ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ކުރިއަށްގެންދާ ހަޔަރ އެޑިއުކޭޝަން ވޮލީބޯލް ޗެމްޕިއަންޝިޕުގެ ފިރިހެން ޑިވިޝަން ފައިނަލުގައި އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް) ބަލިކޮށް އެމް.އެން.ޔޫ އިން ޗެމްޕިއަންކަން ހޯދައިފިއެވެ.
ފޯރިގަދަ ފައިނަލް އެމް.އެން.ޔޫ އިން ކަަމިޔާބުކުރީ 3 ސެޓު 2 ސެޓުންނެވެ.
މި މެޗުގެ ފުރަތަމަ 2 ސެޓުގައި މޮޅު ކުޅުމެއް ދައްކައި ކާމިޔާބުކުރީ އައި.ޔޫ.އެމް އިންނެވެ. ފުރަތަމަ ސެޓު 25-22 އިން ކާމިޔާބު ކުރި އިރު ދެވަނަ ސެޓު ކާމިޔާބުކޮށްފައިވަނީ 25-18 ގެ ނަތީޖާއިންނެވެ. ވާދަވެރި މި މެޗުގައި ތިންވަނަ ސެޓު އެމް.އެން.ޔޫ އިން ކާމިޔާބުކުރީ 26-24 ގެ ނަތީޖާއަކުންނެވެ. ހަތަރުވަނަ ސެޓު އެމް.އެން.ޔޫ އިން ގެންގޮސްފައިވަނީ ފަސޭހަކަމާއެކު 25-14 ގެ ނަތީޖާއަކުންނެވެ. މެޗުގެ ވާދަވެރި ފަހު ސެޓު އެމް.އެން.ޔޫ އިން ކާމިޔާބުކުރީ 20-18 އިންނެވެ.
މި މެޗުގެ މޮޅުކުޅުންތެރިޔާއަށް ހޮވިފައިވަނީ އެމް.އެން.ޔޫގެ ޖަރޒީ ނަންބަރު 9 އުމަރު ފާރޫގެވެ.
އެމް.އެން.ޔޫ އިން ވަނީ މީގެ ކުރިން ވޮލީބޯލް އެސޯސިއޭޝަން އޮފް މޯލްޑިވްސް (ވީ.އޭ.އެމް) އިން ކުރިއަށް ގެންދިޔަ އިންޓަރ ކޮލެޖު/ ޔުނިވަރސިޓީ ވޮލީބޯލް މުބާރާތުގެ އަންހެން އަދި ފިރިހެން ޑިވިޝަނުގެ މުބާރާތް މިލްކުކޮށްފައެވެ. އަދި މި މުބާރާތުގެ އެންމެ ކާމިޔާބު ޓީމަކީވެސް އެމް.އެން.ޔޫ އެވެ. އެގޮތުން އެމް.އެން.ޔޫ އިން ވަނީ ޖުމްލަ ފަސް ފަހަރު އިންޓަރ ކޮލެޖު/ ޔުނިވަރސިޓީ ވޮލީބޯލް މުބާރާތް ކާމިޔާބުކޮށްފައެވެ.
