ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ބާއްވާ އިންޓަރ ފެކަލްޓީ ވޮލީބޯޅަ މުބާރާތުގެ އަންހެން ޑިވިޝަން ފައިނަލުގައި އެމް.އެން.ޔޫ ބިޒްނަސް ސްކޫލް (އެމް.އެން.ޔޫ.ބީ.އެސް) ބަލިކޮށް ސްކޫލް އޮފް ނަރސިންގ (އެސް.އެން) ޗެމްޕިއަންކަން ހޯދައިފިއެވެ.
ހޮނިހިރު ދުވަހުގެ ރޭ ކުޅުނު ފައިނަލު މެޗުގައި މޮޅު ކުޅުމެއް ދައްކައި އެސް.އެން މޮޅުވީ ސީދާ 3 ސެޓުންނެވެ.
ވާދަވެރި މިމެޗުގެ ފުރަތަމަ ސެޓު އެސް.އެން އިން ގެންދިޔައީ 25-12 ންނެވެ. ގިނަ ސަޕޯޓަރުންތަކެއްގެ ސަޕޯޓާއިއެކު ކުޅުންތެރިންގެ ޖޯޝު އިތުރު ކޮށްދިން، ފައިނަލުގެ މި މެޗުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައެވެ. މި މެޗުގެ ދެވަނަ އަދި ތިންވަނަ ސެޓުގަައިވެސް މޮޅު ކުޅުމެއް ފެނިގެންދިޔައިރު، މިމެޗުގެ ސެޓުތައް ގެންގޮސްފައިވަނީ 25-13 އަދި 25-19 ންނެވެ. މިމެޗުގެ މޮޅު ކުޅުންތެރިޔާ އަށް ހޮވިފައިވަނީ އެސް.އެން ގެ ޖަރޒީ ނަންބަރު 02، މަރިޔަމް ނިޝާއެވެ.
މިއީ ސްކޫލް އޮފް ނާރސިންގ އިން މި މުބާރާތް ކާމިޔާބު ކުރި 2 ވަނަ ފަހަރެވެ. މުބާރާތުގެ އަންހެން ޑިވިޝަންގެ އެންމެ ކާމިޔާބު ޓީމުތަކަކީ ފެކަލްޓީ އޮފް އެޑިއުކޭޝަނާއި އެމް.އެން.ޔޫ ބިޒްނަސް ސްކޫލެވެ. ކޮންމެ ޓީމަކުންވެސް ވަނީ 3 ފަހަރު މުބާރާތް ކާމިޔާބުކޮށްފައެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ 2015 ވަނަ އަހަރުން ފެށިގެން ސިލްސިލާގޮތެއްގައި މެދުކެނޑުމެއްނެތި ކޮންމެ އަހަރަކު ބާއްވަމުން އަންނަ މުބާރާތެކެވެ. މިއަހަރު މި ބޭއްވީ މިފަދަ 8 ވަނަ މުބާރާތެވެ. މިއަހަރުގެ މުބާރާތުގެ ސްޕޮންސަރުންގެ ތެރޭގައި އީސްޓޭޓް ކޮންސްޓްރަކްޝަން ސޮލިއުޝަންސް، އެންޒީ، އޭވް އަދި އޮއޭސެސް ހިމެނެއެވެ. މުބާރާތުގެ ޕްރިންޓިންގ ޕާޓްނަރ އަކީ ކުލަ މޯލްޑިވްސް އެވެ. އަދި އޮންލައިން މީޑިއާ ޕާޓްނަރ އަކީ ސަން މީޑިއާ ގްރޫޕެވެ.
