ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ބާއްވާ ”އެމް.އެން.ޔޫ.އެސް.ޔޫ ބަހުސް މުބާރާތް 2022″ގެ ފައިނަލަށް އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް) އަދި ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) ދަތުރުކޮށްފިއެވެ.
ސެޕްޓެންބަރު 19ވީ ހޯމަދުވަހުގެރޭ ކުރިއަށްދިޔަ ފުރަތަމަ ސެމީ ފައިނަލް ބަހުސް އައި.ޔޫ.އެމް އިން ކާމިޔާބު ކުރީ 960 – 717ގެ ނަތީޖާއަކުން ފެކަލްޓީ އޮފް އާރޓްސް (އެފް.އޭ)ގެ މައްޗަށް ކުރި ހޯދައިގެންނެވެ. މި ބަހުސްގެ މައުޟޫ އަކީ ”ހަގީގީ މިނިވަންކަމަކީ ސިޔާސީ މިނިވަންކަމެވެ.“ މައުޟޫއާ އެއްކޮޅަށް އައި.ޔޫ.އެމް އިން ކުރި މި ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ އައި.ޔޫ.އެމްގެ ޢަލީ އަހްނަފެވެ.
އެރޭ ކުރިއަށް ދިޔަ 2 ވަނަ ބަހުސް އެފް.އެސް.އެލް އިން ކާމިޔާބުކުރީ ފެކަލްޓީ އޮފް އެޑިއުކޭޝަން (އެފް.އީ)ގެ މައްޗަށް 853 – 788ގެ ނަތީޖާއަކުން ކުރި ހޯދައިގެންނެވެ. ”ދިވެހި ބަހަކީ މުއްސަނދި ބަސްކޮށާރެއް ލިބިފައިވާ ބަހެއް“ ނޫންކަމަށް ބަހުސްކުރަމުން އެފް.އެސް.އެލް މި ބަހުސް ކާމިޔާބުކުރިއިރު، ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ އެފް.އެސް.އެލްގެ މުޙައްމަދު އައިޝް އެވެ.
ފައިނަލް ބަހުސް ތާވަލު ކުރެވިފައިވަނީ ސެޕްޓެންބަރު 24ވާ ހޮނިހިރުދުވަހުގެ ރެޔަށެވެ.
އެމް.އެން.ޔޫ.އެސް.ޔޫ ބަހުސް މުބާރާތަކީ ދިވެހި ބަސް ދިރުވައި އާލާކޮށް، ބަހުގެ ހަމަތަކާ އެއްގޮތަށް ދިވެހިބަސް ބޭނުން ކުރަން ބާރުއެޅުމަށާއި ޢިލްމީ ފެންވަރެއްގައި އުފެއްދުންތެރި ގޮތުގައި ޚިޔާލު ފާޅުކުރުމުގެ ފުރުޞަތު ފަހިކޮށްދީ، ދޫފަރިތަ، ކުޅަދާނަ ވާހަކަދެއްކުންތެރިންތަކެއް އުފެއްދުމުގެ މަޤްޞަދުގައި ބާއްވަމުން އަންނަ މުބާރާތެކެވެ. މިއަހަރު މި ބޭއްވެނީ ސިލްސިލާކޮށް ބޭއްވޭ މި މުބާރާތުގެ 9 ވަނަ މުބާރާތެވެ.
