބުރަކަށް ބަހާލެވިފައެވެ. އަދި މީގެން ކޮންމެ ބުރެއްގައި އެންމެ ގިނަ ޕޮއިންޓް ހޯދާ ފަރާތަށް އިނާމު ހުށަހެޅިފައިވާއިރު، މުޅި މުބާރާތުގައި އެންމެ ގިނަ ޕޮއިންޓް ހޯދާ 3 ފަރާތަށް އަގުހުރި އިނާމުތައްވަނީ ހުށަހެޅިފައެވެ.
ޗެލެންޖުގެ ބުރުތައް:
(ހ) ގްރޫޕް ސްޓޭޖް ފުރަތަމަ ބުރު (12 މެޗު)
(ށ) ގްރޫޕް ސްޓޭޖް ދެވަނަ ބުރު (12 މެޗު)
(ނ) ގްރޫޕް ސްޓޭޖް ތިންވަނަ ބުރު (12 މެޗު)
(ރ) ރައުންޑް އޮފް 16 (8 މެޗު)
(ބ) ކުއާޓާ ފައިނަލް (4 މެޗު)
(ޅ) ސެމީ ފައިނަލް (2 މެޗު)
(ކ) ފައިނަލް (1 މެޗު)
ޕޮއިންޓު ދޭނެގޮތުގެ އުސޫލު:
(ހ) ހޯމް ޓީމްގެ ރަނގަޅު ސްކޯ ދިމާކޮށްފިނަމަ 1 ޕޮއިންޓު
(ށ) އަވޭ ޓީމްގެ ރަނގަޅު ސްކޯ ދިމާކޮށްފިނަމަ 1 ޕޮއިންޓު
(ނ) ދެ ޓީމުގެ ފަރަގު ދިމާކޮށްފިނަމަ 1 ޕޮއިންޓު
(ރ) ޕޯސްޓަރުގައި ފުރަތަމަ ހިމެނިފައިވާ ޓީމަކީ ހޯމް ޓިމެވެ.
(ބ) ޕޯސްޓަރުގައި ދެވަނައަށް ހިމެނިފައިވާ ޓީމަކީ އަވޭ ޓިމެވެ.
މުބާރާތުގެ ޤަވާޢިދު މި ލިންކުން ފެންނާނެއެވެ.
މުބާރާތުގައި ބައިވެރިވި ނަމަވެސް، އެމް.އެން.ޔޫ ދަރިވަރުން އެކުދިންގެ އިމްތިޙާނުތަކަށް ރަނގަޅަށް ފަރިތަކުރުމަށާއި، ހުރިހާ ބައިވެރިންވެސް ވީވަރަކުން ގޭގައި ތިބެ، ކޯވިޑް-19ގެ ބަލިމަޑުކަމުން އަރައިގަތުމަށް އެންމެން ގުޅިގެން މަސައްކަތްކުރުމަށް އެމް.އެން.ޔޫ.އެސް.ޔޫ އިން އިލްތިމާސްކުރެއެވެ.
