ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގައި ހުކުރު ދުވަހުގެރޭ 10:00ގައި ކުޅުނު މެޗުތަކުން މޮޅުވެ ކްލިކް ކޮލެޖާއި އެމް.ބީ.އެސް އިން މުބާރާތުގެ ދެވަނަ މޮޅު ހޯދައިފިއެވެ.
ހުކުރު ދުވަހުގެރޭ 10:00 ގައި ގްރައުންޑް 1 ގައި ކުޅުނު މެޗުން ކްލިކް ކޮލެޖު މޮޅުވީ ފަހަތުން އަރައި 04 – 03 ން ވިލާ ކޮލެޖު އަތުންނެވެ. މި މެޗުގައި ކްލިކް ކޮލެޖުގެ ޖަރޒީ ނަންބަރު 7 އަޙްމަދު މަހްފޫޒު މުހައްމަދު ވަނީ ހެޓްރިކެއް ހަދައިފައެވެ. މަހްފޫޒުގެ ގޯލުތައް ޖެހީ 29 ވަނަ މިނިޓާއި، 34 ވަނަ މިނިޓު އަދި 29 ވަނަ މިނިޓުގައެވެ. ކްލިކްގެ އަނެއް ގޯލު ޖެހީ މެޗުގެ 38 ވަނަ މިނިޓުގައި އެ ޓީމުގެ ޖަރޒީ ނަންބަރު 13 ޝައިބާން ޝަފީގެވެ. ވިލާ ކޮލެޖުގެ ފުރަތަމަ 2 ގޯލު ޖެހީ އެ ޓީމުގެ ޖަރޒީ ނަންބަރު 8 އަހްމަދު ޔައީޝް ޔޫޝައު އެވެ. ޔައީޝްގެ ގޯލުތައް ޖެހީ މެޗުގެ 12 ވަނަ މިނިޓާއި 23 ވަނަ މިނިޓުގައެވެ. ވިލާގެ ތިންވަނަ ގޯލު ޖެހީ މެޗުގެ 32 ވަނަ މިނިޓުގައި އެ ޓީމުގެ ޖަރޒީ ނަންބަރު 9 މިދުހަތު ފާއިޒެވެ. މި މެޗުގެ އެންމެ މޮޅު ކުޅުންތެރިޔަކަށް ހޮވިފައިވަނީ ކްލިކް ކޮލެޖުގެ މަހްފޫޒެވެ. މިއީ ފިރިހެން ޑިވިޝަންގެ ގްރޫޕް ސީގައި ކުޅުނު 4 ވަނަ މެޗެވެ.
ހުކުރު ދުވަހުގެރޭ 10:00ގައި ގްރައުންޑް 2 ގައި ކުޅުނު މެޗުގައި ބައްދަލުކުރީ މޯލްޑިވްސް ބިޒްނަސް ސްކޫލް (އެމް.ބީ.އެސް) އާއި އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް) އެވެ. މި މެޗު އެމް.ބީ.އެސް އިން ކާމިޔާބު ކުރީ 2 – 1 ންނެވެ. އެމް.ބީ.އެސްގެ ގޯލުތައް ޖެހީ 18 ވަނަ މިނިޓާއި 37 ވަނަ މިނިޓުގައި އެ ޓީމުގެ ޖަރޒީ ނަންބަރު 7 ކައިސަން ބިން ހިސާން އެވެ. ކައިސަން ވަނީ މި މެޗުގެ އެންމެ މޮޅު ކުޅުންތެރިޔަކަށްވެސް ހޮވިފައެވެ. މެޗުގައި އައި.ޔޫ.އެމް އިން ޖެހި ގޯލު ޖެހީ އެ ޓީމުގެ ޖަރޒީ ނަންބަރު 9 ޙުސައިން ރިމާހެވެ. ރިމާހު ގޯލު ޖެހީ މެޗުގެ 13 ވަނަ މިނިޓުގައެވެ. މި މެޗަކީ ފިރިހެން ޑިވިޝަންގެ ގްރޫޕް ޑީގައި ކުޅުނު ހަތަރުވަނަ މެޗެވެ.
މުބާރާތުގެ މެޗުތައް ހޮނިހިރުދުވަހުގެރޭ ވެސް އޮންނާނެއެވެ. އެރޭ ކުޅެވޭނީ ފިރިހެން ޑިވިޝަނުގެ ތިން މެޗެވެ. މުބާރާތުގެ މެޗުތައް ކުޅެވެމުންދަނީ އެފް.އޭ.އެމް ޓާރފުގައެވެ.
ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ ޓައިޓްލް ސްޕޮންސަރަކީ އެމް.ޔޫ ސްޓޯރުން އެތެރެކުރާ ”ލެކްނޯ“ ބްރޭންޑެވެ. މުބާރާތުގެ ކޯ-ސްޕޮންސަރަކީ ޤައުމީ ޔުނިވަރސިޓީގެ ކުންފުނި ޔުނިވިޔަ ހޯލްޑިންގްސް އެވެ. ސަޕޯޓިންގ ޕާޓްނަރުންނަކީ މޯލްޑިވްސް ޓްރޭޑިންގ އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ)، މެންހަޓަން ބިޒްނަސް ހޮޓެލް، އޮންލައިން ނިއުސް ޢަދަދު، މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓް އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފް.އޭ.އެމް) އެވެ. ސްޕޯޓްސް ޕާޓްނަރަކީ ސޮނީ ސްޕޯޓްސް އެވެ. މުބާރާތުގެ ޑިޖިޓަލް ޕާޓްނަރަކީ ދިރާގު ކަމަށްވާއިރު، ކިޓް ޕާޓްނަރަކީ ޕްރިންޓް ކޯއެވެ. ޕްރިންޓިންގ ޕާޓްނަރަކީ އެމް ސެވަން އެވެ. އަދި އެސޯސިއޭޓިވް ޕާޓްނަރަކީ އަދަދު އޮންލައިންއެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ސާނަވީ ދާއިރާގައި ބާއްވާ އެންމެ ބޮޑު ކުޅިވަރު ޙަރަކާތެވެ. މި މުބާރާތް ރާވާ އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިންނެވެ. މި އަހަރު މި ބާއްވަނީ މީގެ 8 ވަނަ މުބާރާތެވެ. މިއަހަރުގެ މުބާރާތް މި ބޭއްވެނީ ކޮވިޑް-19ގެ ޢާލަމީ ވަބާއާއެކު 2 އަހަރުގެ މެދުކެނޑުމަކަށްފަހުއެވެ. އެންމެ ފަހުން 2019 ވަނަ އަހަރު ބޭއްވި މުބާރާތުގެ ފިރިހެން ޑިވިޝަނުގެ ޗެމްޕިއަނަކީ އެވިޑް ކޮލެޖެވެ. އަދި އަންހެން ޑިވިޝަނުގެ ޗެމްޕިއަނަކީ އެމް.އައި ކޮލެޖެވެ. މި މުބާރާތް އެންމެ ފުރަތަމަ ބޭއްވުނީ 2013 ވަނަ އަހަރެވެ. އެއަށްފަހު 2019 ވަނަ އަހަރާ ހަމައަށް މެދުކެނޑުމެއްނެތި ކޮންމެ އަހަރަކު މި މުބާރާތް ކުރިއަށް ގެންދެވިފައިވެއެވެ. މުބާރާތުގައި އަންހެން ޑިވިޝަން ތަޢާރަފު ކުރެވުނީ 2018 ވަނަ އަހަރެވެ. މި މުބާރާތުގެ އެންމެ ކާމިޔާބު ޓީމަކީ މުބާރާތުގެ ފިރިހެން ޑިވިޝަނުގެ ތަށި 3 ފަހަރު ޙާޞިލުކޮށްފައިވާ އެމް.އެން.ޔޫ ބިޒްނަސް ސްކޫލެވެ.
