ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ ހަތަރުވަނަ ރޭގައި ކުޅުނު ފަހު 2 މެޗުގައި ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) އަދި ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް) ކުރިހޯދައިފިއެވެ.
ފިރިހެން ޑިވިޝަނުގެ ގްރޫޕް އޭގެ ސައިރިކްސް ކޮލެޖާ ވާދަކޮށް އެފް.އެސް.އެލް އިން މެޗު ކާމިޔާބުކުރީ 06 – 02 ންނެވެ. މި މެޗުގެ މޮޅު ކުޅުންތެރިޔަކަށް ހޮވުނު އެފް.އެސް.އެލްގެ ޖާރޒީ ނަންބަރު 10 ރައުހާން ރިއްފަތު ވަނީ މެޗުގައި ހެޓްރިކެއް ހަދައިފައެވެ. މި މެޗުގައި އެފް.އެސް.އެލްގެ ބާކީ ގޯލުތައް ކާމިޔާބުކުރީ 9 ނަންބަރު އަލީ ޖަޒީލް އަހްމަދާއި 30 ނަންބަރު އަހްމަދު ރިފުވާން މުހައްމަދުގެ އިތުރުން 7 ނަންބަރު އަލީ އަޒުހަރެވެ. ސައިރިކްސް ކޮލެޖުގެ ގޯލުތައް ޖެހީ 7 ނަންބަރު ލޫތު އިބްރާހީމް ޝާހުގެ އިތުރުން 14 ނަންބަރު އަލީ އިރުފާހު ޝިހާބެވެ.
ބުރާސްފަތިދުވަހުގެރޭ 11:00ގައި ގްރައުންޑް 2 ގައި ކުޅުނު ފިރިހެން ޑިވިޝަންގެ ގްރޫޕް ބީގެ މެޗު ސީ.އެފް.އެސް އިން ކާމިޔާބު ކުރީ 03 – 01 ންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ މެޗުގައި 2 ގޯލު ކާމިޔާބު ކުރި ސީ.އެފް.އެސްގެ ޖާރޒީ ނަންބަރު 4 މުހައްމަދު ނާބިތު ހުސައިނެވެ. ސީ.އެފް.އެސްގެ އަނެއް ގޯލު ޖެހީ 9 ނަންބަރު ޒައިޝާން އަޝްރަފެވެ. އެފް.އެޗް.އެސްގެ ހަމައެކަނި ގޯލު ޖެހީ 24 ނަންބަރު ނޫރު ޔޫސުފެވެ.
މުބާރާތުގެ މެޗުތައް ހުކުރުދުވަހުވެސް ކުރިއަށްދާނެއެވެ. ހުކުރުދުވަހުގެ މެޗުތައް ފަށާނީ ހަވީރު 04.00ގައެވެ. މުބާރާތުގެ މެޗުތައް ކުޅެވެމުންދަނީ އެފް.އޭ.އެމް ޓާފުގައެވެ.
ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ ޓައިޓްލް ސްޕޮންސަރަކީ އެމް.ޔޫ ސްޓޯރުން އެތެރެކުރާ ”ލެކްނޯ“ ބްރޭންޑެވެ. މުބާރާތުގެ ކޯ-ސްޕޮންސަރަކީ ޤައުމީ ޔުނިވަރސިޓީގެ ކުންފުނި ޔުނިވިޔަ ހޯލްޑިންގްސް އެވެ. ސަޕޯޓިންގ ޕާޓްނަރުންނަކީ މޯލްޑިވްސް ޓްރޭޑިންގ އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ)، މެންހަޓަން ބިޒްނަސް ހޮޓެލް، އޮންލައިން ނިއުސް ޢަދަދު، މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓް އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފް.އޭ.އެމް) އެވެ. ސްޕޯޓްސް ޕާޓްނަރަކީ ސޮނީ ސްޕޯޓްސް އެވެ. މުބާރާތުގެ ޑިޖިޓަލް ޕާޓްނަރަކީ ދިރާގު ކަމަށްވާއިރު، ކިޓް ޕާޓްނަރަކީ ޕްރިންޓް ކޯއެވެ. ޕްރިންޓިންގ ޕާޓްނަރަކީ އެމް ސެވަން އެވެ. އަދި އެސޯސިއޭޓިވް ޕާޓްނަރަކީ އަދަދު އޮންލައިންއެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ސާނަވީ ދާއިރާގައި ބާއްވާ އެންމެ ބޮޑު ކުޅިވަރު ޙަރަކާތެވެ. މި މުބާރާތް ރާވާ އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިންނެވެ. މި އަހަރު މި ބާއްވަނީ މީގެ 8 ވަނަ މުބާރާތެވެ. މިއަހަރުގެ މުބާރާތް މި ބޭއްވެނީ ކޮވިޑް-19ގެ ޢާލަމީ ވަބާއާއެކު 2 އަހަރުގެ މެދުކެނޑުމަކަށްފަހުއެވެ. އެންމެ ފަހުން 2019 ވަނަ އަހަރު ބޭއްވި މުބާރާތުގެ ފިރިހެން ޑިވިޝަނުގެ ޗެމްޕިއަނަކީ އެވިޑް ކޮލެޖެވެ. އަދި އަންހެން ޑިވިޝަނުގެ ޗެމްޕިއަނަކީ އެމް.އައި ކޮލެޖެވެ. މި މުބާރާތް އެންމެ ފުރަތަމަ ބޭއްވުނީ 2013 ވަނަ އަހަރެވެ. އެއަށްފަހު 2019 ވަނަ އަހަރާ ހަމައަށް މެދުކެނޑުމެއްނެތި ކޮންމެ އަހަރަކު މި މުބާރާތް ކުރިއަށް ގެންދެވިފައިވެއެވެ. މުބާރާތުގައި އަންހެން ޑިވިޝަން ތަޢާރަފު ކުރެވުނީ 2018 ވަނަ އަހަރެވެ. މި މުބާރާތުގެ އެންމެ ކާމިޔާބު ޓީމަކީ މުބާރާތުގެ ފިރިހެން ޑިވިޝަނުގެ ތަށި 3 ފަހަރު ޙާޞިލުކޮށްފައިވާ އެމް.އެން.ޔޫ ބިޒްނަސް ސްކޫލެވެ.
