ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގައި ހުކުރު ދުވަހު ކުޅުނު ފުރަތަމަ ދެ މެޗުން ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް) އަދި އެމް.އައި ކޮލެޖު މޮޅުވެއްޖެއެވެ.
ހުކުރު ދުވަހު ހަވީރު 04:00 ގައި ގްރައުންޑް 1 ގައި ކުޅުނު މުބާރާތުގެ އަންހެން ޑިވިޝަންގެ ގްރޫޕު ސީގެ ދެވަނަ މެޗުގައި ބައްދަލުކުރީ އެމް.އައި އަދި ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒްއެވެ. މި މެޗު އެމް.އައި އިން ކާމިޔާބުކޮށްފައިވަނީ 4-1 ގެ ނަތީޖާއަކުންނެވެ. މި މެޗުގެ މޮޅު ކުޅުންތެރިޔާއަށް ހޮވިފައިވަނީ އެމް.އައި ކޮލެޖް އިން ދެ ލަނޑު ޖެހި އެ ޓީމުގެ ޖަރޒީ ނަންބަރު 7 ޝަރީފަތު ނަޖުލާއެވެ. އެ ޓީމުގެ އަނެއް ދެ ލަނޑު ޖެހީ އެ ޓީމުގެ ޖަރޒީ ނަންބަރު 12 ފާތިމަތު ޝުއާއު އަދި ޖަރޒީ ނަންބަރު 19 އަފާފް އަހްމަދެވެ. އެފް.އެޗް.ޓީ.އެސް އިން މި މެޗުގައި ޖެހި ހަމަ އެކަނި ލަނޑު ޖަހާފައިވަނީ އެ ޓީމުގެ ޖަރޒީ ނަންބަރު 8 ޢާއިޝަތު ނިހާ އެވެ.
ހަވީރު 4 ޖެހިއިރު ގްރައުންޑް 2 ގައި ކުޅުނީ އަންހެން ޑިވިޝަނުގެ ގްރޫޕް ބީގެ 3 ވަނަ މެޗެވެ. މި މެޗުގައި ބައްދަލުކުރީ ސީ.އެފް.އެސް އާއި ސްކޫލް އޮފް ނާރސިންގ (އެސް.އެން) އެވެ. މި މެޗުގެ ފުރަތަމަ ލަނޑު މެޗުގެ 11 ވަނަ މިނިޓުގައި ޖެހީ ސީ.އެފް.އެސް ގެ ޖަރޒީ ނަންބަރު 17 އާމިނަތު އަމާނީއެވެ. ދެވަނަ އަދި ތިންވަނަ ލަނޑު ވެސް ކާމިޔާބުކޮށްފައި ވަނީ ހަމަ އެ ޓީމުގެ ޖަރޒީ ނަންބަރު 10 އައިޝަތު ލައިސާ މަޖީދު އަދި ޖަރޒީ ނާންބަރު 4 ފާތިމަތު ނިހާމާއެވެ. މި މެޗުގެ މޮޅު ކުޅުންތެރިއަކަށް ހޮވިފައިވަނީ ސީ.އެފް.އެސްގެ ނިހާމާއެވެ.
ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ ޓައިޓްލް ސްޕޮންސަރަކީ އެމް.ޔޫ ސްޓޯރުން އެތެރެކުރާ ”ލެކްނޯ“ ބްރޭންޑެވެ. މުބާރާތުގެ ކޯ-ސްޕޮންސަރަކީ ޤައުމީ ޔުނިވަރސިޓީގެ ކުންފުނި ޔުނިވިޔަ ހޯލްޑިންގްސް އެވެ. ސަޕޯޓިންގ ޕާޓްނަރުންނަކީ މޯލްޑިވްސް ޓްރޭޑިންގ އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ)، މެންހަޓަން ބިޒްނަސް ހޮޓެލް، އޮންލައިން ނިއުސް ޢަދަދު، މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓް އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފް.އޭ.އެމް) އެވެ. ސްޕޯޓްސް ޕާޓްނަރަކީ ސޮނީ ސްޕޯޓްސް އެވެ. މުބާރާތުގެ ޑިޖިޓަލް ޕާޓްނަރަކީ ދިރާގު ކަމަށްވާއިރު، ކިޓް ޕާޓްނަރަކީ ޕްރިންޓް ކޯއެވެ. ޕްރިންޓިންގ ޕާޓްނަރަކީ އެމް ސެވަން އެވެ. އަދި އެސޯސިއޭޓިވް ޕާޓްނަރަކީ އަދަދު އޮންލައިންއެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ސާނަވީ ދާއިރާގައި ބާއްވާ އެންމެ ބޮޑު ކުޅިވަރު ޙަރަކާތެވެ. މި މުބާރާތް ރާވާ އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިންނެވެ. މި އަހަރު މި ބާއްވަނީ މީގެ 8 ވަނަ މުބާރާތެވެ. މިއަހަރުގެ މުބާރާތް މި ބޭއްވެނީ ކޮވިޑް-19ގެ ޢާލަމީ ވަބާއާއެކު 2 އަހަރުގެ މެދުކެނޑުމަކަށްފަހުއެވެ. އެންމެ ފަހުން 2019 ވަނަ އަހަރު ބޭއްވި މުބާރާތުގެ ފިރިހެން ޑިވިޝަނުގެ ޗެމްޕިއަނަކީ އެވިޑް ކޮލެޖެވެ. އަދި އަންހެން ޑިވިޝަނުގެ ޗެމްޕިއަނަކީ އެމް.އައި ކޮލެޖެވެ. މި މުބާރާތް އެންމެ ފުރަތަމަ ބޭއްވުނީ 2013 ވަނަ އަހަރެވެ. އެއަށްފަހު 2019 ވަނަ އަހަރާ ހަމައަށް މެދުކެނޑުމެއްނެތި ކޮންމެ އަހަރަކު މި މުބާރާތް ކުރިއަށް ގެންދެވިފައިވެއެވެ. މުބާރާތުގައި އަންހެން ޑިވިޝަން ތަޢާރަފު ކުރެވުނީ 2018 ވަނަ އަހަރެވެ. މި މުބާރާތުގެ އެންމެ ކާމިޔާބު ޓީމަކީ މުބާރާތުގެ ފިރިހެން ޑިވިޝަނުގެ ތަށި 3 ފަހަރު ޙާޞިލުކޮށްފައިވާ އެމް.އެން.ޔޫ ބިޒްނަސް ސްކޫލެވެ.
