ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ އަންހެން ޑިވިޝަނުގެ ގްރޫޕް އޭގެ އެއްވަނަ ކްލިކް ކޮލެޖަށް ލިބުނުއިރު، ވިލާ ކޮލެޖާއި އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް) ވެސް ކުއާޓާ ފައިނަލަށް ދަތުރުކޮށްފިއެވެ.
އަންހެން ޑިވިޝަނުގެ ގްރޫޕްއޭގެ ފަހު 2 މެޗު ވެސް ކުޅެވުނީ ބުދަދުވަހުގެރޭ 10:00ގައެވެ. ގްރައުންޑް 1 ގައި ކްލިކާއި ވިލާ ބައްދަލިކުރި މެޗު ކްލިކުން ކާމިޔާބު ކުރީ 2-0 ންނެވެ. މި މެޗުގެ ގޯލުތައް ކްލިކަށް ކާމިޔާބުކޮށްދިނީ އެ ޓީމުގެ ޖަރޒީ ނަންބަރު 11 މަރިޔަމް ޝަހާފަތާއި ޖަރޒީ ނަންބަރު 14 ފާތިމަތު ޒީނިޔާ އެވެ. މެޗު ފަށައިގެން 9 ވަނަ މިނިޓުގައި ޝަހާފަތު ގޯލު ޖެހިއިރު، ޒީނިޔާގެ ގޯލު ޖެހީ މެޗުގެ 11 ވަނަ މިނިޓުގައެވެ. މި މެޗުގެ އެންމެ މޮޅު ކުޅުންތެރިޔަކަށް ހޮވުނީ ޒީނިޔާ އެވެ. މި މެޗާއެކު ކްލިކް ކޮލެޖް ކުއާޓާ ފައިނަލަށް ދަތުރު ކުރީ ކުޅުނު އެއްވެސް މެޗަކުން ބަލިނުވެ، ގްރޫޕްގެ އެއްވަނައިގެ ގޮތުގައެވެ. ވިލާ މި މެޗުން ބަލިވި ނަމަވެސް، ގްރޫޕްގެ ދެވަނައިގެ ގޮތުގައި ކުއާޓާ ފައިނަލަށް ވަނީ ދަތުރު ކޮށްފައެވެ.
ގްރައުންޑް 2 ގައި ކުޅުނު މެޗުގައި އައި.ޔޫ.އެމް އިން ބައްދަލުކުރީ ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް)އާއެވެ. މި މެޗު އައި.ޔޫ.އެމް އިން ކާމިޔާބުކުރީ 1 – 0 ންނެވެ. މެޗުގެ ހަމައެކަނި ގޯލު ޖެހީ މެޗުގެ 23 ވަނަ މިނިޓުގައި އައި.ޔޫ.އެމްގެ ޖަރޒީ ނަންބަރު 20 ޢާއިޝަތު ހަނާން ސައީދެވެ. މި މެޗުގެ މޮޅު ކުޅުންތެރިޔަކީވެސް ހަނާނެވެ. މި މޮޅާއެކު ކުޅުނު 3 މެޗުގެ ތެރެއިން 1 މެޗުން މޮޅުވެ، ގްރޫޕްގެ ތިންވަނައިގެ ގޮތުގައި އައި.ޔޫ.އެމް ވެސް ވަނީ ކުއާޓާ އަށް ދަތުރުކޮށްފައެވެ.
ކުއާޓާ ފައިނަލުގައި މި ޓީމުތައް ވާދަކުރާ ޓީމުތައް ކަށަވަރު ވާނީ ބުދަދުވަހުގެރޭ ކުޅެވޭ ގްރޫޕް ބީގެ ފަހު މެޗުތަކާއި ބުރާސްފަތިދުވަހުގެރޭ ކުޅުމަށް ހަމަޖެހިފައިވާ ގްރޫޕް ސީގެ ފަހު މެޗު ނިމުމުންނެވެ.
ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ ޓައިޓްލް ސްޕޮންސަރަކީ އެމް.ޔޫ ސްޓޯރުން އެތެރެކުރާ ”ލެކްނޯ“ ބްރޭންޑެވެ. މުބާރާތުގެ ކޯ-ސްޕޮންސަރަކީ ޤައުމީ ޔުނިވަރސިޓީގެ ކުންފުނި ޔުނިވިޔަ ހޯލްޑިންގްސް އެވެ. ސަޕޯޓިންގ ޕާޓްނަރުންނަކީ މޯލްޑިވްސް ޓްރޭޑިންގ އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ)، މެންހަޓަން ބިޒްނަސް ހޮޓެލް، އޮންލައިން ނިއުސް ޢަދަދު، މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓް އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފް.އޭ.އެމް) އެވެ. ސްޕޯޓްސް ޕާޓްނަރަކީ ސޮނީ ސްޕޯޓްސް އެވެ. މުބާރާތުގެ ޑިޖިޓަލް ޕާޓްނަރަކީ ދިރާގު ކަމަށްވާއިރު، ކިޓް ޕާޓްނަރަކީ ޕްރިންޓް ކޯއެވެ. ޕްރިންޓިންގ ޕާޓްނަރަކީ އެމް ސެވަން އެވެ. އަދި އެސޯސިއޭޓިވް ޕާޓްނަރަކީ އަދަދު އޮންލައިންއެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ސާނަވީ ދާއިރާގައި ބާއްވާ އެންމެ ބޮޑު ކުޅިވަރު ޙަރަކާތެވެ. މި މުބާރާތް ރާވާ އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިންނެވެ. މި އަހަރު މި ބާއްވަނީ މީގެ 8 ވަނަ މުބާރާތެވެ. މިއަހަރުގެ މުބާރާތް މި ބޭއްވެނީ ކޮވިޑް-19ގެ ޢާލަމީ ވަބާއާއެކު 2 އަހަރުގެ މެދުކެނޑުމަކަށްފަހުއެވެ. އެންމެ ފަހުން 2019 ވަނަ އަހަރު ބޭއްވި މުބާރާތުގެ ފިރިހެން ޑިވިޝަނުގެ ޗެމްޕިއަނަކީ އެވިޑް ކޮލެޖެވެ. އަދި އަންހެން ޑިވިޝަނުގެ ޗެމްޕިއަނަކީ އެމް.އައި ކޮލެޖެވެ. މި މުބާރާތް އެންމެ ފުރަތަމަ ބޭއްވުނީ 2013 ވަނަ އަހަރެވެ. އެއަށްފަހު 2019 ވަނަ އަހަރާ ހަމައަށް މެދުކެނޑުމެއްނެތި ކޮންމެ އަހަރަކު މި މުބާރާތް ކުރިއަށް ގެންދެވިފައިވެއެވެ. މުބާރާތުގައި އަންހެން ޑިވިޝަން ތަޢާރަފު ކުރެވުނީ 2018 ވަނަ އަހަރެވެ. މި މުބާރާތުގެ އެންމެ ކާމިޔާބު ޓީމަކީ މުބާރާތުގެ ފިރިހެން ޑިވިޝަނުގެ ތަށި 3 ފަހަރު ޙާޞިލުކޮށްފައިވާ އެމް.އެން.ޔޫ ބިޒްނަސް ސްކޫލެވެ.
