ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިން ބާއްވާ އިންޓަރ ފެކަލްޓީ ވޮލީބޯޅަ މުބާރާތުގެ ސެމީގައި ފެކަލްޓީ އޮފް ހެލްތު ސައިންސަސް (އެފް.އެޗް.އެސް) ބަލިކޮށް އެންމެ ފަހުގެ ޗެމްޕިއަން އެމް.އެން.ޔޫ.ބީއެސް ފައިނަށް ދަތުރުކޮށްފިއެވެ.
މި މުބާރާތުގެ މިދިޔަ އަހަރުގެ ފައިނަލުގައިވެސް ވާދަކުރީ ސްކޫލް އޮފް ނާސިންގ (އެސް.އެން) އާއި އެމް.އެން.ޔޫ.ބީއެސް އެވެ. މިދިޔަ އަހަރު ފައިނަލުގައި އެމް.އެން.ޔޫ ބިޒްނަސް ސްކޫލުން ވަނީ އެސް.އެންގެ މައްޗަށް ކުރިހޯދާ ޗެމްޕިއަންކަން ހޯދައިފައެވެ. އަދި އޭގެ ކުރިން 2019 ވަނަ އަހަރުގެ ފައިނަލުގައިވެސް އެމް.އެން.ޔޫ ބިޒްނަސް ސްކޫލާއި އެސް.އެން ވާދަކޮށްފައިވާއިރު، އެ މުބާރާތުގައި ކުރިހޯދާފައިވަނީ އެސް.އެން އިންނެވެ.
އަންހެން ޑިވިޝަނުގެ ސެމީގެ ދެވަނަ މެޗު އެމް.އެން.ޔޫ.ބީއެސް އިން ކާމިޔާބުކުރީ ސީދާ ތިން ސެޓުންނެވެ.
މެޗުގެ ފުރަތަމަ ސެޓުގައި އެމް.އެން.ޔޫ.ބީ.އެސްގެ ފަރާތުން މޮޅު ކުޅުމެއް ފެނިގެންދިޔައިރު، މި ސެޓު އެ ޓީމުން ގެންދިޔައީ 20-25 އިންނެވެ.
މެޗުގެ ދެވަނަ ސެޓު އަދި ތިންވަނަ ސެޓުގައި ވާދަވެރި ކުޅުމެއް ފެނިގެންދިޔަ ނަމަވެސް މި ދެ ސެޓުވެސް ލީޑުކޮށްފައިވަނީ އެމް.އެން.ޔޫ.ބީ.އެސް އިންނެވެ. މި ދެ ސެޓު އެމް.އެން.ޔޫ.ބީ.އެސް އިން ގެންދިޔައީ 25-15 އަދި 25-16 އިންނެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ 2015 ވަނަ އަހަރުން ފެށިގެން ސިލްސިލާގޮތެއްގައި މެދުކެނޑުމެއްނެތި ކޮންމެ އަހަރަކު ބާއްވަމުން އަންނަ މުބާރާތެކެވެ. މިއަހަރު މި ބޭއްވެނީ މިފަދަ 8 ވަނަ މުބާރާތެވެ. މިއަހަރުގެ މުބާރާތުގެ ސްޕޮންސަރުންގެ ތެރޭގައި އީސްޓޭޓް ކޮންސްޓްރަކްޝަން ސޮލިއުޝަންސް، އެންޒީ، އޭވް އަދި އޮއޭސެސް ހިމެނެއެވެ. މުބާރާތުގެ ޕްރިންޓިންގ ޕާޓްނަރ އަކީ ކުލަ މޯލްޑިވްސް އެވެ. އަދި އޮންލައިން މީޑިއާ ޕާޓްނަރ އަކީ ސަން މީޑިއާ ގްރޫޕެވެ.
