އެމް.އެން.ޔޫ.އެސް.ޔޫ އިން ބާއްވާ އިންޓަރ ފެކަލްޓީ ވޮލީބޯޅަ މުބާރާތުގެ 5 ވަނަ ދުވަހުގެ އަންހެން ޑިވިޝަން މެޗުތައް ފެކަލްޓީ އޮފް ހެލްތު ސައިންސަސް (އެފް.އެޗް.އެސް) އާއި އެމް.އެން.ޔޫ ބިޒްނަސް ސްކޫލް (ބީ.އެސް) އިން ކާމިޔާބުކޮށްފިއެވެ.
އަންގާރަ ދުވަހުގެ ރޭ ކުޅުނު ފުރަތަމަ މެޗުގައި އެފް.އެޗް.އެސް އަދި ސްކޫލް އޮފް މެޑިސިން (އެސް.އެމް) ބައްދަލުކޮށް ފާސޭހަކަމާއިއެކު ދެ ސެޓުވެސް ނަގާފައި ވަނީ އެފް.އެޗް.އެސް އިންނެވެ. ފުރަތަމަ ސެޓު 25-07 ޕޮއިންޓުން ނެގި އިރު ދެވަނަ ސެޓު ގެންގޮސްފައިވަނީ 25-06 ގެ ނަތީޖާއަކުންނެވެ. މި މެޗުގެ މޮޅު ކުޅުންތެރިޔާއަށް ހޮވިފައިވަނީ އެފް.އެޗް.އެސްގެ ޖަރޒީ ނަންބަރު 08، އާސިމާ އަބްދުލް ރައްޒާޤެވެ.
މިރޭގެ ދެވަނަ މެޗުގައި ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) އާއި ވާދަކޮށް ކުރި ހޯދީ ބިޒްނަސް ސްކޫލްއިންނެވެ. މި މެޗު ބިޒްނަސް ސްކޫލް ސީދާ ދެ ސެޓުން ކާމިޔާބު ކުރި އިރު ފުރަތަމަ ސެޓު ގެންގޮސްފައިވަނީ 25-09 ގެ ނަތިޖައަކުންނެވެ. އަދި ދެވަނަ ސެޓު ނަގާފައި 25-04 ގެ ނަތިޖާއަކުންނެވެ. މި މެޗުގެ މޮޅު ކުޅުންތެރިޔާއަށް ހޮވިފައިވަނީ ބިޒްނަސް ސްކޫލުގެ ޖަރޒީ ނަންބަރު 11، ފިރުޝާނާ ނަސީރެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ 2015 ވަނަ އަހަރުން ފެށިގެން ސިލްސިލާގޮތެއްގައި މެދުކެނޑުމެއްނެތި ކޮންމެ އަހަރަކު ބާއްވަމުން އަންނަ މުބާރާތެކެވެ. މިއަހަރު މި ބޭއްވެނީ މިފަދަ 8 ވަނަ މުބާރާތެވެ. މިއަހަރުގެ މުބާރާތުގެ ސްޕޮންސަރުންގެ ތެރޭގައި އީސްޓޭޓް ކޮންސްޓްރަކްޝަން ސޮލިއުޝަންސް، އެންޒީ، އޭވް އަދި އޮއޭސެސް ހިމެނެއެވެ. މުބާރާތުގެ ޕްރިންޓިންގ ޕާޓްނަރ އަކީ ކުލަ މޯލްޑިވްސް އެވެ. އަދި އޮންލައިން މީޑިއާ ޕާޓްނަރ އަކީ ސަން މީޑިއާ ގްރޫޕެވެ.
