އިންޓަރ ފެކަލްޓީ ވޮލީ ބޯޅަ މުބާރާތުގެ އަންހެން ޑިވިޝަންގެ އެއް ސެމީ ފައިނަލުގައި މިދިޔަ އަހަރުގެ ޗެމްޕިއަން އެމް.އެން.ޔޫ.ބީ.އެސް އާއި އެފް.އެޗް.އެސް އަދި އަނެއް ސެމީ ފައިނަލުގައި އެސް.އެން އަދި ސީ.އެފް.އެސް ވާދަކުރަން ޖެހިއްޖެއެވެ.
މި މުބާރާތުގެ އަންހެން ޑިވިޝަނުގައި އަލުން ކުޅެން ޖެހުނު މެޗު ބުރާސްފަތިދުވަހުގެރޭ ވަނީ ކުޅެވިފައެވެ. ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް) އާއި އެމް.އެން.ޔޫ.ބީ.އެސް ބައްދަލުކުރި މެޗު އެމް.އެން.ޔޫ.ބީ.އެސް އިން ކާމިޔާބުކުރީ 2-0 ސެޓުންނެވެ. ފޯރިގަދަ މިމެޗުގެ ފުރަތަމަ ސެޓު ނަގާފައިވަނީ 25-23 ންނެވެ. އަދި ދެވަނަ ސެޓު ގެންދިޔައީ 25-20 ންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ އެމް،އެން.ޔޫ.ބީ.އެސް ޖާރޒީ ނަންބަރ 11، ފިރުޝާނާ ނަސީރެވެ.
މި މެޗުތަކުގެ ނަތީޖާއާއެކު، އަންހެން ޑިވިޝަންގެ ސެމީ ފައިނަލް މެޗުތައް ވަނީ ޔަގީންވެފައެވެ. ސެމީގެ ފުރަތަމަ މެޗުގައި ވާދަކުރާނީ ގްރޫޕް އޭގެ އެއްވަނަ ސްކޫލް އޮފް ނާރސިންގ އާއި ގްރޫޕް ބީގެ ދެވަނަ ސެންޓަރ ފޯ ފައުންޑޭޝަން ސްޓަޑީޒެވެ. ދެވަނަ މެޗުގައި ބައްދަލުކުރާނީ ގްރޫޕް ބީގެ އެއްވަނަ އެމް.އެން.ޔޫ ބިޒްނަސް ސްކޫލާއި ގްރޫޕް އޭގެ ދެވަނަ ފެކަލްޓީ އޮފް ހެލްތު ސައިންސަސް އެވެ.
ސެމީ ފައިނަލް އޮންނާނީ 18 މާރިޗުވާ ހުކުރު ދުވަހެވެ. ފުރަތަމަ މެޗު ފަށާ ގަޑިއަކީ 03.00ކަމަށްވާއިރު، މުބާރާތުގެ ހުރިހާ މެޗެއްވެސް ކުޅެވެމުންދަނީ އެމް.އެން.ޔޫ ޕީ.އީ ހޯލުގައެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ 2015 ވަނަ އަހަރުން ފެށިގެން ސިލްސިލާގޮތެއްގައި މެދުކެނޑުމެއްނެތި ކޮންމެ އަހަރަކު ބާއްވަމުން އަންނަ މުބާރާތެކެވެ. މިއަހަރު މި ބޭއްވެނީ މިފަދަ 8 ވަނަ މުބާރާތެވެ. މިއަހަރުގެ މުބާރާތުގެ ސްޕޮންސަރުންގެ ތެރޭގައި އީސްޓޭޓް ކޮންސްޓްރަކްޝަން ސޮލިއުޝަންސް، އެންޒީ، އޭވް އަދި އޮއޭސެސް ހިމެނެއެވެ. މުބާރާތުގެ ޕްރިންޓިންގ ޕާޓްނަރ އަކީ ކުލަ މޯލްޑިވްސް އެވެ. އަދި އޮންލައިން މީޑިއާ ޕާޓްނަރ އަކީ ސަން މީޑިއާ ގްރޫޕެވެ.
