އެފް.އެޗް.އެސް އަދި ސައިރިކްސް އެއްވަރު، ސީ.އެފް.އެސް ކުއާޓާއަށް!

ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގައި ހޮނިހިރުދުވަހުގެރޭ 10:00ގައި ކުޅުނު މެޗުތަކުން ފެކަލްޓީ އޮފް ހެލްތު ސައިންސް (އެފް.އެޗް.އެސް) އާއި ސައިރިކްސް ކޮލެޖު އެއްވަރުވިއިރު، ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް) އިން ތަފާތު ބޮޑު މޮޅެއް ހޯދާ ކުއާޓާ ފައިނަލްގެ ޖާގައެއް ޔަގީން ކޮށްފިއެވެ.

ހޮނިހިރުދުވަހުގެރޭ 10 ޖެހިއިރު ގްރައުންޑް 1 ގައި ބައްދަލުކުރީ ފިރިހެން ޑިވިޝަންގެ ގްރޫޕް އޭގެ އެފް.އެޗް.އެސް އާއި ސައިރިކްސް ކޮލެޖެވެ. މި މެޗު އެއްވަރުވީ 3 – 3 ންނެވެ. މި މެޗުގެ މޮޅު ކުޅުންތެރިޔަކަށް ހޮވުނު ސައިރިކްސް ކޮލެޖުގެ އަލީ އިރުފާހު ޝިހާބު ވަނީ މެޗުގައި ހެޓްރިކެއް ހަދައިފައެވެ. އިރުފާހުގެ ގޯލުތައް ޖެހީ މެޗުގެ 3 ވަނަ މިނިޓާއި 14 ވަނަ މިނިޓު އަދި 25 ވަނަ މިނިޓުގައެވެ. އެފް.އެޗް.އެސްގެ ތިން ގޯލުވެސް ޖަހާފައިވަނީ ކައިރި ކައިރީގައެވެ. މިގޮތުން އެ ޓީމުގެ ޖަރޒީ ނަންބަރު 10 މުޙައްމަދު ޝިހާން މޫސާ ފުރަތަމަ ދެ ގޯލު (4 ވަނަ މިނިޓާއި 8 ވަނަ މިނިޓުގައި) ޖެހިއިރު، މެޗުގެ 7 ވަނަ މިނިޓުގައި އެ ޓީމުގެ ތިންވަނަ ގޯލު ޖެހީ ޖަރޒީ ނަންބަރު 6 މައުސޫދު ޢަބްދުﷲ އެވެ.

ހޮނިހިރުދުވަހުގެރޭ 10 ޖެހިއިރު ގްރައުންޑް 2 ގައި ކުޅުނީ ފިރިހެން ޑިވިޝަނުގެ ގްރޫޕް ބީގެ މެޗެކެވެ. މި މެޗު ސީ.އެފް.އެސް އިން ކާމިޔާބު ކުރީ 9 – 1 ންނެވެ. ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (އެފް.އެޗް.ޓީ.އެސް)ގެ މައްޗަށް ކުރިހޯދި މު މެޗުގައި ސީ.އެފް.އެސްގެ ތަފާތު 6 ކުޅުންތެރިޔަކު ވަނީ ގޯލު ޖަހާފައެވެ. އަދި އެ ޓީމުގެ ޖަރޒީ ނަންބަރު 7 އަހްމަދު އިހާން އިނާޒް ވަނީ ހެޓްރިކެއްވެސް ހަދައިފައެވެ. އިހާންގެ ގޯލުތައް ޖެހީ 1 ވަނަ މިނިޓާއި 35 ވަނަ މިނިޓު އަދި 36 ވަނަ މިނިޓުގައެވެ. މެޗުގެ ކުރީކޮޅު 7 ވަނަ މިނިޓާއި 8 ވަނަ މިނިޓުގައި ސީ.އެފް.އެސްގެ ޖަރޒީ ނަންބަރު 21 އަޙްމަދު ރާހިލް ރަޝީދު ދެ ގޯލު ޖެހިއިރު، މެޗުގެ 19 ވަނަ މިނިޓުގައި އެ ޓީމުގެ ޖަރޒީ ނަންބަރު 11 އަޙްމަދު ނާއިފް ޝަރީފްވެސް ވަނީ ގޯލެއް ޖަހައިފައެވެ. މީގެ އިތުރުން މެޗުގެ 31 ވަނަ މިނިޓުގައި ޖަރޒީ ނަންބަރު 12 ޙުސައިން އިޔާސް ސަޢީދު ގޯލެއް ޖެހިއިރު، އޭގެ އެއްމިނެޓު ފަހުން ޖަރޒީ ނަންބަރު 6 ޙަސަން ޝިޔާން ޢަބްދުއްރަޙީމްވެސް ވަނީ ގޯލެއް ޖަހައިފައެވެ. އަދި ހަމ އޭގެ އެއް މިނިޓު ފަހުން އެ ޓީމުގެ ޖަރޒީ ނަންބަރު 13 ޢަބްދުﷲ އާމިން އަލީވެސް ވަނީ ގޯލެއް ޖަހައިފައެވެ. މި މެޗުގެ މޮޅު ކުޅުންތެރިޔަކަށް ހޮވުނީ ސީ.އެފް.އެސްގެ ރާހިލް އެވެ. މި މޮޅާއެކު ބާކީ އެއްމެޗު އޮއްވާ ސީ.އެފް.އެސް އިން ވަނީ ކުއާޓާ ފައިނަލްގެ ޖާގައެއް ކަށަވަރު ކޮށްފައެވެ.

ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ ޓައިޓްލް ސްޕޮންސަރަކީ އެމް.ޔޫ ސްޓޯރުން އެތެރެކުރާ ”ލެކްނޯ“ ބްރޭންޑެވެ. މުބާރާތުގެ ކޯ-ސްޕޮންސަރަކީ ޤައުމީ ޔުނިވަރސިޓީގެ ކުންފުނި ޔުނިވިޔަ ހޯލްޑިންގްސް އެވެ. ސަޕޯޓިންގ ޕާޓްނަރުންނަކީ މޯލްޑިވްސް ޓްރޭޑިންގ އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ)، މެންހަޓަން ބިޒްނަސް ހޮޓެލް، އޮންލައިން ނިއުސް ޢަދަދު، މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓް އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފް.އޭ.އެމް) އެވެ. ސްޕޯޓްސް ޕާޓްނަރަކީ ސޮނީ ސްޕޯޓްސް އެވެ. މުބާރާތުގެ ޑިޖިޓަލް ޕާޓްނަރަކީ ދިރާގު ކަމަށްވާއިރު، ކިޓް ޕާޓްނަރަކީ ޕްރިންޓް ކޯއެވެ. ޕްރިންޓިންގ ޕާޓްނަރަކީ އެމް ސެވަން އެވެ. އަދި އެސޯސިއޭޓިވް ޕާޓްނަރަކީ އަދަދު އޮންލައިންއެވެ.

އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ސާނަވީ ދާއިރާގައި ބާއްވާ އެންމެ ބޮޑު ކުޅިވަރު ޙަރަކާތެވެ. މި މުބާރާތް ރާވާ އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިންނެވެ. މި އަހަރު މި ބާއްވަނީ މީގެ 8 ވަނަ މުބާރާތެވެ. މިއަހަރުގެ މުބާރާތް މި ބޭއްވެނީ ކޮވިޑް-19ގެ ޢާލަމީ ވަބާއާއެކު 2 އަހަރުގެ މެދުކެނޑުމަކަށްފަހުއެވެ. އެންމެ ފަހުން 2019 ވަނަ އަހަރު ބޭއްވި މުބާރާތުގެ ފިރިހެން ޑިވިޝަނުގެ ޗެމްޕިއަނަކީ އެވިޑް ކޮލެޖެވެ. އަދި އަންހެން ޑިވިޝަނުގެ ޗެމްޕިއަނަކީ އެމް.އައި ކޮލެޖެވެ. މި މުބާރާތް އެންމެ ފުރަތަމަ ބޭއްވުނީ 2013 ވަނަ އަހަރެވެ. އެއަށްފަހު 2019 ވަނަ އަހަރާ ހަމައަށް މެދުކެނޑުމެއްނެތި ކޮންމެ އަހަރަކު މި މުބާރާތް ކުރިއަށް ގެންދެވިފައިވެއެވެ. މުބާރާތުގައި އަންހެން ޑިވިޝަން ތަޢާރަފު ކުރެވުނީ 2018 ވަނަ އަހަރެވެ. މި މުބާރާތުގެ އެންމެ ކާމިޔާބު ޓީމަކީ މުބާރާތުގެ ފިރިހެން ޑިވިޝަނުގެ ތަށި 3 ފަހަރު ޙާޞިލުކޮށްފައިވާ އެމް.އެން.ޔޫ ބިޒްނަސް ސްކޫލެވެ.