ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ބާއްވާ ”އެމް.އެން.ޔޫ.އެސް.ޔޫ ބަހުސް މުބާރާތް 2022″ގެ ފުރަތަމަ ދުވަހުގެ ބަހުސްތައް އެމް.އެން.ޔޫ ބިޒްނަސް ސްކޫލް (އެމް.އެން.ޔޫ.ބީ.އެސް) އާއި ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) އިން ކާމިޔާބުކޮށްފިއެވެ.
މުބާރާތުގެ ފުރަތަމަ ބަހުސްގައި އެމް.އެން.ޔޫ.ބީ.އެސް އިން ބައްދަލުކުރީ ސީ.އެފް.އެސްއާ އެވެ. މި ބަހުސްގެ މައުޟޫ އަކީ ”ތަޙުޒީބު މުޖުތަމަޢެއް ބިނާކުރުމުގައި އެންމެ ބޮޑު ދައުރެއް އަދާކުރެވެނީ ޒުވާނުންނަށެވެ.“ ކަމަށްވާއިރު އެމް.އެން.ޔޫ.ބީ.އެސް އިން ބަހުސްކޮށްފައިވަނީ މައުޟޫއާ އެއްކޮޅަށެވެ. މި ބަހުސް އެމް.އެން.ޔޫ.ބީ.އެސް އިން ކާމިޔާބު ކުރީ 732 – 515ގެ ނަތީޖާއަކުންނެވެ. މި ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ އެމް.އެން.ޔޫ.ބީ.އެސްގެ ޢަލީ ޔާމީނެވެ.
މުބާރާތުގެ ދެވަނަ ބަހުސްގައި ބައްދަލުކުރީ ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (އެފް.އެޗް.ޓީ.އެސް) އާއި އެފް.އެސް.އެލް އެވެ. ”ޤައުމީ ސިޔާސަތު ކަނޑައެޅުމުގައި އަންހެނުންގެ ދައުރު މިހާރަށްވުރެ އިތުރު ކުރެވޭނީ މުޖްތަމަޢު ހޭލުންތެރި ކޮށްގެން“ ނޫންކަމަށް ބަހުސް ކުރަމުން އެފް.އެސް.އެލް މި ބަހުސް ކާމިޔާބު ކުރީ 926 – 587ގެ ނަތީޖާއަކުންނެވެ. މި ބަހުސްގައި އެންމެ މޮޅަށް ބަހުސްކޮށްފައިވަނީ އެފް.އެސް.އެލްގެ މުޙައްމަދު އައިޝް އެވެ.
އެމް.އެން.ޔޫ.އެސް.ޔޫ ބަހުސް މުބާރާތުގެ ހުޅުވުމުގެ ރަސްމިއްޔާތާއެކު ފުރަތަމަ ދުވަހުގެ ބަހުސްތައް ކުރެވުނީ ސެޕްޓެންބަރު 10ވީ ހޮނިހިރުދުވަހުގެރޭ އެމް.އެން.ޔޫ ސެންޓްރަލް އެޑްމިނިސްޓްރޭޝަން އޮޑިޓޯރިއަމްގައެވެ. ބަހުސް މުބާރާތުގެ ހުޅުވުމުގެ ރަސްމިއްޔާތު ޝަރަފްވެރި ކޮށްދެއްވީ ދިވެހިބަހުގެ އެކަޑަމީގެ ކުރީގެ ރައީސް އަލްފާޟިލް އަޝްރަފް ޢަލީ އެވެ.
،އެމް.އެން.ޔޫ.އެސް.ޔޫ ބަހުސް މުބާރާތަކީ ދިވެހި ބަސް ދިރުވައި އާލާކޮށް، ބަހުގެ ހަމަތަކާ އެއްގޮތަށް ދިވެހިބަސް ބޭނުން ކުރަން ބާރުއެޅުމަށާއި ޢިލްމީ ފެންވަރެއްގައި އުފެއްދުންތެރި ގޮތުގައި ޚިޔާލު ފާޅުކުރުމުގެ ފުރުޞަތު ފަހިކޮށްދީ، ދޫފަރިތަ، ކުޅަދާނަ ވާހަކަދެއްކުންތެރިންތަކެއް އުފެއްދުމުގެ މަޤްޞަދުގައި ބާއްވަމުން އަންނަ މުބާރާތެކެވެ. މިއަހަރު މި ބޭއްވެނީ ސިލްސިލާކޮށް ބޭއްވޭ މި މުބާރާތުގެ 9 ވަނަ މުބާރާތެވެ.
