ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގައި ހުކުރުދުވަހު އަންހެން ޑިވިޝަންގައި ކުޅުނު މެޗުތަކުގެ ތެރެއިން ކްލިކް ކޮލެޖާއި ފެކަލްޓީ އޮފް ހެލްތު ސައިންސަސް (އެފް.އެޗް.އެސް) ކުޅުނު މެޗުތައް ކާމިޔާބު ކޮށްފިއެވެ.
ހުކުރުދުވަހު ހަވީރު 05:00ގައި ގްރައުންޑް 1 ގައި ފެށި އަންހެން ޑިވިޝަންގެ ގްރޫޕް އޭގެ މެޗު ކްލިކް ކޮލެޖުން ކާމިޔާބުކުރީ 9-0 ން އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް) ބަލިކުރުމަށްފަހުއެވެ. މި މެޗުގައި ކްލިކް ކޮލެޖުގެ ޖާރޒީ ނަންބަރު 4 ޝީނީޒް މުޙައްމަދު ވަނީ 7 ގޯލު ޖަހައިފައެވެ. ކްލިކްގެ އަނެއް 2 ގޯލު ޖެހީ ޖާރޒީ ނަންބަރު 3 ރޮވީނާ މަރިޔަން އަދި ޖާރޒީ ނަންބަރު 6 ފާތިމަތު ރާއިން މުހައްމަދެވެ. މެޗުގެ މޮޅުކުޅުންތެރިޔަކަށް ހޮވުނީ ޝީނީޒެވެ.
ހުކުރު ދުވަހު ހަވީރު 05:00ގައި ގްރައުންޑް 2 ގައި ކުޅުނު އަންހެން ޑިވިޝަނުގެ ގްރޫޕު ބީގެ ހަތަރުވަނަ މެޗު ސައިރިކްސް ކޮލެޖު ބަލިކޮށް އެފް.އެޗް.އެސް އިން ކާމިޔާބުކޮށްފައި ވަނީ 3-0 ންނެވެ. މެޗުގެ ފަސްވަނަ މިނިޓުގައި އެފް.އެޗް.އެސްއަށް ލީޑު ނަގައިދިނީ އެ ޓީމުގެ ޖާރޒީ ނަންބަރު 17 ޢާއިޝަތު ނިހާ އެވެ. އަދި މެޗުގެ 12 އަދި 15 ވަނަ މިނިޓުގައި މެޗުގެ މޮޅު ކުޅުންތެރިޔަކަށްވެސް ހޮވުނު އެފް.އެޗް.އެސްގެ ޖާރޒީ ނަންބަރު 12 އާމިނަތު ޝަފްނާ ޢަލީ ވަނީ އެފް.އެޗް.އެސްގެ 2 ވަނަ އަދި 3 ވަނަ ގޯލު ޖަހައިފައެވެ.
ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ ޓައިޓްލް ސްޕޮންސަރަކީ އެމް.ޔޫ ސްޓޯރުން އެތެރެކުރާ ”ލެކްނޯ“ ބްރޭންޑެވެ. މުބާރާތުގެ ކޯ-ސްޕޮންސަރަކީ ޤައުމީ ޔުނިވަރސިޓީގެ ކުންފުނި ޔުނިވިޔަ ހޯލްޑިންގްސް އެވެ. ސަޕޯޓިންގ ޕާޓްނަރުންނަކީ މޯލްޑިވްސް ޓްރޭޑިންގ އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ)، މެންހަޓަން ބިޒްނަސް ހޮޓެލް، އޮންލައިން ނިއުސް ޢަދަދު، މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓް އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފް.އޭ.އެމް) އެވެ. ސްޕޯޓްސް ޕާޓްނަރަކީ ސޮނީ ސްޕޯޓްސް އެވެ. މުބާރާތުގެ ޑިޖިޓަލް ޕާޓްނަރަކީ ދިރާގު ކަމަށްވާއިރު، ކިޓް ޕާޓްނަރަކީ ޕްރިންޓް ކޯއެވެ. ޕްރިންޓިންގ ޕާޓްނަރަކީ އެމް ސެވަން އެވެ. އަދި އެސޯސިއޭޓިވް ޕާޓްނަރަކީ އަދަދު އޮންލައިންއެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ސާނަވީ ދާއިރާގައި ބާއްވާ އެންމެ ބޮޑު ކުޅިވަރު ޙަރަކާތެވެ. މި މުބާރާތް ރާވާ އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިންނެވެ. މި އަހަރު މި ބާއްވަނީ މީގެ 8 ވަނަ މުބާރާތެވެ. މިއަހަރުގެ މުބާރާތް މި ބޭއްވެނީ ކޮވިޑް-19ގެ ޢާލަމީ ވަބާއާއެކު 2 އަހަރުގެ މެދުކެނޑުމަކަށްފަހުއެވެ. އެންމެ ފަހުން 2019 ވަނަ އަހަރު ބޭއްވި މުބާރާތުގެ ފިރިހެން ޑިވިޝަނުގެ ޗެމްޕިއަނަކީ އެވިޑް ކޮލެޖެވެ. އަދި އަންހެން ޑިވިޝަނުގެ ޗެމްޕިއަނަކީ އެމް.އައި ކޮލެޖެވެ. މި މުބާރާތް އެންމެ ފުރަތަމަ ބޭއްވުނީ 2013 ވަނަ އަހަރެވެ. އެއަށްފަހު 2019 ވަނަ އަހަރާ ހަމައަށް މެދުކެނޑުމެއްނެތި ކޮންމެ އަހަރަކު މި މުބާރާތް ކުރިއަށް ގެންދެވިފައިވެއެވެ. މުބާރާތުގައި އަންހެން ޑިވިޝަން ތަޢާރަފު ކުރެވުނީ 2018 ވަނަ އަހަރެވެ. މި މުބާރާތުގެ އެންމެ ކާމިޔާބު ޓީމަކީ މުބާރާތުގެ ފިރިހެން ޑިވިޝަނުގެ ތަށި 3 ފަހަރު ޙާޞިލުކޮށްފައިވާ އެމް.އެން.ޔޫ ބިޒްނަސް ސްކޫލެވެ.
