ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ އަންހެން ޑިވިޝަނުގެ ގްރޫޕް ބީގެ އެއްވަނަ ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް) ހޯދިއިރު، ފެކަލްޓީ އޮފް ހެލްތު ސައިންސަސް (އެފް.އެޗް.އެސް) އާއި ސްކޫލް އޮފް ނާރސިންގ (އެސް.އެން) ވެސް ކުއާޓާ ފައިނަލަށް ދަތުރުކޮށްފިއެވެ.
އަންހެން ޑިވިޝަނުގެ ގްރޫޕްބީގެ ފަހު 2 މެޗު ކުޅެވުނީ ބުދަދުވަހުގެރޭ 11:00ގައެވެ. ގްރައުންޑް 1 ގައި އޮތް މެޗުގައި ވާދަކުރީ އެފް.އެޗް.އެސް އާއި އެސް.އެން އެވެ. މި މެޗު 1 – 0 ން ކާމިޔާބުކޮށް އެފް.އެޗް.އެސް ވަނީ ކުޅުނު 3 މެޗުން 6 ޕޮއިންޓް ހޯދާ މުބާރާތުގެ ކުއާޓާ ފައިނަލަށް ދަތުރުކޮށްފައެވެ. އެފް.އެޗް.އެސް ދަތުރުކުރީ ގްރޫޕްގެ ދެވަނައިގެ ގޮތުގައެވެ. މި މެޗުގެ ހަމައެކަނި ގޯލު މެޗުގެ 3 ވަނަ މިނިޓުގައި ކާމިޔާބުކުރީ މެޗުގެ މޮޅު ކުޅުންތެރިޔަކަށްވެސް ހޮވުނު އެފް.އެޗް.އެސްގެ ޖަރޒީ ނަންބަރު 12 އާމިނަތު ޝަފާނާ ޢަލީ އެވެ. އެސް.އެން މި މެޗުން ބަލިވި ނަމަވެސް ގްރޫޕްގެ ތިންވަނަ ޓީމުގެ ގޮތުގައި ވަނީ ކުއާޓާ ފައިނަލަށް ދަތުރުކޮށްފައެވެ. ކުޅުނު ތިން މެޗުގެ ތެރެއިން އެސް.އެން މޮޅުވީ އެއް މެޗުންނެވެ. އެއީ ސައިރިކްސް ކޮލެޖާ ދެކޮޅަށް ކުޅުނު މެޗެވެ.
ގްރައުންޑް 2 ގައި ކުޅުނު މެޗު 3 – 0ގެ ނަތީޖާއަކުން ފަސޭހަކަމާއެކު ކާމިޔާބު ކުރީ ސީ.އެފް.އެސް އެވެ. ސައިރިކްސް ކޮލެޖާ ދެކޮޅަށް ކުޅުނު މި މެޗުގައި ސީ.އެފް.އެސްގެ ގޯލުތައް ޖަހައިދިނީ އެ ޓީމުގެ ޖަރޒީ ނަންބަރު 21 ޖަފްނާ ޢީސާ، ޖަރޒީ ނަންބަރު 10 ޢާއިޝަތު ލައިސާ މަޖީދު އަދި ޖަރޒީ ނަންބަރު 4 ފާތިމަތު ނިހާމާ އެވެ. މެޗު ފެށިގެން 3 ވަނަ މިނިޓުގައި ޖަފްނާ ގޯލު ޖެހިއިރު، އޭގެ މިނެޓެއް ފަހުން ލައިސާ ވަނީ ސީ.އެފް.އެސްއަށް ދެވަނަ ގޯލު ޖަހައިދީފައެވެ. މެޗުގެ ތިންވަނަ ގޯލު ނިހާމާ ޖެހީ 12 ވަނަ މިނިޓުގައެވެ. މި މޮޅާއެކު ސީ.އެފް.އެސް ވަނީ ގްރޫޕްގެ އެއްވަނައިގައި ކުއާޓާ ފައިނަލަށް ދަތުރުކޮށްފައެވެ. ސީ.އެފް.އެސް ވަނީ ކުޅުނު ތިން މެޗުވެސް ކާމިޔާބުކޮށް ނުވަ ޕޮއިންޓް ހޯދާފައެވެ.
ކުއާޓާ ފައިނަލުގައި ސީ.އެފް.އެސް އިން ބައްދަލުކުރަން ޖެހޭނީ ގްރޫޕް އޭގެ ތިންވަނަ ޓީމު އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް)އާ ދެކޮޅަށެވެ. އެސް.އެން ބައްދަލުކުރަން ޖެހޭނީ ގްރޫޕް އޭގެ އެއްވަނަ ކްލިކް ކޮލެޖާ ދެކޮޅަށެވެ. އެފް.އެޗް.އެސް ބައްދަލުކުރަންޖެހޭނީ ގްރޫޕް ސީގެ ދެވަނަ ޓީމާއެވެ. އެ ޓީމެއް ކަށަވަރު ވާނީ ބުރާސްފަތިދުވަހުގެރޭ ކުޅެވޭ ގްރޫޕް ސީގެ ފަހު މެޗަށްފަހު އެވެ. އަންހެން ޑިވިޝަންގެ ކުއާޓާ ފައިނަލް މެޗުތައް ކުޅުމަށް ހަމަޖެހިފައިވަނީ ހުކުރުދުވަހުގެ ރެޔެވެ.
ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ ޓައިޓްލް ސްޕޮންސަރަކީ އެމް.ޔޫ ސްޓޯރުން އެތެރެކުރާ ”ލެކްނޯ“ ބްރޭންޑެވެ. މުބާރާތުގެ ކޯ-ސްޕޮންސަރަކީ ޤައުމީ ޔުނިވަރސިޓީގެ ކުންފުނި ޔުނިވިޔަ ހޯލްޑިންގްސް އެވެ. ސަޕޯޓިންގ ޕާޓްނަރުންނަކީ މޯލްޑިވްސް ޓްރޭޑިންގ އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ)، މެންހަޓަން ބިޒްނަސް ހޮޓެލް، އޮންލައިން ނިއުސް ޢަދަދު، މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓް އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފް.އޭ.އެމް) އެވެ. ސްޕޯޓްސް ޕާޓްނަރަކީ ސޮނީ ސްޕޯޓްސް އެވެ. މުބާރާތުގެ ޑިޖިޓަލް ޕާޓްނަރަކީ ދިރާގު ކަމަށްވާއިރު، ކިޓް ޕާޓްނަރަކީ ޕްރިންޓް ކޯއެވެ. ޕްރިންޓިންގ ޕާޓްނަރަކީ އެމް ސެވަން އެވެ. އަދި އެސޯސިއޭޓިވް ޕާޓްނަރަކީ އަދަދު އޮންލައިންއެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ސާނަވީ ދާއިރާގައި ބާއްވާ އެންމެ ބޮޑު ކުޅިވަރު ޙަރަކާތެވެ. މި މުބާރާތް ރާވާ އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިންނެވެ. މި އަހަރު މި ބާއްވަނީ މީގެ 8 ވަނަ މުބާރާތެވެ. މިއަހަރުގެ މުބާރާތް މި ބޭއްވެނީ ކޮވިޑް-19ގެ ޢާލަމީ ވަބާއާއެކު 2 އަހަރުގެ މެދުކެނޑުމަކަށްފަހުއެވެ. އެންމެ ފަހުން 2019 ވަނަ އަހަރު ބޭއްވި މުބާރާތުގެ ފިރިހެން ޑިވިޝަނުގެ ޗެމްޕިއަނަކީ އެވިޑް ކޮލެޖެވެ. އަދި އަންހެން ޑިވިޝަނުގެ ޗެމްޕިއަނަކީ އެމް.އައި ކޮލެޖެވެ. މި މުބާރާތް އެންމެ ފުރަތަމަ ބޭއްވުނީ 2013 ވަނަ އަހަރެވެ. އެއަށްފަހު 2019 ވަނަ އަހަރާ ހަމައަށް މެދުކެނޑުމެއްނެތި ކޮންމެ އަހަރަކު މި މުބާރާތް ކުރިއަށް ގެންދެވިފައިވެއެވެ. މުބާރާތުގައި އަންހެން ޑިވިޝަން ތަޢާރަފު ކުރެވުނީ 2018 ވަނަ އަހަރެވެ. މި މުބާރާތުގެ އެންމެ ކާމިޔާބު ޓީމަކީ މުބާރާތުގެ ފިރިހެން ޑިވިޝަނުގެ ތަށި 3 ފަހަރު ޙާޞިލުކޮށްފައިވާ އެމް.އެން.ޔޫ ބިޒްނަސް ސްކޫލެވެ.
