ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ކުރިއަށް ގެންދާ ދީނީ ސުވާލު މުބާރާތް 1443 މިއަދު ފަށައިފިއެވެ.
މި މުބާރާތުގެ ސުވާލުތައް ގެނެސްދިނުމަށް ހަމަޖެހިފައިވަނީ ދެ ދުވަހުން އެއް ދުވަހުއެވެ. އަދި ރަމަޟާން މަސް ނިމެންދެން މި މުބާރާތް ކުރިއަށް ގެންދާނެއެވެ. މުބާރާތުގެ ސުވާލުތަކަށް ޖަވާބު ހުށަހެޅުމަށް ލިބޭނީ 48 ގަޑިއިރެވެ.
މި މުބާރާތުގެ ސުވާލުތަކާއި ސުވާލުތަކަށް ޖަވާބު ހުށަހެޅުމުގެ ލިންކް އެމް.އެން.ޔޫ.އެސް.ޔޫގެ ސޯޝަލް މީޑިއާގެ މަންސަތަކުން ފެންނާނެއެވެ. އެހެން އަހަރުތަކާ ޚިލާފަށް މި އަހަރުގެ މުބާރާތުގައި ގެނެސްދޭ ސުވާލުތަކާއެކު، އެ ސުވާލުތަކުގެ ޖަވާބު ލިބިގެންދާނެ ވީޑިއޯއެއް ވެސް ހިމަނާނެއެވެ. މި ވީޑިއޯ ތައްޔާރުކޮށްދެއްވާފައިވަނީ މުޙައްމަދު ޣާލިބުއެވެ.
ފުރަތަމަ ސުވާލު ބައްލަވާލެއްވުމަށް މި ލިންކަށް ވަދެވަޑައިގަންނަވާ!
މި އަހަރުގެ މުބާރާތުގައި ވެސް އެއް ވަނަ، ދެ ވަނަ އަދި ތިން ވަނަ ހޮވުމަށް ވަނީ ހަމަޖެހިފައެވެ. އަދި ވަނަތަކަށް ހޮވޭ ފަރާތްތަކަށް އިނާމުތައް ވެސް ލިބޭ ގޮތަށް ވަނީ ހަމަޖެހިފައެވެ.
މި މުބާރާތަކީ 2018 ވަނަ އަހަރުން ކޮންމެ އަހަރަކު ވެސް އެމް.އެން.ޔޫ.އެސް.ޔޫން ކުރިއަށް ގެންދާ މުބާރާތެކެވެ. 2018 ވަނަ އަހަރާއި 2019 އަހަރު މި ކުއިޒް ކުރިއަށް ގެންދިޔުމަށްފަހު، ކޮވިޑް-19ގެ ޢާލަމީ ވަބާގެ ސަބަބުން 2020 ވަނަ އަހަރު ބޭއްވޭ ގޮތް ވަނީ ނުވެފައެވެ. އެއް އަހަރުގެ މެދު ކެނޑުމަކަށްފަހު އަނެއްކާ އަލުން މުބާރާތް ފަށާފައިވަނީ 2021 ވަނަ އަހަރުއެވެ.
