ފަސޭހަކަމާއެކު ސީ.އެފް.އެސް ބަލިކޮށް އެސް.އެން ފައިނަލަށް

ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ބާއްވާ ދެވަނައަށް އެންމެ ބޮޑު މުބާރާތްކަމުގައިވާ އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯލް މުބާރާތުގެ އަންހެން ޑިވިޝަނުގެ ފުރަތަމަ ސެމީގައި ސެންޓަރ ފޯރ ފައުންޑޭޝަން ސްޓަޑީޒް (ސީ.އެފް.އެސް) ފަސޭހަކަމާއެކު ބަލިކޮށް ސްކޫލް އޮފް ނާސިންގ (އެސް.އެން) އިން ފައިނަލަށް ދަތުރުކޮށްފިއެވެ.

މި މުބާރާތުގެ މިދިޔަ އަހަރުގެ ފައިނަލުގައިވެސް އެސް.އެން ކުޅެފައިވެއެވެ. އެކަމަކު މިދިޔަ އަހަރު ފައިނަލުގައި އެމް.އެން.ޔޫ ބިޒްނަސް ސްކޫލުން ވަނީ އެސް.އެންގެ މައްޗަށް ކުރިހޯދާ ޗެމްޕިއަންކަން ހޯދައިފައެވެ. އަދި އޭގެ ކުރިން 2019 ވަނަ އަހަރުގެ ފައިނަލުގައިވެސް އެސް.އެން ވާދަކޮށްފައިވާއިރު، އެ މުބާރާތުގައި އެމް.އެން.ޔޫ ބިޒްނަސް ސްކޫލުގެ މައްޗަށް ކުރިހޯދާފައިވަނީ އެސް.އެން އިންނެވެ.

ހުކުރު ދުވަހު ހަވީރު އެމް.އެން.ޔޫ ޕީ.އީ ހޯލުގައި ކުޅުނު ސެމީ ފައިނަލު މެޗު އެސް.އެން އިން ކާމިޔާބުކުރީ ސީދާ ތިން ސެޓުންނެވެ.

މި މެޗުގެ ފުރަތަމަ ސެޓުގައި ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މި ސެޓު އެސް.އެން އިން ގެންދިޔައީ 25-17 އިންނެވެ.

މެޗުގެ ދެވަނަ ސެޓު އަދި ތިންވަނަ ސެޓުގައި އެސް.އެންގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، އެސް.އެން އިން މެޗުގެ ދެވަނަ ސެޓު ގެންދިޔައީ، 25-13 އިންނެވެ. އަދި ތިންވަނަ ސެޓު އެސް.އެން އިން ގެންދިޔައީ 25-15 އިންނެވެ.

އަންހެން ޑިވިޝަނުގެ ސެމީގެ ދެވަނަ މެޗުގައި ބައްދަލުކުރާނީ އެމް.އެން.ޔޫ ބިޒްނަސް ސްކޫލް އަދި ފެކަލްޓީ އޮފް ހެލްތު ސައިންސަސް އެވެ.

އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ 2015 ވަނަ އަހަރުން ފެށިގެން ސިލްސިލާގޮތެއްގައި މެދުކެނޑުމެއްނެތި ކޮންމެ އަހަރަކު ބާއްވަމުން އަންނަ މުބާރާތެކެވެ. މިއަހަރު މި ބޭއްވެނީ މިފަދަ 8 ވަނަ މުބާރާތެވެ. މިއަހަރުގެ މުބާރާތުގެ ސްޕޮންސަރުންގެ ތެރޭގައި އީސްޓޭޓް ކޮންސްޓްރަކްޝަން ސޮލިއުޝަންސް، އެންޒީ، އޭވް އަދި އޮއޭސެސް ހިމެނެއެވެ. މުބާރާތުގެ ޕްރިންޓިންގ ޕާޓްނަރ އަކީ ކުލަ މޯލްޑިވްސް އެވެ. އަދި އޮންލައިން މީޑިއާ ޕާޓްނަރ އަކީ ސަން މީޑިއާ ގްރޫޕެވެ.