އެފް.އެޗް.ޓީ.އެސް އަދި އެސް.އެމް އެއްވަރު، މެޕްސް ބޮޑު ތަފާތަކުން ކުރި ހޯދައިފި

ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ ހަތަރުވަނަ ރޭގައި ކުޅުނު ފުރަތަމަ 2 މެޗުގެ ތެރެއިން އެއް މެޗުގައި ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (އެފް.އެޗް.ޓީ.އެސް) އަދި ސްކޫލް އޮފް މެޑިސިން (އެސް.އެމް) އެއްވަރުވިއިރު، މެޕްސް ކޮލެޖުން ފެކަލްޓީ އޮފް ހެލްތު ސައިންސަސް (އެފް.އެޗް.އެސް)ގެ މައްޗަށް ބޮޑު ތަފާތަކުން ކުރި ހޯދައިފިއެވެ.

ބުރާސްފަތިދުވަހުގެރޭ 10:00ގައި ގްރައުންޑް 1 ގައި ކުޅުނު ފިރިހެން ޑިވިޝަންގެ ގްރޫޕް އޭގެ މެޗު މެޕްސް ކޮލެޖުން ކާމިޔާބު ކުރީ 07 – 01 ންނެވެ. މި މެޗުގެ މޮޅު ކުޅުންތެރިޔަކަށް ހޮވުނު މެޕްސްގެ ޖާރޒީ ނަންބަރު 23 އާދަމް މަންސޫރު ވަނީ މެޗުގައި ހެޓްރިކެއް ހަދައިފައެވެ. މީގެ އިތުރުން މެޕްސްގެ 7 ނަންބަރު އަލީ ޝާޒް ހިލްމީ ދެ ގޯލު ޖެހިއިރު، 6 ނަންބަރު މުހައްމަދު އިބްރާހީމާއި، 10 ނަންބަރު މުހައްމަދު ހަނާމް އިސްމާއީލްވެސް ވަނީ ގޯލެއް ކާމިޔާބުކޮށްފައެވެ. މި މެޗުގައި އެފް.އެޗް.އެސް އިން ޖެހި ހަމައެކަނި ގޯލު ޖެހީ ޖާރޒީ ނަންބަރު 19 މުހައްމަދު ރިޝާމް ޒިރާރެވެ.

އެރޭ 10:00ގައި ގްރައުންޑް 2 ގައި ބައްދަލުކުރީ ފިރިހެން ޑިވިޝަންގެ ގްރޫޕް ބީގެ އެފް.އެޗް.ޓީ.އެސް އާއި އެސް.އެމް އެވެ. މި މެޗު ނިމުނީ 4-4ން އެއްވަރުވެގެންނެވެ. މި މެޗުގެ މޮޅު ކުޅުންތެރިޔަކަށް ހޮވުނު އެފް.އެޗް.ޓީ.އެސްގެ ޖާރޒީ ނަންބަރު 7 މުހައްމަދު އުލްވާން ވަނީ މެޗުގައި 2 ގޯލު ޖަހައިފައެވެ. އެފް.އެޗް.ޓީ.އެސްގެ އަނެއް 2 ގޯލު ޖެހީ އަޙްމަދު ހުނައިފެވެ. މި މެޗުގައި އެސް.އެމްގެ ޖާރޒީ ނަންބަރު 14 އިބްރާހީމް އާލިފް އަލީ ވަނީ ދެ ގޯލު ޖަހައިފައެވެ. މީގެ އިތުރުން އެސް.އެމްގެ 19 ނަންބަރު މުހައްމަދު ތަސްނީމް ރަޝީދު އަދި 7 ނަންބަރު އަހްމަދު މާހިލް މުއާޒް ވަނީ ކޮންމެ ކުޅުންތެރިޔަކުވެސް ގޯލެއް ކާމިޔާބުކޮށްފައެވެ.

ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ ޓައިޓްލް ސްޕޮންސަރަކީ އެމް.ޔޫ ސްޓޯރުން އެތެރެކުރާ ”ލެކްނޯ“ ބްރޭންޑެވެ. މުބާރާތުގެ ކޯ-ސްޕޮންސަރަކީ ޤައުމީ ޔުނިވަރސިޓީގެ ކުންފުނި ޔުނިވިޔަ ހޯލްޑިންގްސް އެވެ. ސަޕޯޓިންގ ޕާޓްނަރުންނަކީ މޯލްޑިވްސް ޓްރޭޑިންގ އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ)، މެންހަޓަން ބިޒްނަސް ހޮޓެލް، އޮންލައިން ނިއުސް ޢަދަދު، މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓް އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފް.އޭ.އެމް) އެވެ. ސްޕޯޓްސް ޕާޓްނަރަކީ ސޮނީ ސްޕޯޓްސް އެވެ. މުބާރާތުގެ ޑިޖިޓަލް ޕާޓްނަރަކީ ދިރާގު ކަމަށްވާއިރު، ކިޓް ޕާޓްނަރަކީ ޕްރިންޓް ކޯއެވެ. ޕްރިންޓިންގ ޕާޓްނަރަކީ އެމް ސެވަން އެވެ. އަދި އެސޯސިއޭޓިވް ޕާޓްނަރަކީ އަދަދު އޮންލައިންއެވެ.

އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ސާނަވީ ދާއިރާގައި ބާއްވާ އެންމެ ބޮޑު ކުޅިވަރު ޙަރަކާތެވެ. މި މުބާރާތް ރާވާ އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިންނެވެ. މި އަހަރު މި ބާއްވަނީ މީގެ 8 ވަނަ މުބާރާތެވެ. މިއަހަރުގެ މުބާރާތް މި ބޭއްވެނީ ކޮވިޑް-19ގެ ޢާލަމީ ވަބާއާއެކު 2 އަހަރުގެ މެދުކެނޑުމަކަށްފަހުއެވެ. އެންމެ ފަހުން 2019 ވަނަ އަހަރު ބޭއްވި މުބާރާތުގެ ފިރިހެން ޑިވިޝަނުގެ ޗެމްޕިއަނަކީ އެވިޑް ކޮލެޖެވެ. އަދި އަންހެން ޑިވިޝަނުގެ ޗެމްޕިއަނަކީ އެމް.އައި ކޮލެޖެވެ. މި މުބާރާތް އެންމެ ފުރަތަމަ ބޭއްވުނީ 2013 ވަނަ އަހަރެވެ. އެއަށްފަހު 2019 ވަނަ އަހަރާ ހަމައަށް މެދުކެނޑުމެއްނެތި ކޮންމެ އަހަރަކު މި މުބާރާތް ކުރިއަށް ގެންދެވިފައިވެއެވެ. މުބާރާތުގައި އަންހެން ޑިވިޝަން ތަޢާރަފު ކުރެވުނީ 2018 ވަނަ އަހަރެވެ. މި މުބާރާތުގެ އެންމެ ކާމިޔާބު ޓީމަކީ މުބާރާތުގެ ފިރިހެން ޑިވިޝަނުގެ ތަށި 3 ފަހަރު ޙާޞިލުކޮށްފައިވާ އެމް.އެން.ޔޫ ބިޒްނަސް ސްކޫލެވެ.