ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ އަންހެން ޑިވިޝަނުގެ ގްރޫޕް ސީގެ އެއްވަނަ މަޤާމަށް އެމް.އެން.ޔޫ ބިޒްނަސް ސްކޫލް ހޮވި ކުއާޓާ ފައިނަލަށް ދަތުރުކުރިއިރު، މި ގްރޫޕްގެ ދެވަނައިގެ ގޮތުގައި އެމް.އައި ކޮލެޖުވެސް ކުއާޓާ ފައިނަލަށް ދަތުރުކޮށްފިއެވެ.
އަންހެން ޑިވިޝަނުގެ ގްރޫޕް ސީގެ ފަހު މެޗު ކުޅެވިފައިވަނީ ބުރާސްފަތިދުވަހުގެރޭ 09:30 ގައެވެ. މި މެޗުގައި ބައްދަލުކުރީ އެމް.އެން.ޔޫ.ބީ.އެސް އާއި ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (އެފް.އެޗް.ޓީ.އެސް) އެވެ. މި މެޗު 9 – 1 ގެ ނަތީޖާއަކުން ފަސޭހަކަމާއެކު ކާމިޔާބު ކުރީ އެމް.އެން.ޔޫ.ބީ.އެސް އެވެ. މެޗުގެ ފުރަތަމަ މިނެޓުގައި އެމް.އެން.ޔޫ.ބީ.އެސް އަށް ލީޑު ނަގައިދިނީ އެ ޓީމުގެ ޖަރޒީ ނަންބަރު 8 ޝައްމަ އަޙްމަދެވެ. އޭގެ މިނެޓެއް ފަހުން ދެވަނަ ގޯލު ޖަހައިދިނީ އެ ޓީމުގެ ޖަރޒީ ނަންބަރު 12 އާމިނަތު ޝަފްނާ އެވެ. މި މެޗުގައި އެމް.އެން.ޔޫ.ބީ.އެސްގެ ޖަރޒީ ނަންބަރު 11 ފިރުޝާނާ ނަޞީރު ވަނީ ޖުމްލަ ހަ ގޯލު ޖަހައިފައެވެ. ފިރުޝާނާގެ ފުރަތަމަ ތިން ގޯލު ޖެހީ 8 ވަނަ މިނެޓާއި 13 ވަނަ މިނެޓާއި 14 ވަނަ މިނެޓުގައެވެ. ފަހު ތިން ގޯލު ޖެހީ 25 ވަނަ މިނެޓާއި 28 ވަނަ މިނެޓު އަދި 29 ވަނަ މިނެޓުގައެވެ. މެޗުގެ 17 ވަނަ މިނެޓުގައި އެމް.އެން.ޔޫ.ބީ.އެސްގެ ޖަރޒީ ނަންބަރު 17 ނައުރާ ޙަސަން ވެސް ވަނީ ގޯލެއް ޖަހައިފައެވެ. އެފް.އެޗް.ޓީ.އެސްގެ ހަމައެކަނި ގޯލު ޖެހީ މެޗުގެ 15 ވަނަ މިނެޓުގައި އެ ޓީމުގެ ޖަރޒީ ނަންބަރު 8 ޢާއިޝަތު ނިހާ އެވެ.
ކުއާޓާ ފައިނަލުގައި އެމް.އެން.ޔޫ.ބީ.އެސް ބައްދަލުކުރާނީ ގްރޫޕް އޭގެ ދެވަނަ ވިލާ ކޮލެޖާ އެވެ. އަދި އެމް.އައި ކޮލެޖު ބައްދަލު ކުރާނީ ގްރޫޕް ބީގެ ދެވަނަ ޓީމު ފެކަލްޓީ އޮފް ހެލްތު ސައިންސަސްއާއެވެ. ކުއާޓާ ފައިނަލު މެޗުތައް ކުޅުމަށް ހަމަޖެހިފައިވަނީ ހުކުރުދުވަހުގެ ރެޔެވެ.
ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ ޓައިޓްލް ސްޕޮންސަރަކީ އެމް.ޔޫ ސްޓޯރުން އެތެރެކުރާ ”ލެކްނޯ“ ބްރޭންޑެވެ. މުބާރާތުގެ ކޯ-ސްޕޮންސަރަކީ ޤައުމީ ޔުނިވަރސިޓީގެ ކުންފުނި ޔުނިވިޔަ ހޯލްޑިންގްސް އެވެ. ސަޕޯޓިންގ ޕާޓްނަރުންނަކީ މޯލްޑިވްސް ޓްރޭޑިންގ އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ)، މެންހަޓަން ބިޒްނަސް ހޮޓެލް، އޮންލައިން ނިއުސް ޢަދަދު، މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓް އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފް.އޭ.އެމް) އެވެ. ސްޕޯޓްސް ޕާޓްނަރަކީ ސޮނީ ސްޕޯޓްސް އެވެ. މުބާރާތުގެ ޑިޖިޓަލް ޕާޓްނަރަކީ ދިރާގު ކަމަށްވާއިރު، ކިޓް ޕާޓްނަރަކީ ޕްރިންޓް ކޯއެވެ. ޕްރިންޓިންގ ޕާޓްނަރަކީ އެމް ސެވަން އެވެ. އަދި އެސޯސިއޭޓިވް ޕާޓްނަރަކީ އަދަދު އޮންލައިންއެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ސާނަވީ ދާއިރާގައި ބާއްވާ އެންމެ ބޮޑު ކުޅިވަރު ޙަރަކާތެވެ. މި މުބާރާތް ރާވާ އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިންނެވެ. މި އަހަރު މި ބާއްވަނީ މީގެ 8 ވަނަ މުބާރާތެވެ. މިއަހަރުގެ މުބާރާތް މި ބޭއްވެނީ ކޮވިޑް-19ގެ ޢާލަމީ ވަބާއާއެކު 2 އަހަރުގެ މެދުކެނޑުމަކަށްފަހުއެވެ. އެންމެ ފަހުން 2019 ވަނަ އަހަރު ބޭއްވި މުބާރާތުގެ ފިރިހެން ޑިވިޝަނުގެ ޗެމްޕިއަނަކީ އެވިޑް ކޮލެޖެވެ. އަދި އަންހެން ޑިވިޝަނުގެ ޗެމްޕިއަނަކީ އެމް.އައި ކޮލެޖެވެ. މި މުބާރާތް އެންމެ ފުރަތަމަ ބޭއްވުނީ 2013 ވަނަ އަހަރެވެ. އެއަށްފަހު 2019 ވަނަ އަހަރާ ހަމައަށް މެދުކެނޑުމެއްނެތި ކޮންމެ އަހަރަކު މި މުބާރާތް ކުރިއަށް ގެންދެވިފައިވެއެވެ. މުބާރާތުގައި އަންހެން ޑިވިޝަން ތަޢާރަފު ކުރެވުނީ 2018 ވަނަ އަހަރެވެ. މި މުބާރާތުގެ އެންމެ ކާމިޔާބު ޓީމަކީ މުބާރާތުގެ ފިރިހެން ޑިވިޝަނުގެ ތަށި 3 ފަހަރު ޙާޞިލުކޮށްފައިވާ އެމް.އެން.ޔޫ ބިޒްނަސް ސްކޫލެވެ.
