ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ބާއްވާ ”އިންޓަރ ފެކަލްޓީ ވޮލީބޯޅަ މުބާރާތް 2021“ ގެ ގްރޫޕް ”ބީ“ ގައި ސެންޓަރ ފޯރ ފައުންޑޭޝަން ސްޓަޑީޒް (ސީ.އެފް.އެސް) އަދި ސްކޫލް އޮފް ނާސިންގ (އެސް.އެން) އިން ކުޅުނު މެޗުތައް ކާމިޔާބު ކޮށްފިއެވެ.
ހޮނިހިރު ދުވަހު މެންދުރުފަހު ސީ.އެފް.އެސް އާއި، ގަން ކެމްޕަސް ބައްދަލުކުރި މެޗު ސީ.އެފް.އެސް އިން ކާމިޔާބުކުރީ ސީދާ ދެ ސެޓުންނެވެ. މެޗުގެ ސެޓުތައް ސީ.އެފް.އެސް އިން ގެންދިޔައީ، 25-10 އަދި 25-18 އިންނެވެ. މި މެޗުގެ މޮޅު ކުޅުންތެރިޔަކީ ސީ.އެފް.އެސްގެ ޖާޒީ ނަމްބަރު 3 އާއިޝަތު ލައިސާ މަޖީދު އެވެ.
މީގެ އިތުރުން ހޮނިހިރު ދުވަހު މެންދުރުފަހު ކުޅުނު ދެވަނަ މެޗުގައި އެސް.އެން އަދި ފެކަލްޓީ އޮފް ޝަރީއާ އެންޑް ލޯ (އެފް.އެސް.އެލް) ބައްދަލުކުރިއިރު، މި މެޗު އެސް.އެން އިން ވަނީ ފަސޭހަކަމާއިއެކު ސީދާ ދެ ސެޓުން ކާމިޔާބުކޮށްފައެވެ. އެއާއިއެކު އެސް.އެން އިން ވަނީ ކުޅުނު ދެމެޗު ކާމިޔާބުކޮށް ސެމީ ފައިނަލުގެ ޖާގަ ކަށަވަރު ކޮށްފައެވެ. އެސް.އެން އިން ކުޅުނު ފުރަތަމަ މެޗު ގަން ކެމްޕަސް އާއި ވާދަކޮށް ކާމިޔާބުކުރީ ވެސް ސީދާ ދެ ސެޓުންނެވެ. ހޮނިހިރު ދުވަހު ކުޅުނު މެޗުގެ ސެޓުތައް އެސް.އެން އިން ކާމިޔާބުކުރީ 25-16 އަދި 25-18 އިންނެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ ދަރިވަރުންގެ ޔޫނިއަންގެ ދެވަނަ އަށް އެންމެ ބޮޑު ހަރަކާތެވެ. މި މުބާރާތް ބޭއްވުމުގެ މައިގަނޑު މަގުސަދަކީ ދަރިވަރުންގެ މެދުގައި އެކުވެރިކަން އާލާކޮށް ވޮލީބޯޅައިގެ ގަވާއިދުތަކަށް އަހުލުވެރިކޮށް ވޮލީބޯޅަ ކުޅުމުގެ ފޯރި އިތުރުކުރުމެވެ. 2015 ވަނަ އަހަރުން ފެށިގެން މެދުކެނޑުމެއްނެތި ކުރިއަށްދާ މި މުބާރާތަކީ އެމް.އެން.ޔޫގެ ފެކަލްޓީ/ސެންޓަރ/ކެމްޕަސްތަކުގައި ގާއިމު ކުރެވިފައިވާ ދަރިވަރުންގެ ޔޫނިއަންގެ ގޮފިތަކަށް ހުޅުވާލައިގެން ބާއްވާ މުބާރާތެކެވެ. މި އަހަރުގެ މުބާރާތަކީ މީގެ 7 ވަނަ މުބާރާތް ކަމަށްވާއިރު، މިއަހަރު ޖުމްލަ 15 ޓީމަކުން މުބާރާތުގައި ބައިވެރިވެފައިވެއެވެ. އެއީ ފިރިހެން ޑިވިޝަނުގައި 7 ޓީމު އަދި އަންހެން ޑިވިޝަނުގައި 8 ޓީމެވެ. މިފަހަރުގެ މުބާރާތަކީ މިހާތަނަށް ދަރިވަރުންގެ ޔޫނިއަންގެ މުބާރާތެއްގައި ފުރަތަމަ ފަހަރަށް އެމް.އެން.ޔޫގެ އަތޮޅުތެރޭ ކެމްޕަހަކުން ޓީމެއް ބައިވެރިވާ ތާރީހީ މުބާރާތެވެ. އެގޮތުން ގަން ކެމްޕަހުގެ އަންހެން ޓީމުން މިއަހަރުގެ މުބާރާތުގައި ވަނީ ބައިވެރިވެފައެވެ.
