ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ބޭއްވި ”އެމް.އެން.ޔޫ.އެސް.ޔޫ ބަހުސް މުބާރާތް 2022″ގެ އެންމެ މޮޅު ބަހުސްކުރުންތެރިޔަކަށް އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް)ގެ އަލީ އަހްނަފް ހޮވިއްޖެއެވެ.
މުބާރާތުގެ ވަނަވަނައަށް ދިޔަ ފަރާތްތަކަށް އިނާމު ދީފައިވަނީ 24 ސެޕްޓެންބަރުވީ ހޮނިހިރުދުވަހުގެރޭ ޤައުމީ ޔުނިވަރސިޓީގެ ސެންޓްރަލް އެޑްމިނިސްޓްރޭޝަން (ސީ.އޭ) އޮޑިޓޯރިއަމްގައި ކުރިއަށް ދިޔަ ހަފްލާއެއްގައެވެ. މި ހަފްލާގައި ވަނީ ބަހުސް މުބާރާތުގެ އެންމެ މޮޅު 5 ބަހުސްކުރުންތެރިންނަށްވެސް އިނާމު ދީފައެވެ. މި އިނާމުތައް ހަވާލުކޮށްދެއްވީ އެމް.އެން.ޔޫގެ ކުރީގެ ޑީން އޮފް ސްޓޫޑެންޓްސް އަލްފާޟިލާ ނާދިޔާ އަޙްމަދެވެ. އެންމެ މޮޅު 5 ބަހުސްކުރުންތެރިންނަކީ:
- ޢާލިމް ޢަބްދުއްލަތީފް – ފެކަލްޓީ އޮފް އާރޓްސް
- މުޙައްމަދު އައިޝް – ފެކަލްޓީ އޮފް ޝަރީޢާ އެންޑް ލޯ
- ޢަލީ އަހްނަފް – އިސްލާމިކް ޔުނިވަރސިޓީ އޮފް މޯލްޑިވްސް
- އިސްމާޢީލް ރަޒީން ޢިމްރާން – ފެކަލްޓީ އޮފް ޝަރީޢާ އެންޑް ލޯ
- އަޙްމަދު ޝުހާން – އިސްލާމިކް ޔުނިވަރސިޓީ އޮފް މޯލްޑިވްސް
މުބާރާތުގެ ރަނަރއަޕް ޓީމް، ފެކަލްޓީ އޮފް ޝަރީޢާ އެންޑް ލޯ، އަށް އިނާމު ހަވާލުކޮށްދެއްވީ އެމް.އެން.ޔޫގެ ވައިސް ޗާންސެލަރ ޑރ. މުޙައްމަދު ޝަރީފެވެ. އަދި އެންމެ މޮޅު ބަހުސްކުރުންތެރިޔާ އަދި ޗެމްޕިއަން ޓީމަށް އިނާމު ހަވާލުކޮށްދެއްވީ ހަފްލާގެ ޝަރަފްވެރި މެހްމާން ދިވެހިބަހުގެ އެކަޑަމީގެ ރައީސް ޑރ. އަޝްރަފް ޢަބްދުއްރަޙީމެވެ.
މި ހަފްލާގައި ފަނޑިޔާރުންގެ ފަރާތުން އިސް ފަނޑިޔާރު އަލްފާޟިލް މުޙައްމަދު ޝިފާން އަދި ޝަރަފްވެރި މެޙްމާން ޑރ. އަޝްރަފް ވަނީ ވާހަކަ ދައްކަވާފައެވެ. މިބޭފުޅުންގެ ވާހަކަފުޅުގައި ބަހުސްކުރުންފަދަ އަދަބީ ހަރަކާތްތައް އިތުރަށް ތަރައްޤީކޮށް ޒަމާނާ އެއްގޮތަށް ބަދަލުކުރަންޖެހޭ ވާހަކަ ވަނީ ދައްކަވާފައެވެ.
އެމް.އެން.ޔޫ.އެސް.ޔޫ ބަހުސް މުބާރާތަކީ ދިވެހި ބަސް ދިރުވައި އާލާކޮށް، ބަހުގެ ހަމަތަކާ އެއްގޮތަށް ދިވެހިބަސް ބޭނުން ކުރަން ބާރުއެޅުމަށާއި ޢިލްމީ ފެންވަރެއްގައި އުފެއްދުންތެރި ގޮތުގައި ޚިޔާލު ފާޅުކުރުމުގެ ފުރުޞަތު ފަހިކޮށްދީ، ދޫފަރިތަ، ކުޅަދާނަ ވާހަކަދެއްކުންތެރިންތަކެއް އުފެއްދުމުގެ މަޤްޞަދުގައި ބާއްވަމުން އަންނަ މުބާރާތެކެވެ. މިއަހަރު މި ބޭއްވުނީ ސިލްސިލާކޮށް ބޭއްވޭ މި މުބާރާތުގެ 9 ވަނަ މުބާރާތެވެ.
