ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ ފިރިހެން ޑިވިޝަނުގައި ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް) އާއި މެޕްސް ކޮލެޖުވެސް ގްރޫޕްގެ އެއްވަނައިގައި ކުއާޓާ ފައިނަލަށް ދަތުރު ކޮށްފިއެވެ.
ހުކުރު ދުވަހު ހަވީރު 06:00ގައި ގްރައުންޑް 1 ގައި ކުޅުނީ ފިރިހެން ޑިވިޝަނުގެ ގްރޫޕް އޭގެ ފަހު މެޗެވެ. މި މެޗުގައި ބައްދަލުކުރީ ސީ.އެފް.އެސް އާއި ސްކޫލް އޮފް މެޑިސިން (އެސް.އެމް) އެވެ. ފޯރިގަދަ މި މެޗުގައި ލީޑު ނަގާފައިވަނީ އެސް.އެމް އިންނެވެ. މެޗުގެ 2 ވަނަ މިނިޓުގައި އެސް.އެމްގެ ފުރަތަމަ ގޯލު ޖަހާފައިވަނީ އެ ޓީމުގެ ޖަރޒީ ނަންބަރު 13 މުޙައްމަދު މުއާން މަންސޫރެވެ. އޭގެ މިނެޓެއް ފަހުން އެސް.އެމްގެ ޖަރޒީ ނަންބަރު 14 އިބްރާހީމް އާލިފް އަލީ ވަނީ އިތުރު ގޯލެއް ޖަހާ ފަރަގު ބޮޑުކޮށްފައެވެ. އަދި ހަމަ އޭގެ މިނެޓެއް ފަހުން އެސް.އެމް އިން ވަނީ އިތުރު ގޯލެއް ޖަހާ މެޗުގެ ނަތީޖާ 3 – 0 އަކަށް ބަދަލުކޮށްފައެވެ. މި ގޯލު ޖެހީ އެސް.އެމްގެ ޖަރޒީ ނަންބަރު 26 ޙަސަން ރާއިޝް އެވެ. މި ނަތީޖާގައި މާގިނަ އިރުތަކެއް ނުވެ، ސީ.އެފް.އެސް އިން ވަނީ ގޯލެއް ޖަހާފައެވެ. މި ގޯލު ޖެހީ ސީ.އެފް.އެސްގެ ޖަރޒީ ނަންބަރު 4 މުޙައްމަދު ނާބިތު ހުސައިނެވެ. މެޗުގެ 18 ވަނަ މިނިޓުގައި ސީ.އެފް.އެސްގެ ޖަރޒީ ނަންބަރު 17 އަމާން އަޙްމަދު ގޯލެއް ޖަހާފައިވަނިކޮށް އޭގެ މިނެޓެއް ފަހުން އެސް.އެމްގެ ޖަރޒީ ނަންބަރު 21 ޙަސަން ޝާމް ވަނީ އެސް.އެމް އަށް އިތުރު ގޯލެއް ޖަހާދީފައެވެ. ފުރަތަމަ ހާފު ނިމުނީ 4 – 2ގެ ނަތީޖާއަކުން އެސް.އެމް ކުރީގައި އޮވެގެންނެވެ. ސީ.އެފް.އެސް ކޮޅަށް ނަތީޖާ އަނބުރާލީ މެޗުގެ ދެވަނަ ހާފުގައެވެ. މިގޮތުން މެޗުގެ 26 ވަނަ މިނިޓާއި 28 ވަނަ މިނިޓު އަދި 41 ވަނަ މިނިޓުގައި ގޯލު ޖަހާ ސީ.އެފް.އެސްގެ ޖަރޒީ ނަންބަރު 22 ތަސްނީމް ޢަބްދުﷲ ވަނީ ދެވަނަ ހާފުގައި ހެޓްރިކެއް ހަދާފައެވެ. އަދި 34 ވަނަ މިނިޓުގައި އަމާން އޭނާގެ ދެވަނަ ގޯލު ޖެހިއިރު، 37 ވަނަ މިނިޓުގައި ނާބިތު ވަނީ އޭނާގެ ދެވަނަ ގޯލުވެސް ޖަހާފައެވެ. ދެވަނަ ހާފުގައި އެސް.އެމް އިން ގޯލު ޖެހީ މެޗުގެ 37 ވަނަ މިނިޓުގައި އާލިފެވެ. މި މެޗު ނިމުނީ 7 – 5ގެ ނަތީޖާއަކުން ސީ.އެފް.އެސް ކުރިހޯދައިގެންނެވެ. މެޗުގެ މޮޅު ކުޅުންތެރިޔަކަށް ހޮވުނީ ސީ.އެފް.އެސްގެ ތަސްނީމެވެ.
06:00ގައި ގްރައުންޑް 2 ގައި ކުޅުނީ ގްރޫޕް އޭގެ ފަހު މެޗެވެ. މި މެޗުގައި ބައްދަލުކުރީ މެޕްސް ކޮލެޖާއި ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) އެވެ. މި މެޗު ފަސޭހަކަމާއެކު 6 – 1 ން ކާމިޔާބުކުރީ މެޕްސް ކޮލެޖެވެ. މި މެޗުގެ މޮޅު ކުޅުންތެރިޔަކަށް ހޮވުނު މެޕްސްގެ ޖަރޒީ ނަންބަރު 8 ޖަމްޝާދު ޖަޢުފަރު ވަނީ ހެޓްރިކެއް ހަދާފައެވެ. ޖަމްޝާދުގެ ގޯލުތައް ޖެހީ މެޗުގެ 7 ވަނަ މިނިޓާއި 13 ވަނަ މިނިޓު އަދި 20 ވަނަ މިނިޓުގައެވެ. މި މެޗު ފަށައިގެން މެޕްސް 3 ވަނަ މިނިޓުގައި އަށް ލީޑު ނަގައިދިނީ މެޕްސްގެ ޖަރޒީ ނަންބަރު 23 އާދަމް މަންސޫރެވެ. މީގެ އިތުރުން މެޕްސް އަށް ގޯލު ޖަހައިދިނީ މެޕްސްގެ ޖަރޒީ ނަންބަރު 6 މުޙައްމަދު އިބްރާހީމާއި ޖަރޒީ ނަންބަރު 20 އިބްރާހީމް ޝަޚާފް އާދަމެވެ. މުޙައްމަދުގެ ގޯލު ޖެހީ މެޗުގެ 32 ވަނަ މިނިޓުގައެވެ. ޝަޚާފްގެ ގޯލު ޖެހީ މެޗުގެ 35 ވަނަ މިނިޓުގައެވެ. އެފް.އެސް.އެލް އިން ޖެހި ހަމައެކަނި ގޯލު ޖެހީ މެޗުގެ 4 ވަނަ މިނިޓުގައި އެ ޓީމުގެ ޖަރޒީ ނަންބަރު 10 ރައުހާން ރިއްފަތެވެ.
މި ނަތީޖާތަކާއެކު ފިރިހެން ޑިވިޝަނުގެ ގްރޫޕް ބީގެ އެއްވަނައިގެ ގޮތުގައި ކުއާޓާ ފައިނަލަށް ދަތުރު ކޮށްފައިވަނީ ސީ.އެފް.އެސް އެވެ. އެ ގްރޫޕްގެ ދެވަނައިގެ ގޮތުގައި ކުއާޓާ އަށް ދަނީ ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (އެފް.އެޗް.ޓީ.އެސް) އެވެ. އަދި ގްރޫޕް އޭގެ އެއްވަނަ އަކީ މެޕްސް ކޮލެޖު ކަމަށްވާއިރު، ދެވަނަ ލިބެނީ ފެކަލްޓީ އޮފް އިންޖިނިއަރިންގ، ސައިންސް އެންޑް ޓެކްނޮލޮޖީ (ފެސްޓް)އަށެވެ. އެހެންކަމުން، ކުއާޓާ ފައިނަލުގައި މެޕްސް ވާދަކުރަން ޖެހޭނީ އެފް.އެޗް.ޓީ.އެސްއާއެވެ. އަދި ސީ.އެފް.އެސްއާ ބައްދަލުކުރާނީ ފެސްޓެވެ. ތިންވަނަ ކުއާޓާގައި ބައްދަލުކުރާނީ ޕޮލިޓެކްނިކާއި އެމް.އައި ކޮލެޖުކަމަށްވާއިރު، ހަތަރުވަނަ ކުއާޓާގައި ބައްދަލުކުރާނީ އެމް.އެން.ޔޫ ބިޒްނަސް ސްކޫލާއި ކްލިކް ކޮލެޖެވެ. ފިރިހެން ޑިވިޝަނުގެ ކުއާޓާ ފައިނަލް މެޗުތައް ކުޅުމަށް ހަމަޖެހިފައިވަނީ ހޮނިހިރު ދުވަހުގެ ރެޔެވެ.
ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ ޓައިޓްލް ސްޕޮންސަރަކީ އެމް.ޔޫ ސްޓޯރުން އެތެރެކުރާ ”ލެކްނޯ“ ބްރޭންޑެވެ. މުބާރާތުގެ ކޯ-ސްޕޮންސަރަކީ ޤައުމީ ޔުނިވަރސިޓީގެ ކުންފުނި ޔުނިވިޔަ ހޯލްޑިންގްސް އެވެ. ސަޕޯޓިންގ ޕާޓްނަރުންނަކީ މޯލްޑިވްސް ޓްރޭޑިންގ އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ)، މެންހަޓަން ބިޒްނަސް ހޮޓެލް، އޮންލައިން ނިއުސް ޢަދަދު، މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓް އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފް.އޭ.އެމް) އެވެ. ސްޕޯޓްސް ޕާޓްނަރަކީ ސޮނީ ސްޕޯޓްސް އެވެ. މުބާރާތުގެ ޑިޖިޓަލް ޕާޓްނަރަކީ ދިރާގު ކަމަށްވާއިރު، ކިޓް ޕާޓްނަރަކީ ޕްރިންޓް ކޯއެވެ. ޕްރިންޓިންގ ޕާޓްނަރަކީ އެމް ސެވަން އެވެ. އަދި އެސޯސިއޭޓިވް ޕާޓްނަރަކީ އަދަދު އޮންލައިންއެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ސާނަވީ ދާއިރާގައި ބާއްވާ އެންމެ ބޮޑު ކުޅިވަރު ޙަރަކާތެވެ. މި މުބާރާތް ރާވާ އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިންނެވެ. މި އަހަރު މި ބާއްވަނީ މީގެ 8 ވަނަ މުބާރާތެވެ. މިއަހަރުގެ މުބާރާތް މި ބޭއްވެނީ ކޮވިޑް-19ގެ ޢާލަމީ ވަބާއާއެކު 2 އަހަރުގެ މެދުކެނޑުމަކަށްފަހުއެވެ. އެންމެ ފަހުން 2019 ވަނަ އަހަރު ބޭއްވި މުބާރާތުގެ ފިރިހެން ޑިވިޝަނުގެ ޗެމްޕިއަނަކީ އެވިޑް ކޮލެޖެވެ. އަދި އަންހެން ޑިވިޝަނުގެ ޗެމްޕިއަނަކީ އެމް.އައި ކޮލެޖެވެ. މި މުބާރާތް އެންމެ ފުރަތަމަ ބޭއްވުނީ 2013 ވަނަ އަހަރެވެ. އެއަށްފަހު 2019 ވަނަ އަހަރާ ހަމައަށް މެދުކެނޑުމެއްނެތި ކޮންމެ އަހަރަކު މި މުބާރާތް ކުރިއަށް ގެންދެވިފައިވެއެވެ. މުބާރާތުގައި އަންހެން ޑިވިޝަން ތަޢާރަފު ކުރެވުނީ 2018 ވަނަ އަހަރެވެ. މި މުބާރާތުގެ އެންމެ ކާމިޔާބު ޓީމަކީ މުބާރާތުގެ ފިރިހެން ޑިވިޝަނުގެ ތަށި 3 ފަހަރު ޙާޞިލުކޮށްފައިވާ އެމް.އެން.ޔޫ ބިޒްނަސް ސްކޫލެވެ.
