ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ބާއްވާ ދެވަނައަށް އެންމެ ބޮޑު މުބާރާތް ”އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތް 2021“ ގެ ފިރިހެން ޑިވިޝަނުގެ ފުރަތަމަ މެޗު ވާދަވެރި ކުޅުމަކަށްފަހު އެމް.އެން.ޔޫ ބިޒްނަސް ސްކޫލުން ކާމިޔާބު ކޮށްފިއެވެ.
މި މުބާރާތުގެ ފުރަތަމަ މެޗުގައި ނުކުތީ ގްރޫޕް ”އޭ“ ގެ ފެކަލްޓީ އޮފް އިންޖިނިއަރިންގ ސައިންސް އެންޑް ޓެކްނޮލޮޖީ (ފެސްޓު) އާއި އެމް.އެން.ޔޫ ބިޒްނަސް ސްކޫލެވެ. މިމެޗު އެމް.އެން.ޔޫ ބިޒްނަސް ސްކޫލުން ކާމިޔާބުކުރީ 2 ސެޓު 1 ސެޓުންނެވެ.
ވާދަވެރި ކުޅުމެއް ފެނިގެންދިޔަ މި މެޗުގެ ފުރަތަމަ ސެޓު ބީއެސްއިން ކާމިޔާބުކުރީ 25-15 ގެ ނަތީޖާއަކުންނެވެ. އެކަމަކު މެޗުގެ ދެވަނަ ސެޓުގައި ފެސްޓުން ވަނީ އެމް.އެން.ޔޫ ބިޒްނަސް ސްކޫލުގެ މައްޗަށް ކުރި ހޯދާފައެވެ. މި ސެޓު ފެސްޓުން ކާމިޔާބުކުރީ 17-25 ގެ ނަތީޖާއަކުންނެވެ.
މެޗުގެ ފަހު ސެޓުގައި ވެސް ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު މި ސެޓު އެމް.އެން.ޔޫ ބިޒްނަސް ސްކޫލުން ކާމިޔާބުކުރީ 15-8 ގެ ނަތީޖާއަކުންނެވެ.
މި މެޗުގެ މޮޅު ކުޅުންތެރިޔާއަކީ އެމް.އެން.ޔޫ ބިޒްނަސް ސްކޫލުގެ ހަސަން ޖައިލަމް ރިޔާޒެވެ.
މި ގްރޫޕްގެ ދެވަނަ މެޗުގައި ފެކަލްޓީ އޮފް ހެލްތު ސައިންސް (އެފް.އެޗް.އެސް) އަދި ސެންޓަރ ފޯރ ފައުންޑޭޝަން ސްޓަޑީސް (ސީ.އެފް.އެސް) ބައްދަލުކުރާ މެޗު ކުޅޭނީ ހުކުރު ދުވަހުގެ މެންދުރު 14:00 ގައެވެ.
މި މުބާރާތުގެ ގްރޫޕް ސްޓޭޖުގެ މެޗުތައް ކުޅުމަށް ހަމަޖެހިފައިވަނީ 3 ސެޓަށެވެ. އެކަމަކު މުބާރާތުގެ ސެމީ ފައިނަލުން ފެށިގެން ކުޅޭނީ 5 ސެޓަށެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ ދަރިވަރުންގެ ޔޫނިއަންގެ ދެވަނަ އަށް އެންމެ ބޮޑު ހަރަކާތެވެ. މި މުބާރާތް ބޭއްވުމުގެ މައިގަނޑު މަގުސަދަކީ ދަރިވަރުންގެ މެދުގައި އެކުވެރިކަން އާލާކޮށް ވޮލީބޯޅައިގެ ގަވާއިދުތަކަށް އަހުލުވެރިކޮށް ވޮލީބޯޅަ ކުޅުމުގެ ފޯރި އިތުރުކުރުމެވެ. 2015 ވަނަ އަހަރުން ފެށިގެން މެދުކެނޑުމެއްނެތި ކުރިއަށްދާ މި މުބާރާތަކީ އެމް.އެން.ޔޫގެ ފެކަލްޓީ/ސެންޓަރ/ކެމްޕަސްތަކުގައި ގާއިމު ކުރެވިފައިވާ ދަރިވަރުންގެ ޔޫނިއަންގެ ގޮފިތަކަށް ހުޅުވާލައިގެން ބާއްވާ މުބާރާތެކެވެ. މި އަހަރުގެ މުބާރާތަކީ މީގެ 7 ވަނަ މުބާރާތް ކަމަށްވާއިރު، މިއަހަރު ޖުމްލަ 15 ޓީމަކުން މުބާރާތުގައި ބައިވެރިވެފައިވެއެވެ. އެއީ ފިރިހެން ޑިވިޝަނުގައި 7 ޓީމު އަދި އަންހެން ޑިވިޝަނުގައި 8 ޓީމެވެ. މިފަހަރުގެ މުބާރާތަކީ މިހާތަނަށް ދަރިވަރުންގެ ޔޫނިއަންގެ މުބާރާތެއްގައި ފުރަތަމަ ފަހަރަށް އެމް.އެން.ޔޫގެ އަތޮޅުތެރޭ ކެމްޕަހަކުން ޓީމެއް ބައިވެރިވާ ތާރީހީ މުބާރާތެވެ. އެގޮތުން ގަން ކެމްޕަހުގެ އަންހެން ޓީމުން މިއަހަރުގެ މުބާރާތުގައި ވަނީ ބައިވެރިވެފައެވެ.
