ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ކުރިއަށްގެންދާ ހަޔަރ އެޑިއުކޭޝަން ވޮލީބޯލް ޗެމްޕިއަންޝިޕުގެ އަންހެން ޑިވިޝަންގެ ޗެމްޕިއަންކަން ހޯދައިފިއެވެ.
ޗެމްޕިއަންކަން އެމް.އެން.ޔޫ އިން ހޯދީ މި ޑިވިޝަނުގެ 2 ވަނަ މެޗު 3 ސެޓު 1 ސެޓުން އެވިޑް ކޮލެޖުގެ މައްޗަށް ކުރިހޯދައިގެންނެވެ.
މި މެޗުގެ ފުރަތަމަ 2 ސެޓާއި ފަހު ސެޓު އެމް.އެން.ޔޫ އިން ކާމިޔާބުކުރި އިރު ތިންވަނަ ސެޓު ކާމިޔާބު ކޮށްފައިވަނީ އެވިޑް ކޮލެޖުންނެވެ. ވާދަވެރި މި މެޗުގެ ފުރަތަމަ ދެ ސެޓު އެމް.އެން.ޔޫ އިން ގެންދިޔައީ 25-20 އަދި 25-23 ގެ ނަތީޖާއަކުންނެވެ. މޮޅު ކުޅުމެއް ދައްކައި ބޮޑު ލީޑަކުން އެވިޑް ކޮލެޖް ތިންވަނަ ސެޓު ގެންދިޔައީ 25-17 އިންނެވެ. އަދި ފަހު ސެޓު އެމް.އެން.ޔޫ އިން ކާމިޔާބުކުރީ 25-21 ގެ ނަތީޖާއަކުންނެވެ.
މި މެޗުގެ މޮޅުކުޅުންތެރިޔާ އަށް ހޮވިފައިވަނީ އެމް.އެން.ޔޫގެ ޖަރޒީ ނަންބަރު 17 ފާތިމަތު ސަމްހާއެވެ.
އަންހެން ޑިވިޝަނުގައި ވާދަކުރީ ޖުމްލަ 2 ޓީމު ކަމަށްވާތީ، ކުޅުމަށް ހަމަޖެހިފައި އޮތީ މި 2 ޓީމުގެ މެދުގައި 3 މެޗެވެ. މިތަނުން 2 މެޗު ކާމިޔާބުކުރާ ޓީމަކީ ޗެމްޕިއަން ޓީމުގެ ގޮތުގައި ކަނޑައެޅުމަށް އޮތީ ނިންމާފައެވެ. ފުރަތަމަ 2 މެޗު އެމް.އެން.ޔޫ އިން ކާމިޔާބުކޮށްފައިވާތީ 3 ވަނަ މެޗު ކުޅުމަށް ހަމަޖެހިފައެއް ނުވެއެވެ.
އެމް.އެން.ޔޫ އިން ވަނީ މީގެ ކުރިން ވޮލީބޯލް އެސޯސިއޭޝަން އޮފް މޯލްޑިވްސް (ވީ.އޭ.އެމް) އިން ކުރިއަށް ގެންދިޔަ އިންޓަރ ކޮލެޖު/ ޔުނިވަރސިޓީ ވޮލީބޯލް މުބާރާތުގެ އަންހެން އަދި ފިރިހެން ޑިވިޝަނުގެ މުބާރާތް މިލްކުކޮށްފައެވެ. އަދި މި މުބާރާތުގެ އެންމެ ކާމިޔާބު ޓީމަކީވެސް އެމް.އެން.ޔޫ އެވެ. އެގޮތުން އެމް.އެން.ޔޫ އިން ވަނީ ޖުމްލަ ފަސް ފަހަރު އިންޓަރ ކޮލެޖު/ ޔުނިވަރސިޓީ ވޮލީބޯލް މުބާރާތް ކާމިޔާބުކޮށްފައެވެވެ
